ގެދޮރުގެއްލި ހާލުގައި ޖެހިފައިތިބި ޣައްޒާގެ ބައެއް ރައްޔިތުން ބޯހިޔާ ވަހިކަން ހޯދަމުން ދިޔަ ސްކޫލަކަށް އިޒްރާއިލުން ހުދު ފޮސްފަރެސް ބޮމުގެ ހަމަލާއެެއް ދީފިއެވެ.
މިހަމަލާދީފައިވަނީ އދ އިން، ޝަތީ ރެފީޔުޖީ ކޭމްޕްގައި ހިންގާ ސްކޫލަކަށެވެ. މި ސްކޫލަކީ މިވަގުތު އެތައްހާސް ބަޔަކު ވަގުތީ ހިޔާވަހިކަން ހޯދަމުންދާ ތަނެއް ކަމަށް ޤުދުސް ނެޓްވޯކުން ބުނެފައިވެއެވެ.
މިހަމަލާގެ ސަބަބުން ގިނަ ބަޔަކު ވަނީ ޝަހީދުވެފައެވެ. އަދި ގިނަ ބަޔަކު ވަނީ ޒަޚަމްވެފައެވެ. ނަމަވެސް ޝަހީދުވި މީހުންގެ ޢަދަދެއް އަދި އަދި ޒަޚަމްވި މީހުންގެ ޢަދަދެއް ޔަޤީންވެފައެއް ނުވެއެވެ.
އިޒްރާއިލުން ހުދު ފޮސްފަރެސް އިން ހަމަލާދީފައިވާއިރު، ހަމަލާދިނުމަށް ހުދު ފޮސްފަރެސް ބޭނުން ކުރުމަކީ ބައިނަލް އަޤްވާމީ މުވާހަދާތަކާއި ޤާނޫނު ތަކުން މަނާ ކޮށްފައިވާ ކަމެކެވެ.
7 އޮކްޓޫބަރުގައި ހަނގުރާމަ ފެށުނުފަހުން މީގެ ކުރިންވެސް އެއްފަހަރެެއްގައި ހުދު ފޮސްފަރެސްގެ ހަމަލާއެއް ވަނީ ދީފައެވެ.
ޔޫރޯ މެޑް މޮނިޓަރ އިން ބުނެފައިވަނީ އިޒްރާއިލުން މިހާތަނަށް ދެ ނިޔުކްލިއަރ ބޮމާއި އެއްވަރަށް ޣައްޒާއަށް ބޮން އަޅައިފައިވާ ކަމަށެވެ.
އިޒްރާއިލުން ޖަބަލިއްޔާއަށް ތިން ފަހަރުމަތިން ދިން ހަމަލާގައި ޝަހީދުވި މީހުންގެ ޢަދަދު މިހާރުވަނީ 1000 މައްޗަށް އަރައިފައެވެ.
Advertisement
This content is created and paid for by advertisers and does not involve Voice Journalists
