ރައްޔިތުންގެ މަޖިލީހުގެ އެއްވެސް މަސައްކަތެއް ކުރިއަށް ގެންދަން މަޖިލީހުގެ މެޖޯރިޓީ ޕާޓީ، އެމްޑީޕީން އެއްބާރުލުން ދެވޭނީ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމުގެ މައްސަލަ އާއި މެދު ގޮތެއް ނިންމުމުން ކަމަށް މެޖޯރިޓީ ލީޑަރު މުހައްމަދު އަސްލަމް ވިދާޅުވެއްޖެއެވެ. 

އަސްލަމް އެގޮތަށް ވިދާޅުވީ ރައީސް ނަޝީދުގެ އިތުބާރު ނެތް ކަމުގެ މައްސަލަ ކުރިއަށް ނުގެންދެވި މަޖިލިސް ހުއްޓިފައިވާތީ އެމްޑީޕީގެ ޕާލަމަންޓްރީ ގްރޫޕުން މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުންނެވެ.

އަސްލަމް ވިދާޅުވީ ނަޝީދުގެ އިތުބާރު ނެތް ކަމުގެ މައްސަލަ ކުރިއަށް ނުގެންދާހާ ހިނދަކު މަޖިލީހަށް އެއްބާރުލުން ނުދެއްވާނެ ކަމަށް އެމްޑީޕީ ޕާލަމަންޓްރީ ގުރޫޕުން ނިންމަވާފައިވާ ނިންމުމަށް ބަދަލެއް އަންނަންދެން މެންބަރުން ތިބޭނީ އެގޮތުގައި ކަމަށާ، އަދި ޕާލަމެންޓްރީ ގްރޫޕުން ވެސް އެނޫން ރޫހެއް އަދި ފެންނަން ނެތް ކަމަށެވެ. 

އަސްލަމް އިތުރަށް ވިދާޅުވީ އިތުބާރު ނެތް ކަމުގެ މައްސަލަ ކުރިއަށް ގެންދިޔުމާއި މެދު ދެގޮތަކަށް ކަންތައް ކުރެވިދާނެ ކަމަށެވެ. 

މީގެ އިތުރުން މި މައްސަލަ ދިގުލައިގެން ދާ ނަމަވެސް އެމްޑީޕީ މެމްބަރުންގެ ސްޓޭންޑް ބަދަލު ނުވާނެތޯ ނޫސްވެރިއަކު ކުރި ސުވާލަށް ޖަވާބު ދެއްވަމުން އަސްލަމް ވަނީ އެ މައްސަލަ އެހާ ދިގުލައިގެން ދާނެ ކަމަށް ފެނިވަޑައިނުގަންނަވާ ކަމަށް ވިދާޅުވެފަ އެވެ. 

އެހެނީ އެ މައްސަލައަކީ ވަރަށް ހައްސާސް އަދި މުހިންމު މައްސަލައެއް ކަމަށާ އެއީ ދުސްތޫރީ މައްސަލައެއް ވެސް ކަމަށްވާއިރު އެފަދަ ކަމެއް ދިގުލައިގެންދާނެ ކަމަށް ގަބޫލުނުކުރައްވާ ކަމަށް އޭނާ ވިދާޅުވިއެވެ.

"ދައުލަތުގެ އެއް ބާރު ހުއްޓިގެން މި ދަނީ. އެހެންވީމާ ދައުުލަތުގެ އެއްބާރު ހުއްޓިގެން ދިއުމަކީ މުޅި ދައުލަތް ހިންގުމަށް ހުރަސް އެޅިގެންދާނެ ކަމެއް. ދެން މިފަދަ މައްސަލަތައް ބެލުމަށް އިހުތިސާސް ލިބިގެންދާ ކޯޓުގައި އެއޮތީ. އެހެންވީމާ އެ ބޭފުޅުން ވެސް އަޅުގަނޑަށް ޔަގީން މައްސަލަައިގެ ހައްސާސް ކަަމަށް ބައްލަވައި ވީހާވެސް އަވަހަށް މައްސަލަ ކުރިއަށް ގެންގޮސް ނިންމަވައިދެއްވާނެކަމަށް." އަސްލަމް ވިދާޅުވިއެވެ.