އިޒްރާއިލުން ޣައްޒާގައި ހުންނަ އަލް ފަޚުރާ ސްކޫލަށް ދިން ހަމަލާގައި ބަޔަކު ޝަހީދުވެއްޖެއެވެ.
މިހަމަލާގައި 12 މީހަކު ޝަހީދު ވެފައިވާ ކަމަށާއި، ގިނަ ބަޔަކު ވަނީ ޒަޚަމްވެފައި ކަމަށް ޤުދްސް ނެޓްވޯކުގައި ބުނެފައިވެއެވެ.
އަލް ފަޚުރާ ސްކޫލަކީ ޖަބަލިއްޔާ ރެފިޔުޖީ ކޭމްޕްގެ ހުޅަނގުގައި ހުންނަ އެންމެ ބޮޑު ސްކޫލެވެ. އެސްކޫލް މިވަގުތު ބޭނުން ކުރެވެމުންދަނީ ގެދޮރު ގެއްލިފައިވާ ޣައްޒާގެ މީހުންގެ ބޯހިޔާވަހިކަން ހޯދުމަށެވެ. އަލް ފަޚުރާ ސްކޫލްގައި އެތައް ހާސް ބަޔަކު ދަނީ ބޯހިޔާވަހިކަން ހޯދަމުންނެވެ.
ހަމަލާއަށް ފަހު ފަޚުރާ ސްކޫލްގެ ގޯތި ތެރޭގައި ޣައްޒާގެ ރައްޔިތުން. ފޮޓޯ: ޤުދްސް ނެޓްވޯކް
މީގެ ކުރިންވެސް އިޒްރާއިލުން ވަނީ ޖަބަލިއްޔާ ކޭމްޕަކަށް ގާތްގާތުގައި ތިން ފަހަރަށް ޖަބަލިއްޔާއަށް ހަމަލާދީފައެވެ.
އަލް ފަޚުރާ ސްކޫލަކީ އދ އިން ޖަބަލިއްޔާގައި ހިންގާ ސްކޫލެކެވެ. އދ އިން ބުނެފައިވަނީ އޮކްޓޫބަރު 7 ވަނަ ދުވަހުން ފެށިގެން މިހާތަނަށް އެ ޖަމިއްޔާގެ 50 ޢިމާރާތަކަށް އިޒްރާއިލުން ހަމަލާގެ ސަބަބުން އަސަރުކޮށްފައިވާ ކަަމަށެވެ. އަދި ބައެއް ތަންތަނަށް ސީދާ ހަމަލާތައްވެސް ދީފައި ވާކަމަށެވެ. އޭގެ ތެރޭގައި ޣައްޒާގެ 700،000 ރައްޔިތުން ވަގުތީ ހިޔާވަހިކަން ހޯދަމުންގެންދާ އދ ގެ ޢިމާރާތްތައްވެސް ހިމެނޭކަމަށެވެ.
އދ އިން ބުނެފައިވަނީ އިޒްރާއިލުން ދެމުންދާ ހަމަލާތަކިގެ ސަބަބުން މިހާތަނަށް އދ ގެ 72 މުވައްޒަފަކު ވަނީ މަރުވެފައިކަމަށެވެ.
Advertisement
This content is created and paid for by advertisers and does not involve Voice Journalists
