އިންޑިއަން ސްވީޓްސް އަކީ ދިވެހިންގެ ތެރޭގައިވެސް ވަރަށް މަގުބޫލު ކެއުންތަކެކެވެ. ޚާއްސަކޮށް ގުލާބް ޖާމުން، ހަލްވާ، ޒިލޭބީ، ބަރްފީ އަދި ރަސްމަލައި ފަދަ ފޮނި ކާތަކެއްޗަކީ އެއްފަހަރު ކައިފިނަމަ އެތައް ފަހަރަކުވެސް ކާން ބޭނުންވާނެ އެއްޗެއްސެވެ. އެހެންކަމުން މިއަދު ވޮއިސް ގެ ބަދިގެއިން މި ގެނެސްދެނީ ވަރަށް މީރުކޮށް މިލްކް ބަރްފީ ތައްޔާރު ކުރާނެ ގޮތެވެ. 

300 މލ ގެރި ކިރު

1 ޖޯޑު ފެން

2 1/2 ހިކި ކިރު (ނީޑޯ) 

1 ސައި ސަމުސާ މުގުރި ކާފޫރުތޮޅި

2 މޭޒުމަތީ ސަމުސާ ގީ ނުވަތަ ބަޓަރ 

1/2 ޖޯޑު ޕިސްތާޝިއޯ

1) ބޮޑު ތައްޓެއްގެ ތެރޭގައި ހިކި ކިރާއި ދިޔާކިރު ރަނގަޅަށް އެކުލަވައިލާށެވެ. އެއަށްފަހު ގާތްގަނޑަކަށް 25 މިނެޓް ވަންދެން އެ ފުށްގަނޑު ފްރީޒާގައި ބަހައްޓާ ފުށްގަނޑު ހަރުކޮށްލާށެވެ.

*މި ފުށް ގަނޑު އެހާ ދިޔާ ވެގެން ނުވާނެ އެވެ. 

2) ދެން އެ ފުށްގަނޑު ފްރީޒާ އިން ނަގައި، ތަށްޓެއްގެ ތެރެއަށް ގާނާލާށެވެ. 

3) އެއަށްފަހު ތަވައެއްގެ ތެރެއަށް ގީ ފޮދު އަޅާލުމަށްފަހު މަޑު ގިނީގައި އެ ރަނގަޅަށް ދިޔާވަންދެން ކައްކާލާށެވެ. 

4) ދެން އޭގެ ތެރެއަށް ގާނާފައި ހުރި ފުށާއި ފެން އަޅާލާށެވެ. 

5) އެއަށްފަހު ކާފޫރުތޮޅި ކޮޅުވެސް އަޅާލުމަށްފަހު ފުށްގަނޑު އެއްކޮށް ހިކި، ފުށް ގުޅަ އެއް ގޮތަށް ވަންދެން މަޑު ގިނީގައި ރަނގަޅަށް ހަލުވަމުން ކައްކާލާށެވެ.

6) ދެން ޓްރޭ އެއްގައި ތެޔޮ ލުމަށްފަހު އޭގެ ތެރޭގައި ބޯކިބަލެއް ގޮތަށް ބޯ މިން ހުރިހާ ދިމާއަކުން އެއްވަރުވާނެހެން ފުށްގަނޑު ފަތުރާ ލުމަށްފަހު، ގާނިޝް ކޮށްލަން ރީތި ގޮތަކަށް ޕިސްތާޝިއޯ އަތުރާލާށެވެ.