ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުގެ އިތުބާރު ނެތް ކަމަށް މަޖިލީހަށް ހުށަހެޅިފައިވާ މައްސަލާގައި މެންބަރުން ދެކޭ ގޮތް ބެއްލެވުމަށް، މެންބަރުންގެ ވޯޓު ނެންގެވުމަށް ހުޅުމާލޭ ދާއިރާގެ މެންބަރު ޢަލީ ނިޔާޒު، ދަ ޑިމޮކްރެޓްސް ގެ ފަރާތުން އެދިވަޑައިގެންފިއެވެ. 

ނިޔާޒު މިފަދައިން އެދިވަޑައިގެންނެވީ، ރައީސް ނަޝީދުގެ އިތުބާރު ނެތް ކަމުގެ މައްސަލަ އަލުން މަޖިލީހަށް ވައްދާފައިވަނީ އެމްޑީޕީ މެންބަރުންނަށް ނުފޫޒު ފޯރުވައިގެން، އެ މެންބަރުންގެ ސޮއިހޯދައިގެން ކަމަށް ހުޅުދޫ ދާއިރާގެ ދަ ޑިމޮކްރެޓްސްގެ މެންބަރު އިލްޔާސް ލަބީބު ވިދާޅުވުމާއި ގުޅިގެން އެވާހަކަ ދޮގު ކުރައްވައި ކުރެއްވި ޓުވީޓެއްގައެވެ. 

އެގޮތުން ނިޔާޒް ވިދާޅުވީ، ނަޝީދުގެ އިތުބާރު ނެތް ކަމުގެ މައްސަލަ މަޖިލީހަށް އަލުން ވައްދަން ސޮއިކުރި 49 މެމްބަރުންގެ އިތުރަށް ސޮއިކުރަން، އަދި ވޯޓްދޭން ވެސް ގިނަ މެމްބަރުން ތިބި ކަމަށެވެ.

Advertisement

"ވޯޓަށް ނުފިލާ މެމްބަރުންނަށް ގޮތް ނިންމުނަށް ފުރުސަތު ދެއްވާ. ނަތީޖާ އެނގޭނީ އެއިރުން." ނިޔާޒު ވިދާޅުވި އެވެ. 

ރޭ ސަންގު ޓީވީގެ ޕްރޮގްރާމެއްގައި ވާހަކަދައްކަވަމުން މެންބަރު އިލްޔާސް ވިދާޅުވީ ސޮއި ހޯދުމަށް ޓަކައި މެންބަރުންނަށް އެކިއެކި މަންފާތައް ލިބޭނެ ކަމަށް ބުނެ ކަންކަން ހުށަހަޅަމުން ދިޔަކަމަށެވެ.

"ޚާއްސަކޮށް އެމްޑީޕީ މެންބަރުންނަށް ނުފޫޒު ފޯރުވައިގެން އެކި ގޮތްގޮތަށް މަސައްކަތް ކުރާކަން އަޅުގަނޑުމެންނަށް ހަމަ ސާފުކޮށް މެންބަރުން ވިދާޅުވެފައި އެބަހުރި. އަދި ރައީސް ނަޝީދު އަރިހުގައި ވެސް ބައެއްް ބޭފުޅުން ވިދާޅުވެފައި އެބަހުރި މި ކަހަލަ ވަހަކަތަކެއް. އަޅުގަނޑުމެންނަށް އެބަ އެނގޭ މެންބަރުން ބްލެކްމެއިލްކޮށްގެން މަސައްކަތްކުރާކަން އަދި ބިރުދައްކައިގެން މަސައްކަތް ކުރާކަން،" އިލްޔާސް ވިދާޅުވިއެވެ.

އޭނާ ވިދާޅުވީ އަލުން މައްސަލަ ވައްދައިފައި އޮތީ 'ނާޖާއިޒް' މަގަކުން ނުބައި ނިޔަތެއްގައި ކަމަށެވެ. އެ ކަމަށް އެއްބާރުލުން ދިނުމަކީ ކޮށްގެންވާނެ ކަމެއް ނޫން ކަމަށް ވެސް އިލްޔާސް ވިދާޅުވިއެވެ.