ފަލަސްޠީނުގެ ޣައްޒާގައި ހުންނަ އަލް ޤުދުސް ހޮސްޕިޓަލް ހުސްކުރުމަށް އިޒްރާއިލުން އަންގަމުންދާ ކަމަށް ބޭރުގެ މީޑިއާ ތަކުން ބުނެފި އެވެ.

އަލް ޤުދުސް ހޮސްޕިޓަލް ހުސްކުރުމަށް އިޒްރާއިލް ސިފައިން ދެމުންދާ އިންޒިރާރާއި އެކު ޤުދުސް ހޮސްޕިޓަލަށް ބޮން އަޅާނެ ކަމުގެ އިންޒާރުތައް ވެސް އިޒްރާއިލް ސިފައިން ދަނީ ދެމުންނެވެ.

އަލް ޤުދުސް ހޮސްޕިޓަލަކީ ޒަޚަމްވަމުންދާ މީހުންނަށް ފަރުވާދިނުމުގެ އިތުރުން ޤުދުސް ހޮސްޕިޓަލަކީ ގެދޮރުގެއްލިފައިވާ 14000 މީހުން ވަގުތީ ގޮތުން ބޯހިޔާވަހިކަން ހޯދަމުންދާ ތަނެެކެވެ.

Advertisement

ޤުދުސް ހޮސްޕިޓަލަށް އިޒްރާއިލުން ދެމުންދާ އިންޒާރުތަކާއި ގުޅިގެން ވޯލްޑް ހެލްތް އޮގަނަޒިޒޭޝަނުން ވަނީ ކަންބޮޑުވުން ފާޅުކޮށްފައެެވެ.

އޮކްޓޫބަރު މަހުގެ 7ވަނަ ދުވަހުން ފެށިގެން އިޒްރާއިލުން ޣައްޒާއަށް ދެމުންދާ ހަމަލާތަކުގެ ސަބަބުން 8000 އަށްވުރެ ގިނަ މީހުން ވަނީ ޝަހީދުވެފައެވެ. އޭގެ ތެރެއިން ބޮޑުބައެއް ހިއްސާ ކުރަނީ މައުސޫމް ކުޑަކުދިންނާއި އަންހެނުންނެވެ.

އިޒްރާއިލްގެ ހަމަލާތަކުގެ ސަބަބުން 47 މިސްކިތެއް ވަނީ ހަލާކުވެފައެވެ. މީގެ އިތުރުން 7 ފައްޅިއެއް ވަނީ ހަލާކުވެފައެވެ. ޣައްޒާގެ މީޑިއާ އޮފީހާއި ހަވާލާދީ އަލްޖަޒީރާގައި ބުނެފައިވަނީ 203 ސްކޫލަކާއި، ސަރުކާރުގެ 80 އޮފީހެއް ވަނީ ހަލާކުވެފައި ކަމަށެވެ. އަދި ހަމަމިއާއި އެކު 220000 މީހުން ދިރިއުޅޭ ހައުސިންގ ޔުނިޓެއް ހަލާކުވެފައިވާ ކަމަށާއި، 32،000 ޢިމާރާތެއް މުޅިން އެކީގައި ބިމާއި ހަމަވެފައިވާ ކަމަށް ބުނެފައިވެއެވެ.