ކުނި މެނޭޖުކުރުމުގެ މަސަައްކަތަށް ޚާއްސަކޮށް އުފައްދާފައިވާ ވޭސްޓް މެނޭޖުމެންޓު ކޯޕަރޭޝަން (ވެމްކޯ)ގެ މުދަލުގެ އިންވެންޓްރީ ރަނގަޅަށް ނުބަލަހަައްޓާކަމަށާއި، އޮޑިޓު ނުކުރާތާ 3 އަހަރު ވެފައިވާކަމަށް އިންތިޚާބީ ރައީސުލްޖުމްހޫރިއްޔާގެ އޮފީހުން ހާމަކޮށްފިއެވެ.

އިންތިޚާބީ ރައީސުލްޖުމްހޫރިއްޔާގެ އޮފީހުން މިއަދު ބޭއްވި ނޫސްވެރިންގެ ބައްދަލުވުމެއްގައި އެ އޮފީހުގެ ތަރުޖަމާން މުޙައްމަދު ފިރުޒުލް ވަނީ އިންތިޚާބީ ރައީސުލްޖުމްހޫރިއްޔާގެ އޮފީހުގެ ފަރާތުން ސަރުކާރުގެ ޔުޓިލިޓީ ކުންފުނިތަކުން އެއްކުރި މައުލޫމާތުތަކަށް އަލި އަޅުވާލައްވައި، އެ އޮފީހުގެ ހުރި ކަންބޮޑުވުންތައް ހިއްސާކުރައްވާފައެވެ. 

އެގޮތުން، ވެމްކޯގެ ހާލަތަށް އަލި އަޅުވާލައްވައި ފިރުޒުލް ވިދާޅުވީ އެކުންފުނީގެ ޖުމްލަ ދަރަނި 226 މިލިއަން ރުފިޔާއަށް އަރާ ކަމަށެވެ. އަދި އެވަރުގެ ދަރަންޏެއް އޮތް އިރުވެސް ކުންފުނިން ކުރަމުންދާ ޚަރަދުތައް އިތުރުވަމުންދާތީ, ކުންފުނި ހިންގައި މުވައްޒަފުންނަށް މުސާރަ ދިނުން ފަދަ ކަންކަން ކުރުމަށް ކޮންމެ މަހަކު ސަރުކާރުން ކެޕިޓަލް އިންޖެކްޝަނުގެ ގޮތުގައި ފައިސާ ދެމުންދާ ކަމަށް އޭނާ ވިދާޅުވި އެވެ. އަދި، ވެމްކޯއަށްވާ ގެއްލުން އަހަރުން އަހަރަށް އިތުރުވެ ބޮޑުވަމުންދާކަން ވެސް އޭނާ ފާހަގަކުރެއްވިއެވެ. 

Advertisement

މިއާއެކު ފިރުޒުލް ވަނީ ކުންފުނީގެ ވިޔަފާރި ތަރައްޤީކޮށް ކުރިއެރުވުމަށް ބޭނުންވާ ބިޒްނަސް ޑިވެލޮޕްމެންޓު ޕްލޭނެއް ވެމްކޯއިން އެކުލަވައިލާފައިނުވާ ކަން ފާހަގަކުރައްވައި ކަންބޮޑުވުން ފާޅުކުރައްވާފައެވެ. 

ފިރުޒުލް ވިދާޅުވީ ކުންފުނީގެ އިންވެންޓަރީ އާއި ސްޓޮކް ނުބެލެހެއްޓުމުގަ ސަބަބުން، ކުންފުނިން ބޭނުންކުރަމުންދާ ބައެއް ތަކެތި ވަރަށް ބޮޑަށް މަރާމާތު ކުރަން ޖެހިފައިވާ ކަމަށެވެ. އަދި އޭގެ ސަބަބުން ވެސް ޚަރަދުތައް ބޮޑުވެފައިވާ ކަމަށް އޭނާ ވިދާޅުވި އެވެ. 

"މީގެ ނަތީޖާއެއްގެ ގޮތުން ކުންފުނިން ޚިދުމަތް ފޯރުކޮށްދިނުމަށް ބޭނުންކުރަމުންދާ [އުޅަނދުތަކުގެ] ފުލީޓުވެސް ވަރަށް ބޮޑަށް ބާވެ، އެތަކެތިވެސް ހުރީ ވަރަށް ބޮޑަށް މަރާމާތުކުރަންޖެހިފައިކަން ފާހަގަކުރެވޭ. މިހާރު މިކަންކަން ރަނގަޅަށް އިންތިޒާމުވެ، ތަރުތީބުވެގެން ކުރިއަށްނުދާތީ މިހާރު އެ ކުންފުނިން މަސައްކަތްކުރާ ގޮތަކީ އުޅަނދެއް ނުވަތަ އިކުއިޕްމެންޓެއް ހަލާކުވުމުން މަރަމާތަށް ބޭނުންވާ އެއްޗެއް ވަގުތުން ގަނެގެން ކުރިއަށް ގެންދިއުން. އޭގެ ސަބަބުން އާޚިރުގައި ކުންފުނީގެ ޚަރަދުތައް ވަރަށް ބޮޑަށް އިތުރުވަމުންދާކަން ފާހަގަކުރެވޭ" ފިރުޒުލް ވިދާޅުވިއެވެ.

މިއަދުގެ ނޫސްވެރިންގެ ބައްދަލުވުމުގައި އިންތިޚާބީ ރައީސުލްޖުމްހޫރިއްޔާގެ އޮފީހުން ހާމަކޮށްފައިވަނީ ފެނަކައާއި، ސްޓެލްކޯއާއި އެމްޑަބްލިއުއެސްސީއާއި ވެމްކޯގެ ހާލަތެވެ.