ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާރުނެތްކަމަށް ކަނޑައަޅައިދިނުމަށް މަޖިލީހަށް ހުށައެޅި މައްސަލަ ކުރިއަށް ގެންދިއުމުގައި ރައްޔިތުންގެ މަޖިލީހުން މަޖިލީހުގެ ގަވާއިދުގެ 205 ވަނަ މާއްދާގެ (ބ) މާނަކޮށްފައިވަނީ ރަނގަޅަށް ނޫންކަމަށް ކަނޑައަޅައިދިނުމަށް ބަންޑާރަނައިބުގެ އޮފީހުން ސުޕްރިމްކޯޓުގައި އެދިއްޖެ އެވެ. 

ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމަށް ހުށަހަޅާފައިވާ މައްސަލަ ކުރިޔަށް ގެންދެވޭނެ ގޮތެއް ހޯދަން އެމް.ޑީ.ޕީއިން ސުޕްރީމް ކޯޓަށް ހުށަހަޅާފައިވާ ދުސްތޫރީ މައްސަލަގެ ފުރަތަމަ އަޑުއެހުމުގައި ބަންޑާރަނާއިބުގެ އޮފީހުގެ ވަކީލު ފާތިމަތު ހަލީމް ވިދާޅުވީ އެ މައްސަލަ އުފެދިފައިވަނީ މަޖިލީހުގެ ރައީސްގެ އިތުބާރު ނެތްކަމުގެ މައްސަލައިގެ ނޯޓިސް ދީފައިވަނިކޮށް މަޖިލީހުގެ ނައިބުރައީސް ވަޑައިނުގަންނަވާތީ ޖަލްސާ ކުރިއަށް ނުގެންގޮސް މަޖިލީހުން ޖަލްސާ ނިންމާލައި، ޖަލްސާ ކުރިއަށް ގެންދަން ފުރުސަތު ނުދިނުމާއި ގުޅިގެންކަމަށެވެ.

ރައްޔިތުންގެ މަޖިލީހުގެ ގަވާއިދުގެ 205 ވަނަ މާއްދާގެ (ބ) ގައި ބުނެފައިވަނީ މަޖިލީހުގެ ރައީސްގެ މަގާމުން ވަކިކުރުމުގެ ގަރާރެއް މަޖިލީހަށް ހުށަހަޅަން ހަމަޖެހިފައިވާ ނުވަތަ ހުށަހެޅިފައިވާ ޖަލްސާއެއްގެ ރިޔާސަތު ބަލަހައްޓާނީ މަޖިލީހުގެ ނާއިބު ރައީސް ކަމަށް މަޖިލީހުން ބުނެފައިވާއިރު، މަޖިލީހުގެ ރައީސްގެ އިތުބާރު ނެތްކަމުގެ ޤަރާރެއް ހުށަހެޅިފައިވާއިރު، އެ ޖަލްސާއެއްގެ ރިޔާސަތު ބެލެހެއްޓޭނީ ހަމައެކަނި ނާއިބްރައީސަށްކަމަށް މަޖިލިސް އިދާރާއިން މާނަކޮށްފައިވާކަމަށެވެ.

Advertisement

އެެހެން ނަމަވެސް އެފަދައިން އެންގިއިރު މަޖިލީހުން ޤަވައިދު މާނަކޮށްފައި އޮތީ ރަނގަޅަށްކަމަށް ޤަބޫލުނުކުރާކަމަށް ބަންޑާރަނައިބުގެ އޮފީހުން ވަނީ ބުނެފައެވެ. އަދި މަޖިލީހުގެ މަސައްކަތްތައް ހުއްޓޭގޮތަށް މަޖިލީހުގެ ޤާނޫނު މާނަކުރުމަކީ ރަނގަޅު މާނަކުރުމެއް ނޫންކަމަށް ބަންޑާރަނައިބުގެ އޮފީހުން ވަނީ ބުނެފައެވެ.

ވަކީލު އިތުރަށް ވިދާޅުވީ، 44 ވަނަ މާއްދާގައި ބުނާ 5 މެންބަރުންނާ ރިޔާސަތު ޙަވާލުކުރުމުގެ އިޖުރާއަތާއެކު ކުރިއަށް ނުދެވޭނެ ސަބަބެއްކަމަށް މަޖިލިސް އިދާރާއިން ދައްކަނީ 205 ވަަަނަ މާއްދާގެ (ބ) ކަމަށެވެ.

އެހެންނަމަވެސް ޙަވާލާ ދެވިފައިވާ ހުރިހާ މާއްދާއެއް އެކުއެކީގައި ކިޔާއިރު، އިތުބާރު ނެތްކަމުގެ މައްސަލައެއް ހުށައަޅާފައި އޮއްވާ އެ މައްސަލަ ކުރިއަށް ނުގެންގޮސް އެހެން މަސައްކަތްތައް ނުކުރެވޭނެކަމަށް އޮންނަނީ އެ މައްސަލަ ވީހާ ވެސް އަވަހަށް ކުރިއަށް ގެންދިއުމުގެ ބޭނުންތެރިކަން ބޮޑުވުމުންކަމަށް ބަންޑާރަ ނައިބުގެ އޮފީހުން ވަނީ ބުނެފައެވެ. އަދި މަޖިލީހުގެ ގަވައިދުގެ 205 ވަނަ މާއްދާގެ (ނ) އާއި (ރ) ގެ ބާރުކެނޑޭ ގޮތަށް (ބ) މާނަ ކުރެވިގެން ނުވާނެކަމަށް ބަންޑާރަ ނައިބުގެ އޮފީހުން ފާހަގަކޮށްފައި ވެއެވެ. 

އެއާއެކު އެ އޮފީހުން އެދުނީ މަޖިލީހުގެ ރައީސްގެ މަގާމުން ވަކިކުރުމުގެ ގަރާރެއް މަޖިލީހަށް ހުށަހަޅަން ހަމަޖެހިފައިވާ ނުވަތަ ހުށަހެޅިފައިވާ ޖަލްސާއެއްގެ ރިޔާސަތު ބަލަހައްޓާނީ މަޖިލީހުގެ ނާއިބު ރައީސްކަމަށް މަޖިލީހުން ނިންމުމުގައި މަޖިލީހުގެ ޤަވާއިދުގެ މާއްދާ މާނަކޮށްފައިވަނީ ރަނގަޅަށް ނޫންކަމަށް ކަނޑައަޅުއްވައިދެއްވުމަށް ސުޕްރިމް ކޯޓުގައި އެދިފައެވެ. 

އޭގެ އިތުރުން މަޖިލީހުގައި ނައިބު ރައީސް ހާޒިރުނުވާ ހާލަތުގައި ޤަވައިދުގެ 44 ވަނަ މާއްދާފައި ބުނާ 5 މެންބަރުންނާ ރިޔާސަތު ޙަވާލުކުރުމުގެ އިޖުރާއަތާއެކު އިތުބާރު ނެތްކަމުގެ މައްސަލަ ކުރިއަށް ގެންދެވޭނެކަމަށް ސުޕްރިމް ކޯޓުން ކަނޑައަޅައިދިނުމަށް ވެސް ބަންޑާރަ ނައިބުގެ އޮފީހުން ވަނީ އެދިފައެވެ.