ހައްދުފަހަނައަޅާފައިވާ އިޒްރާއިލްގެ ސިފައިން ޣައްޒާގައި ހިންގަމުންދާ ޢުދުވާނުތަކުގައި ހާލުގައި ޖެހިފައިވާ އެންމެހާ މުސްލިމު އަޚުންނާއި އުޚުތުންނަށް އެހީތެރި ވުމަށްޓަކައި ދިވެހީން ގެ ފަރާތުން 28 މިލިއަނަށްވުރެ ގިނަ ރުފިޔާ ހަދިޔާ ކޮށްފައިވާކަމަށް އިންޓަނޭޝަނަލް އެއިޑްސް ކެމްޕެއިން، އައިއޭސީއިން ހާމަ ކޮށްފިއެވެ.

އައިއޭސީން އެކްސް ގައި ކޮަށްފައިވާ ޕޯސްޓެއްގައި ބުނެފައިވާ ގޮތުގައި 3 ނޮވެމްބަރ ވީ ހުކުރު ދުވަހާއި ހަމައަށް ޣައްޒާ ފަންޑަށް ދިވެހީންގެ ފަރާތުން 28،027،420 ރުފިޔާ ލިބިފައިވާ ކަމަށެވެ. އަދި 17,300 ޑޮލަރުވެސް ލިބިފައިވާ ކަމަށް ބުނެފައިވެއެވެ.

މި ފުރުސަތުގައި އައިއޭސީން ވަނީ ދިވެހީންގެ ފަރާތުން ލިބެމުންދާ އެއްބާރުލުމާއި އެހީތެރިކަމަށް ޝުކުރު އަދާކޮށްފައެވެ.

ޣައްޒާގެ ރައްޔިތުންނަށް އެހީތެރިވުމަށް ޓަކައި ދިވެހީން ދަނީ އެކި ކަހަލަ ކަންކަން ރާވާ ހިންގަމުންނެވެ. މިގޮތުން، މާލެ އާއި ރާއްޖެ ތެރޭގައިވެސް، އާއިލީ ހަވީރު ތަކާއި، ޖަންބަލް ސޭލް ތަކާއި، އަދި މިނޫންވެސް ހަރަކާތްތަކާއި، ފަންޑު ފޮށި ބަހައްޓައިގެން އެހީވަނީ ހޯދާފައެވެ. ހަމައެއާއިއެކު ހިނގާލުން ތަކާއި ފޯރަމްތައް މެދުވެރިކޮށް ފަލަސްތީނުގެ ހައްގުގައި އަޑު އުފުލައި ފަލަސްތީނުގެ ހާލަތު މީހުންނަށް ބަޔާން ކޮށްދިނުމުގެ ކަންކަން ވެސް ވަނީ ކުރިއަށް ގެންގޮސްފަ އެވެ.

މިދިޔަ އޮކްޓޫބަރ މަހުގެ 7 ވަނަ ދުވަހު ހައްދުފަހަނައަޅާފައިވާ އިސްރާއީލް ގެ ސިފައިން ފަލަސްތީނަށް ދޭން ފެށި ހަމަލާތައް ހޫނުވެ ފަލަސްތީނުގެ އެތައްހާސް ރައްޔިތުންތަކެއް ވަނީ ޝަހީދުވެފައެވެ. އަދި އެތަކެއް ރައްޔިތުންނެއް ވަނީ ޒަޚަމް ވެފައިއެވެ. މި ހަމަލާތަކާއި އެކު އިސްރާއީލުން ފަލަސްތީނާއި މެދު ދަތިކުރުމުގެ އެތައް ފިޔަވަޅުތަކެއް އަޅާފައި ވާކަން ފާހަގަ ކޮށްލަން ޖެހެއެވެ.