ފަލަސްޠީން އިޒްރާއިލް ހަނގުރާމައިގައި ފަލަސްޠީނުން ޝަހީދުވި މީހުންގެ ޢަދަދު 9000 މައްޗަށް އަރައިފިކަމަށް ފަލަސްޠީނުގެ ހެލްތް މިނިސްޓްރީ އާއި ހަވާލާދީ އަލްޖަޒީރާއިން ބުނެފިއެވެ.

އަލްޖަޒީރާގައި ބުނެފައިވަނީ ޣައްޒާގެ ޝަހީދުންގެ ޢަދަދު 9061 އަރައިފައިވާ ކަމަށާއި، ޒަޚަމްވީ މީހުންގެ ޢަދަދު 32،000 އަށް އަރައިފައިވާ ކަމަށެވެ.

މީގެއިތުރުން އަލްޖަޒީރާގައި ބުނެފައިވަނީ ފާއިތުވި 24 ގަޑިއިރު ތެރޭގައި އިޒްރާއިލުން ޣައްޒާގައި 15 ޤަތުލުޢާންމެއް ހިންގައިފައިވާ ކަމަށެވެ. އަދި އޭގެ ސަބަބުން ފާއިތުވި 24 ގަޑިއިރުތެރޭގައި 256 މީހަކު ޝަހީދުވެފައިވާ ކަމަށްވެސް ބުނެފައިވެއެވެ.

ޒަޚަމްވަމުންދާ މީހުންގެ ޢަދަދުތައް މަތިވަމުން ދާއިރު ޣައްޒާގެ ގިނަ ހޮސްޕިޓަލްތަކެއް އެއްކޮށް ވަނީ ތެޔޮ ނުލިބި ކަރަންޓު ނެތުމުގެ ސަބަބުން ހުއްޓިފައެވެ.

އަލްޖަޒީރާގައި ބުނެފައިވަނީ ޣައްޒާއަށް ވީ އެންމެ އަވަހަކަށް މެޑިކަލް އެހީ ފޯރުކޮށްދިނުމަށް ދުނިޔެއަށް ފަލަސްޠީނުގެ ހެލްތް މިނިސްޓްރީ އިން ގޮވާލައިފައިވާ ކަމަށެވެ. އަދި މެޑިކަލް ކަންކަމަށް ބޭނުންވާ އެހީ ފޯރުކޮށް ނުދީފިނަަމަ ސިއްޚީ ބޮޑު ކާރިސާއެއް ޣައްޒާއަށް އައިސްފާނެ ކަމަށް ބުނެފައިވެއެވެ.

ޣައްޒާގެ ބޮޑެތި ގިނަ ހޮސްޕިޓަލްތަކުގެ މަސައްކަތް މިހާރު ވަނީ ހުއްޓުމާއި ގާތްވެފައެވެ. އެގޮތުން އިންދޮނީސީ ހޮސްޕިޓަލުގެ މައި ޖަނެރޭޓަރު ހުއްޓި ގިނަ މެޑިކަލް މެޝިނުތައް ވަނީ ހުއްޓިފައެވެ. އެހޮސްޕިޓަލުން ބުނެފައިވަނީ ކިޑްނީ ބަލީގެ މީހުންނަށ ބޭނުންކުރާ ޑައިލެސިސް މެޝިނުތައް ވެސް ތެޔޮ ނުލިބިއްޖެނަމަ ވަރަށް އަވަހަށް ހުއްޓޭނެ ކަމަށެވެ.

ޣައްޒާގައި ހުންނަ އެންމެ ބޮޑު ހޮސްޕިޓަލް ކަމަށްވާ އަލް ޝިފާ ހޮސްޕިޓަލްގެ ޖަނެރޭޓަރު ތައް ހުއްޓި އެހޮސްޕިޓަލްގެ މަސައްކަތްވެސް ވަނީ ގާތްގަނޑަކަށް ހުއްޓިފައެވެ.

ދިވެހި ރާއްޖޭގެ އައިއޭސީ އިން ބުނެފައިވަނީ އަލް ޝިފާއަށް ތެޔޮ ފޯރުކޮށްދެވޭތޯ އެ ކެމްޕޭނުން މަސައްކަތް ކުރަމުންދާ ކަމަށެވެ.