ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމުގެ ގަރާރާ ގުޅިގެން އުފެދިފައިވާ މައްސަލަތަކުގައި ޖަލްސާތަކުގެ ރިޔާސަތު ބަލަހައްޓަވަން ދެކޮޅު ހައްދަވައި މަޖިލީހުގެ ނައިބު ރައީސް އީވާ އަބްދުالله ދެއްކެވި އުޒުރު މަޖިލީހުގެ އިދާރާ އިން ގަބޫލު ނުކުރާ ކަމަށް ބުނެފި އެވެ.

މިއަދުގެ މަޖިލީހުގެ ޖަލްސާގެ އެޖެންޑާގައިވެސް އޮތީ، ރައީސް ނަޝީދުގެ އިތުބާރު ނެތް ކަމުގެ މައްސަލަ ކުރިއަށް ގެންދިއުމެވެ. މިހާރު އެ މައްސަލަ ކުރިއަށް ގެންދަން މަސައްކަތް ކުރަމުންދާތާ ހަފްތާއެއް ވަނީ އެވެ. 

ނަމަވެސް އެފަދައިން އެޖެންޑާ ކޮށްފައި ވަނިކޮށް ރައްޔިތުންގެ މަޖިލީހަށް އީވާ ރޭ ފޮނުއްވި ސިޓީއެއްގައި ވިދާޅުވީ ނަޝީދު މަޤާމުން ވަކި ކުރުމުގެ މައްސަލާގައި ސުޕްރީމް ކޯޓުން ވަކި ގޮތެއް ނިންމުމުގެ ކުރިން މަޖިލީހުގެ ޖަލްސާތައް ކުރިޔަށް ގެންދިޔުމަށް ރިޔާސަތުގައި އިންނަވަން އޭނާ އުޒުރުވެރިވެވަޑައިގަންނަވާ ކަމަށެވެ.

Advertisement

އީވާގެ އެ ސިޓީއާއި ގުޅިގެން މަޖިލީހުގެ މީޑިއާ އޮފިޝަލް ހަސަން ޒިޔާއު މީޑިއާ ތަކަށް ފޮނުއްވި މެސެޖެއްގައި ވިދާޅުވީ، ނަޝީދުގެ އިތުބާރު ނެތް ކަމުގެ މައްސަލައާއި ގުޅޭ މައްސަލައެއް ސުޕްރީމް ކޯޓުގައި އޮތުމުން ޖަލްސާ ބޭއްވޭނެކަމަށް ގަބޫލުފުޅު ނުކުރައްވާކަމަށް ވިދާޅުވެ އޮކްޓޯބަރ މަހުގެ 31 ވަނަ ދުވަހު އީވާގެ ސިޓީއެއް މަޖިލީހަށް ފޮނުވާފައިވާ ކަމަށެވެ. 

އަދި ހަމަ އެދުވަހު ސުޕްރީމް ކޯޓުގައި މައްސަލަ އޮތަސް ޖަލްސާ ބޭއްވުމަށް ހުރަހެއް ނެތްކަމަށް ބުނެ މަޖިލީހުގެ އިދާރާއިން އީވާއަށް ސިޓީއަކުން ދަންނަވާފައިވާނެ ކަމަށް ޒިޔާއު ވިދާޅުވި އެވެ.

މިއާއެކު ޒިޔާއު ވިދާޅުވީ، 1 ނޮވެމްބަރުން ފެށިގެން މިއަދާ ހަމައަށް ނައިބު ރައީސް ވަނީ ސަލާމް ފޮނުއްވާފައި ކަމަށާ، މިއަދު ސިޓީއަކުން ވިދާޅުވެފައި ވަނީ ސުޕްރީމް ކޯޓުގައި މައްސަލަ އޮތީމަ ރިޔާސަތު ބަލަހައްޓަވަން އުޒުރުވެރިވެވަޑައިގަންނަވާ ކަމަށް ކަމަށެވެ.

އަދި މިއަދު އުޒުރުވެރިވެވަޑައިގަތުމާއެކު ދެން މަޖިލީހުގެ ޖަލްސާއަކަށް އެމައްސަލައެއް އެޖެންޑާއެއް ނުކުރާނެ ކަމަށްވެސް ޒިޔާއު ވަނީ ވިދާޅުވެފަ އެވެ.