އިޒްރާއިލްގެ ޔަހޫދީން ފަލަސްޠީނުގެ ޣައްޒާއަށް ދެމުންދާ ހަމަލާތައް ޣައްޒާގެ ސިއްޚީ ޚިދްމަތްދޭ ހޮސްޕިޓަލްތަކަށް އަމާޒުކުރަމުންދާ ކަމަށް މީޑިއާ ރިޕޯޓްތައް ބުނެފިއެވެ.

އެގޮތުން ޣައްޒާގެ އުތުރަށް ދެމުންދާ ހަމަލާތައް ވަރުގަދަ ކޮށް ޚާއްސަކޮށް ހޮސްޕިޓަލްތަކަށް ދޭ ހަމަލާތައް ވަނީ ގިނަކޮށްފައެވެ. ރޭ ޣަައްޒާއަށް ދިން ވަރުގަދަ ހަމަލާތަކެއްގައި ޣައްޒާގެ މުވާސަލާތީ ވަޞީލަތްތަކުގެ ގުޅުން ވަނީ ކެނޑިފައެވެ.

ފަލަސްޠީން ސަރުކާރުގެ މީޑީއާ އޮފީހުގެ އިސްވެރިޔާ ސަލާމާ މައުރޫފް އަލްޖަޒީރާއަށް ބުނެފައިވަނީ މެދު ކެނޑުމެއްނެތި އެއް ގަޑިއިރުވަންދެން ހޮސްޕިޓަލްތަކުގެ ކައިރި ސަރަހައްދުތަކަށް ބޮން އަޅައިފައިވާ ކަަމަށެވެ.

ސަލާމާ އަށް ހަވާލާދީ އަލްޖަޒީރާގައި ބުނެފައިވަނީ ޣައްޒާގެ އެންމެ ބޮޑު ހޮސްޕިޓަލް ކަމަށްވާ އަލް ޝިފާ ހޮސްޕިޓަލްގެ ގޯތި ތެރެއަށް އިޒްރާއިލުން ވަރުގަދަ ހަމަލާތަކެއް ދީފައިވާ ކަމަށެެވެ.

ދާރް އަލް ބަލާހް އިން ރިޕޯޓް ކުރި އަލްޖަޒީރާގެ ނޫސްވެރިޔާ ޞަފްވަތް ވިދާޅުވެފައިވަނީ ޣައްޒާގެ މެދުތެރޭގެ ސަރަހައްދުތަކަށް ދިން ހަމަލާތަށް ވެސް ޢާންމު ގޮތެއްގައި އަމާޒު ކޮށްފައިވަނީ ހޮސްޕިޓަލްތަކާއި ކައިރި ހިސާބުތަކަށް ކަމަށެވެ.

ޣައްޒާގެ ހޮސްޕިޓަލް ތަކުގެ ކޮރިޑޯ ތަކުގެ ތެރެއަށް އިޒްރާއިލުން ހަމަލާދެމުން އަންނައިރު ގެދޮރު ގެއްލިފައިވާ ގިނަ ޢަދަދެއްގެ ބަޔަކު ބޯހިޔާ ވަހިކަން ހޯދަމުން އަންނަނީ ހޮސްޕިޓަލް ތަކުގައެވެ.

އިއްޔެގެ ވަގުތެއްގައި އިޒްރާއިލް ސިފައިންވަނީ ޣައްޒާގެ އަލް ޤުދުސް ހޮސްޕިޓަލަށް އަމާޒުކޮށް ވަރުގަދަ ހަމަލާއެއް ދީފައެވެ. މިހަމަލާގެ ސަބަބުން 14 މީހަކަށް އަނިޔާވެ ޢިމާރާތައް ބޮޑެތި ގެއްލުން ތަކެއް ވަނީ ލިބިފައެވެ.

ހޮސްޕިޓަލްތަކަށް އަމާޒުކޮށް ހަމަލާދިނުމަށް ފަހު އިޒްރާއިލްގެ ޔަހޫދީން މިފަހަރުވެސް ބުނެފައިވަނީ ހޮސްޕިޓަލްތަކަށް އަމާޒުކޮށް ހަމަލާދެނީ ހަމާސްގެ ހަނގުރާމަވެރިން މިލިޓަރީ ބޭނުންތަކަށް ހޮސްޕިޓަލްތައް ބޭނުން ކުރާ ކަމަށެވެ. ކުރިންވެސް އިޒްރާއިލުން ކުރި މިފަދަ ތުހުމަތުތައް ހަމާސް ޖަމާޢަތުން ވަނީ ދޮގުކޮށްފައެވެ.

އިޒްރާއިލްގެ މިލިޓަރީގެ ތަރުޖަމާނު ޑެނިއަލް ހަގާރީ ބުނެފައިވަނީ ހަމާސް އިން ވަނީ ހަނގުރާމަ ވެރިންނާއި އެމީހުންގެ ހަތިޔާރުތައް ހޮސްޕިޓަލް ތަކާއި ސްކޫލް ތަކާއި މިސްކިތްތައް ފަދަ ތަންތަނުގަޔާއި އެތަންތަނުގެ އަޑީގަޔާއި އެތަންތަނުގެ ވަށައިގެން ރައްކާ ކޮށްފައި ކަމަށެވެ. އަދި ހަނގުރާމައިގައި ހަމާސް އިން ހިންގާ އެންމެ ބޮޑު ކުށަކީ ހޮސްޕިޓަލްތައް އެމީހުންގެ މަސައްކަތް ތަކަށް ބޭނުން ކުރުން ކަމަށް އޭނާ ބުނެފައިވެއެވެ.

އިޒްރާއިލުން މިފަދަ ވާހަކަތައް ދެއްކި ނަމަވެސް އެކަންކަން އެމީހުންނަށް ސާބިތު ކޮށް ދެވިފައެެއް ނުވެއެވެ.

އިޒްރާއިލްގެ ޔަހީދީން ޣައްޒާގެ ސިއްޚީ ޚިދްމަތް ދޭ ތަންތަނަށް އަމާޒުކޮށް ހަމަލާދެމުން ދާތީ ޑަބްލިޔު.އެޗް. އޯ އިން ވަނީ ކަންބޮޑުވުން ފާޅު ކޮށްފައެވެ.

ރޭވެސް އިޒްރާއިލުން ވަނީ ޣައްޒާގެ ހުޅަނގު ގައި ހުންނަ ކުޑަކުދިންގެ ހޮސްޕިޓަލްގެ ތިންވަނަ ފަންގިފިލާއަށް އަމާޒުކޮށް ހަމަލާއެއް ދީފައެވެ.

މީގެ އިތުރުންވެސް ޣައްޒާގެ އެކި ހޮސްޕިޓަލްތަކުގެ ކައިރި ސަރަހައްދުތަަކަށް އިޒްރާއިލުން ވަނީ ހަމަލާދީފައެވެ.