މޯލްޑިވްސް އިސްލާމިން ބޭންކުގެ ބ އަތޮޅު ސޭލްސް ސެންޓަރު އޭދަފުށީގައި ހުޅުވައިފިއެވެ. 

މި ސެންޓަރު ހުޅުވައިދެއްވީ އޭދަފުށީ ކައުންސިލްގެ ރައީސް މުހައްމަދު ފާތިހު އާއި ބ އަތޮޅު ކައުންސިލްގެ ރައީސް އަހްމަދު އަފްރާހް އެވެ.

އެމްއައިބީ އިން ބުނީ، މި ސެންޓަރަކީ ޒަމާނީ ޓެކްނޮލޮޖީގެ އެހީގައި ހިދުމަތްދޭ ސެންޓަރެއް ކަމަށާ، އެތަނުގައި ފައިސާ ޖަމާކުރާ ކައުންޓަރު ތަކެއް ނެތް ނަމަވެސް ފައިސާ ޖަމާކުރުމާއި ނެގުމުގެ ޚިދުމަތް 24 ގަޑިއިރު، އޭޓީއެމް މެދުވެރިކޮށްލިބޭނެ ކަމަށެވެ. 

Advertisement

މީގެ އިތުރުން އެ ސެންޓަރު މެދުވެރިކޮށް އެކައުންޓް ހުޅުވުމުގެ ހިދުމަތް އޮންލައިންކޮށް ލިބޭއިރު، އިންޓަނެޓް ބޭންކިން ގެ ހިދުމަތަށްވެސް އަމިއްލައަށް ރަޖިސްޓްރީ ކޮއްލެވޭނެ ކަމަށް އެ ބޭންކުން ބުނެއެވެ. 

ހަމަ އެހެންމެ، އެމްއައިބީގެ އެކި ހިދުމަތްތަކަށް މުވަޒަފުންގެ އެހީ ހޯދޭނެ ކަމަށާ ފައިނޭންސިން ހިދުމަތް ހޯދުމަށް ދެން އެ ހިސާބުގެ ރައްޔިތުން މާލެ އަންނާން ނުޖެހޭނެ ކަމަށް ވެސް ބުނެފައިވެއެވެ. 

އެމްއައިބީއިން ބުނީ މިއީ އެބޭންކުގެ އާ ތަސައްވަރު ކަމަށާ، މިފަދަ ޒަމާނީ ބްރާންޗްތަށް ދާދި އަވަހަށް އދ މަހިބަދޫ އަދި ލާމު ގަމުގައި ހުޅުވާނެކަމަށެވެ.

އަދި ކުރިއަށް އޮތް އަހަރުވެސް މިފަދަ ޒަމާނީ ބްރާންޗްތަށް ރާއްޖޭގެ އެކި ކަންކޮޅުތަކުގައި ހުޅުވުމުގެ މަސައްކަތް އެބޭންކުން މިހާރު ވެސް ކުރަމުން އަންނަ ކަމަށް ބުނެފައިވެއެވެ.