ސަރުކާރުގެ ގެދޮރުވެރިޔާ ސްކީމުގެ ދަށުން މިހާރު އިމާރާތް ކުރަމުން އަންނަ 4،000 ފްލެޓު ލިބޭ މީހުންގެ ލިސްޓު އެކުލަވާލި ގޮތާއިމެދު ހިތްހަމަނުޖެހުން ފާޅުކޮށް ގިނަ އަދަދެއްގެ އާއްމުން ހައުސިން މިނިސްޓްރީ ތެރޭގައި އިހްތިޖާޖު ކޮށްފިއެވެ.

ގެދޮރުވެރިޔާ ސްކީމްގެ ދަށުން 4000 ފުލެޓު ލިބުނު މީހުންގެ ނަންތައް އިއުލާން ކުރީ އިއްޔެގެ ވަގުތެއްގައެވެ. އެގޮތުން ކުރީ އިއުލާނުގައި ބުނެފައިވާ ގޮތުން ތިން ކޮޓަރީގެ ފްލެޓްގެ ދާއިމީ ލިސްޓުގައި ހިމެނީ 76 އިން ފެށިގެން މަތިން މާކްސް ލިބިފައިވާ މީހުންނަށް ކަމަށެވެ. އަދި ދެ ކޮޓަރީގެ އެޕާޓްމަންޓްތައް ލިބެނީ 73 އަށް ވުރެ ގިނައިން މާކްސް ލިބުނު މީހުންނަށް ކަމަށެވެ.

އެ މިނިސްޓްރީންގެ އިއުލާނުގައި އިތުރަށް ބުނި ގޮތުގައި، 4،000 ފްލެޓަށް ޝަރުތު ހަމަވި މީހުންނަށް ލިބޭ ފްލެޓުތައް ކަނޑައަޅާނީ ގުރުއަތު ނަގައިގެންނެވެ.

މި ލިސްޓް އިއުލާން ކުރުމާއިއެކު އެތައް ބައެއްގެ ބަޔަކު ސޯޝަލް މީޑިއާގައި ޝަކުވާކޮށް ކަންބޮޑުވުން ފާޅު ކޮށްފައެވެ.

ފުލެޓަށް އެދުނު މީހުންނަށް ޕޮއިންޓް ދީފައި ހުރިގޮތުން ދެކޮޅު ނުޖެހޭ އެތައް ކަމަކާއި ތަފާތުކުރުން ގެންގުޅެފައިވާ ކަމަށް އެތައް ބަޔަކު ވަނީ ބުނެފައެވެ. އަދި ފުލެޓް ލިބުނު މީހުންގެ ހާލަތު ބެލުމަށްވެސް ސަރުކާރުން މާ ބޮޑު މަސައްކަތެއް ކޮށްފައިނުވާ ކަމަށް ގިނަ ބަޔަކު ވަނީ ބުނެފައެވެ. 

އެފަދަ އެތަކެއް ޝަކުވާ ތަކާއި އެކު މިއަދު ހެނދުނުން ފެށިގެން އާއްމުން ވަނީ ޕްލޭނިންގ މިނިސްޓްރީ އަށް ވަދެ އިހްތިޖާޖު ކުރަން ފަށާފައެވެ.

އެމީހުން އިހްތިޖާޖާއި ގުޅިގެން ޕްލޭނިންގ މިނިސްޓްރީގެ ސްޓޭޓް މިނިސްޓަރު އަދި ފްލެޓް ކޮމިޓީގެ ޗެއާރ އަކްރަމް ކަމާލުއްދީން ވާހަކަ ދައްކަވަމުން ވިދާޅުވީ، ފްލެޓް ލިސްޓަށް ޝަކުވާ ހުށަހެޅުމުގެ ފުރުސަތު ހުޅުވާލާފައިވާ ކަމަށެވެ. އަދި އެ ލިސްޓުގައި މާކްސް ދީފައިވާނީ ފްލެޓަށް އެދުނު މީހުން މައުލޫމާތު ދިން ގޮތުގެ މައްޗަށް ބަލާފައި ކަމަށެވެ. އަކްރަމް އެހެން ވިދާޅުވުމުން އެންމެން ވަނީ އަޑު ގަދަކޮށް އޭނާ ވާހަކަ ދެއްކެވިޔަ ނުދީ ހަޅޭ ލަވާފައެވެ.