ފަލަސްޠީނުގެ ޣައްޒާގައި ހުންނަ އިންދޮނީސީ ހޮސްޕިޓަލުގެ މައި ޖަނެރޭޓަރު ހުއްޓި ގިނަ ބައެއްގެ ފުރާނަ ނުރައްކަލަށް ވެެއްޓިއްޖެއެވެ.
ޣައްޒާއިން ކަރަންޓު ކަނޑާލައިފައި ވުމުގެ ސަބަބުން ހޮސްޕިޓަލްތަކަށް ކަރަންޓު ފޯރުކޮށްދިނުމަށް ބޭނުން ކުރަމުން ދަނީ ޖަނެރޭޓަރުތަކެވެ. ޖަނެރޭޓަރުތަކަށް އަޅާނެ ތެޔޮ ވެސް މިހާރު ދަނީ ހުސްވަމުންނެވެ. މިސަބަބާއި ހުރެ ޖަނެެރޭޓަރުތައް ނިވެމުންދާތީ ހޮސްޕިޓަލް ތަކުގެ ހިންގުމަށް ވަނީ ބުރޫއަރައިފައެވެ.
އިންދޮނީސީ ހޮސްޕިޓަލްގެ މައި ޖަނެރޭޓަރު ހުއްޓިފައިވާ އިރު ޣައްޒާގައި ހުންނަ ހަމައެކަނި ކެންސަރު ހޮސްޕިޓަލް ކަމުގައި ވާ ޓާކިޝް-ފަލަސްތީން ފްރެންޑްޝިޕް ހޮސްޕިޓަލް ގައި ކަރަންޓު ކެނޑި އެހޮސްޕިޓަލްގެ ޚިދްމަތް ވަނީ އެއްކޮށް ހުއްޓައިލައިފައެވެ.
ފަލަސްޠީނުގެ ހެލްތް މިނިސްޓްރީ އިން ބުނެފައިވަނީ މިހާރު އިންދޮނީސީ ހޮސްޕިޓަލުގައި ޚިދްމަތް ދެމުންދަނީ ބެކަޕް ޖަނެެރޭޓަރުން ކަމަށެވެ. އަދި އޭގެ މާނައަކީ ސިއްޚީ ޚިދްމަތަށް ބޭނުންކުރާ ގިނަ ކަރަންޓުގެ ސާމާނުތައް ބޭނުން ނުކުރެވޭ ހާލަތުގައި ހުރުން ކަމަށާއި، ކުޑަ ދުވަސްކޮޅެއްގެ ތެރޭގައި މުޅި ހޮސްޕިޓަލްގެ ޚިދްމަތް ކެނޑިދާނެ ކަމަށެވެ.
ޣައްޒާގެ އެންމެ ބޮޑު ހޮސްޕިޓަލް ކަމަށްވާ އަލް ޝިފާ ހޮސްޕިޓަލް ގެ ޚިދްމަތްވެސް އަވަސް މުއްދަތެއްގެ ތެރޭގައި ތެޔޮ ނުލިބިއްޖެނަމަ ކެނޑިދާނެ ކަމަށް ފަލަސްޠީނުގެ ހެލްތް މިނިސްޓްރީ އިން ވަނީ ބުނެފައެވެ.
ހޮސްޕިޓަލްތަކަށް ބެނުންވާ ކަރަންޓު ނުލިބި ޒަޚަމްވެފައިވާ މީހުން ހޮސްޕިޓަލްތަކުގައި ފުނިޖެހިފައިވާއިރު، އިޒްރާއިލުން ޣައްޒާއަށް ތެޔޮ ދޫކުރާނެ ކަމުގެ އިޝާރާތެއްވެސް ކޮށްފައެއް ނުވެއެވެ. އަދި ރަފާ ހުރަސްކޮށް ޣައްޒާއަށް ތެޔޮ ވެއްދުންވެސް ވަނީ މަނާކޮށްފައެވެ. އަދި އެހީގެ ގާފިލާތަކާއި އެކު ތެޔޮ ވައްދާނަމަ ހަމަލާދޭނެ ކަމަށް އިޒްރާއިލުން ވަނީ އިންޒާރުދީފައެވެ.
7 އޮކްޓޫބަރުގައި ޣަައްޒާއަށް ދޭން ފެށި ހަމަލާތަކުގައި މިހާތަނަށް 8805 މީހަކު ވަނީ ޝަހީދުވެފައެވެ.
Advertisement
This content is created and paid for by advertisers and does not involve Voice Journalists
