ފަލަސްޠީނުގެ ހުޅަނގު އައްސޭރީގެ ޠޫބާސް އަވަށުގައި އިޒްރާއިލް ސިފައިން މިލިޓަރީ ރެއިޑެއްގެ ނަމުގައި ހިންގި ޖަރީމާތަކުގައި އެއަވަށުގެ ޢުމުރުން ދުވަސްވީ ފިރިހެނެއްގެ ގަޔަށް ބަޑިޖަހައި ޝަހީދު ކޮށްލައިފިއެވެ.

ޠޫބާސް އަވަށުގައި ޝަހީދުކޮށްލައިފައިވަނީ ޙައްޖު ރަވްހީ ޞަވަފްތާ އެވެ. ޙައްޖު ޝަހީދުވެފައިވަނީ އިޒްރާއިލް ސިފައިން އޭނާއަށް އަމާޒުކޮށް ދިން ބަޑީގެ ހަމަލާ އޭނާގެ ހަށިގަނޑަށް އަރައިގެން ލިބުނު އަނިޔާއަށް ފަރުވާ ހޯދަމުން ދަނިކޮށެވެ.

އިޒްރާއިލް ސިފައިން ޠޫބާސް އަށް ިބުލްޑޯޒަރުތަކާއި އެކު ވަދެ ވަނީ އެތަނުގެ ޢިމާރާތްތަކަށް ގެއްލުންދީފައެވެ.

Advertisement

ފަލަސްޠީނުގެ ރެޑްް ކްރެސެންޓުން ބުނެފައިވަނީ އިޒްރާއިލްގެ މިލިޓަރީ ރެއިޑްގެ ސަބަބުން ނުވަ މީހަކު ޒަޚަމްވެފައިވާ ކަމަށެވެ. އަދި އޭގެ ތެރެއިން ދެމީހެއްގެ ޙާލު ދެރަކަމަށްވެސް ވަނީ ބުނެފައެވެ.

އޮކްޓޫބަރ 7 ގެ ފަހުން އިޒްރާއިލުން، ހުޅަނގު އައްސޭރީގައި ޝަހީދު ކޮށްލި މީހުންގެ ޢަދަދު ވަނީ 124 އަށް އަރައިފައެވެ.

ފަލަސްޠީނުގެ ޣައްޒާއަށް އިޒްރާިއިލުން ދެމުންދާ ހަމަލާތަކާއި ހަމާސް އާއި އިޒްރާއިލާއި ދެމުންދާ ހަމަލާތަކައި ގުޅިގެން ދުނިޔޭގެ ނަޒަރު ޣައްޒާއަށް ހުއްޓިފައިވާއިރު ފަލަސްޠީނުގެ ހުޅަނގު އައްސޭރިއަށް ވަދެ އެތަނުގެ އެކި ސަރަހައްދުތަކަށް އިޒްރާއިލް ސިފައިން ވަދެ ދަނީ ގެއްލުންދެމުންނެވެ. 

އަދި ޢާންމުންނަށް ހަމަލާދިނުމާއި ކުށެއް ނެތި މީހުން ހައްޔަރު ކުރުން ވަނީ ގިނަވެފައެވެ.