އިޒްރާއިލުން ފަލަސްޠީނުގެ ޣައްޒާގައި ހުންނަ އަލް ޤުދްސް ހޮސްޕިޓަލް ކައިރިއަށް ހަމަލާދީފިއެވެ.

މިހަމަލާއާއި ގުޅިގެން އެހޮސްޕިޓަލްގައި މަސައްކަތްކުރާ މެޑިކަލް އޮފޮސަރުންނާއި ފަރުވާހޯދަމުންދާ މީހުންނާއި އެހޮސްޕިޓަލްގައި ވަގުތީ ހިޔާ ހޯދަމުންދާ މީހުންގެ މެދުގައި ވަނީ ހާސްވުމާއި ކަންބޮޑުވުން ފެތުރިފައެވެ.

ޤުދުސް ހޮސްޕިޓަލް ކައިރިއަށް ދިން ހަމަލާގައި އެތަނަށް ގެއްލުމެއް ލިބިފައެއް ނުވެއެވެ.

ޤުދްސް ހޮސްޕިޓަލް ކައިރިއަށް ހަމަލާދިނުމުގެ އިތުުރުން އިޒްރާއިލްގެ ޔަހޫދީން ރޭ ވަނީ ޣައްޒާގައި ހުންނަ އިންދޮނީސީ ހޮސްޕިޓަލް ކައިރިއަށްވެސް ވަރުގަދަ ހަމަލާތަކެއް ދީފައެވެ. މީގެ އިތިުރުން ފަލަސްޠީން ޓާކިޝް ފްރެންޑް ޝިޕް ހޮސްޕިޓަލަށް އަމާޒުކޮށް ހަމަލާދިނުުމުގެ ސަބަބުން އެހޮސްޕިޓަލަށް ގެއްލުން ތަކެއް ލިބިފައިވާ ކަމަށް އަލްޖަޒީރާގައި ބުނެފައިވެއެވެ.

ހަމަމިއާއި އެކު ޣައްޒާގައި ހުންނަ ޔޫރަޕިއަން ހޮސްޕިޓަލް ހިމެނޭ ސަރަހައްދަށްވެސް ރޭ އިޒްރާއިލުން ވަނީ ހަމަލާދީފައެވެ.

އިޒްރާއިލުން އޮކްޓޫބަރ 7ގައި ދޭން ފެށި ހަމަލާތަކުގައި މިހާތަނަށް 8306 ފަލަސްޠީން ރައްޔިތުން ވަނީ ޝަހީދުވެފައެވެ. ޔުނިސެފާއި ހަވާލާދީ އަލްޖަޒީރާގައި ބުނެފައިވަނީ އިޒްރާއިލުން ކުރިއަށްގެންދާ ހަމަލާތަކުގެ ސަބަބުން ދުވާލަކަށް ފަލަސްޠީނުގެ 420 ކުޑަކުދިން ޒަޚަމްވެއެވެ.

ޣައްޒާއަށް ވައިގެ މަގުން ދޭ ހަމަލާތައް އެތައް ގުނައެއް ވަރުގަދަކޮށް އިޒްރާއިލުން މިހާރު މަސައްކަތް ކުރަމުންދަނީ ޣައްޒާގެ ބިމަށް ހަތިޔާރާއި އެކު އެރުމަށެވެ.

ޣައްޒާގައި ބޮޑެތި ޤަތުލްޢާންމުތައް ހިންގަމުންދާއިރު ފަލަސްޠީނުގެ ހުޅަނގުއައްސޭރީގައި އިޒްރާއިލުން ހިންގަމުންދާ ޖަރީމާތައްވެސް ވަނީ ވަރުގަދަ ކޮށްފައެވެ.