މަޖިލީހުގެ ނައިބު ރައީސާ އީވާ އަބްދުالله އާލާސްކަންފުޅާ އުޅުއްވާތީ ސަލާމް ފޮނުވުމުން މިއަދުގެ މަޖިލީހުގެ ޖަލްސާ ވެސް ކެންސަލްކޮށްފި އެވެ.

ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ރިޔާސަތުން ވަކިކުރުމަށް 49 މެމްބަރުންގެ ސޮޔާއެކު މަޖިލީހަށް ހުށަހަޅައި އެމަނިކުފާނަށް 14 ދުވަހުގެ ނޯޓިސް ފޮނުވައި، ނޯޓިސްގެ މުއްދަތު ހަމަވުމާއިއެކު އާދިއްތަ އާއި ހޯމަ ދުވަހުވެސް ވަނީ އެ މައްސަލަ އެޖެންޑާ ކޮށްފައެވެ. ނަމަވެސް އީވާ ސަލާމުގައި ހުންނެވުމުން އެ ދެ ދުވަހުވެސް އެ މައްސަލަ ވަނީ ކެންސަލް ކޮށްފައެވެ. 

އެއަށްފަހު އިއްޔެ 2024 ވަނަ އަހަރުގެ ބަޖެޓްގެ މަސައްކަތް ތާވަލް ކުރި އިރު، އެމްޑީޕީ މެންބަރުން މަޖިލީހުގެ ތަޅުމުގައި ދުންމާރި ފުންމައި އަޑުގަދަ ކޮށް ރިޔާސަތަށް ޖެއްސުން ކުރުމުން އެ ޖަލްސާ ވަނީ ހުއްޓާލާފައެވެ. 

އެއަށްފަހު އެމްޑީޕީން އިއްޔެ ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ޕާލިމަންޓްރީ ގުރޫޕްގެ ލީޑަރު މުހައްމަދު އަސްލަމް ވަނީ ނަޝީދުގެ އިތުބާރު ނެތް ކަމުގެ މައްސަލަ ކުރިއަށް ނުގެންދާހާ ހިނދަކު މަޖިލީހަށް އެއްބާރުލުން ނުދެއްވާނެ ކަމަށާ، އެމްޑީޕީ ޕާލަމަންޓްރީ ގުރޫޕުގެ އެ ނިންމުމަށް ބަދަލެއް އަންނަންދެން މެންބަރުން ތިބޭނީ އެގޮތުގައި ކަމަށް ވިދާޅުވެފައެވެ. އަދި ޕާލަމެންޓްރީ ގްރޫޕުން ވެސް އެނޫން ރޫހެއް އަދި ފެންނަން ނެތް ކަމަށް އޭނާ ވިދާޅުވި އެވެ. 

ނަޝީދުގެ މައްސަލަ ކުރިއަށް ނުގެންދެވޭ މައްސަލަ އެމްޑީޕީން މިހާރު ވަނީ ސްޕްރީމް ކޯޓަށްވެސް ހުށަހަޅާފައެވެ. އެ ކޯޓުން އެ މައްސަލަ ބަލައިގެންފައިވާއިރު، އެ ކޯޓުގެ ނިންމުން އެމްޑީޕީން ގަބޫލު ކުރާނެ ކަމަށް އެމްޑީޕީން ވަނީ ބުނެފަ އެވެ.