ފަލަސްޠީނުގެ ޣައްޒާގައި އޮންނަ ތާލް އަލްހަވާ ނެއިބަރހުޑްގެ އެކި ސަރަހައްދު ތަކަށް އިޒްރާއިލުން ވަރުގަދަ ހަމަލާތަކެއްދީފިއެވެ.
ޤުދްސް ނެޓްވޯކްގައި ބުނެފައިވަނީ ތާލް އަލްހަވާ ސަރަހައްދުގެ މަގުތަކުގައި ހަރަކާތެއް ކުރާ ކޮންމެ ދުއްވާއެއްޗަކަށް އަމާޒުކޮށް އޮޒްރާއިލުން ދަނީ ހަމަލާދެމުންކަމަށެވެ. ހަމަލާދިނުމުގައި ޢާންމުންގެ ވެހިކަލެއް އެމްބިޔުލާންސެއް ބެލުމެއް ނެތް ކަމަށް ޤުދްސް ނެޓްވޯކުން ބުނެފައިވެއެވެ. އަދި މެޑިކަލް އޮފިސަރުންނަށް އަމާޒުކޮށްވެސް ހަމަލާތައް އަންނަނީ ދެމުން ކަމަށް ބުނެފައިވެއެވެ.
އެމްބިޔުލާންސްތަަކަށް ހަމަލާދެމުންދާތީ ޒަޚަމްވާ މީހުން ހޮސްޕިޓަލް ތަކަށް ގެންދިޔުމަށް ހިމާރު ގާޑިޔާ ދަނީ ބޭނުންކުރަމުންނެވެ.
ޣައްޒާގައި ހަރަކާތްތެރިވަމުންދާ އަލްޖަޒީރާގެ ނޫސްވެރިޔަކު ބުނެފައިވަނީ އިޒްރާއިލް ސިފައިން މެދުކެނޑުމެއް ނެތި ދެމުންދާ ރޮކެޓް ހަމަލާތައް ޣައްޒާގެ އިރުމައްޗަށް ދޭން ފަށައިފައިވާ ކަމަށެވެ. އަދި އިޒްރާއިލް ސިފައިން ޣައްޒާގެ އެތެރެއަށް ހަތިޔާރާއި އެކު ވަނުންމަށް ކުރާ މަސައްކަތުގެ ތެރެއިން އިއްޔެއަށްވުރެ ބޮޑަށް ޣައްޒާގެ އެތެރެއަށް ވަތް ކަމުގެ ޚަބަރު މިއަދު ހެނދުނު ލިބިފައިވާ ކަަމަށް ނޫސްވެރިޔާ ޞަފްވަތް ވަނީ ވިދާޅުވެފައެވެ.
އޭނާ އިތުރަށް ވިދާޅުވެފައިވަނީ އިޒްރާއިލް ސިފައިން ޣައްޒާގެ ރައްޔިތުންނަށް ޣައްޒާ ދޫކޮށް ދިޔުމަށް އަންގާ އެންގުމަށް ތަބަޢަވެ ދާން ބޭނުންވާ މީހުންނަށްވެސް ނުކެމެގެން ރައްކާތެރިކަމާއި އެކު ބޭރަށް ދެވޭނެ ގޮތެއް ނެތް ކަމަށެވެ.
އިޒްރާއިލްގެ ހަމަލާތަކުގެ ސަބަބުން މިހާތަނަށް 8306 މީހުން ޝަހީދުވެފައިވާއިރު އޭގެ ތެރެއިން 3457 ޝަހީދުންނަކީ ކުޑަކުދިންނެވެ. 2136 ޝަހީދުންނަކީ އަންހެނުންނެވެ.
މީގެ އިތުުރުން 21،048 މީހަކު ވަނީ ޒަޚަމްވެފައެވެ. މީގެ ތެރެއިންވެސް ބޮޑު ބައެއް ހިއްސާކުރަނީ ކުޑކުދިންނެވެ.
Advertisement
This content is created and paid for by advertisers and does not involve Voice Journalists
