ފަލަސްޠީނުގެ ޣައްޒާގެ ބޯފެން ދޫކުރާ 7 ފެސިލިޓީއަކަށް ބޮން އަޅައި ހަލާކުކޮށްލައިފައިވާ ކަމަށް އދ އިން ބުނެފިއެވެ.

އދ އިން ބުނެފައިވަނީ ޣައްޒާގެ ރަފާހް ގައި ހުންނަ 2 ފެން ވަޅަކަށާއި، ތިން ސްވޭޖް ޕައިޕްލައިނަކަށާއި ފެން ރައްކާކުރާ ދެ ވަސީލަތަކަށް ހަމަލާދީ ހަލާކުކޮށްލައިފައިވާ ކަމަށެވެ.

ޢައްޒާގެ މުނިސިޕަލްޓީ އިން ވަނީ ޣައްޒާގެ ނަރުދަމާ ނިޒާމް ހުއްޓި ފެން ބޮޑުވެދާނެ ކަމުގެ ބިރު އެބަ އޮތްކަމަށެވެ.

އަލްޖަޒީރާގައި އދ އާއި ހަވާލާދީ ބުނެފައިވަނީ އިޒްރާއިލުން ޣައްޒާއަށް އިކްޓޫބަރު 7ވަނަ ދުވަހު ދޭން ފެށި ހަމަލާތަކިގެ ސަބަބުން ޣައްޒާގައި ހަރަކާތް ތެރިވާ އދ ގެ 88 މުވައްޒަފަކު މަރުވެފައިވާ ކަމަށެވެ.

އިޒްރާއިލްގެ ހަމަލާތަކުގެ ސަބަބުން މިހާތަނަށް ޣައްޒާއިން 9922 މީހަކު ވަނީ ޝަހީދުވެފައެވެ.

ޔޫއެން އާއި އިންސާނީ ހައްޤުތަކަށް މަސައްކަތް ކުރާ ބައިނަލް އަޤްވާމީ 18 ޖަމިއްޔާއެއް ގުޅިގެން ިނެރުނު “ޖޮއިންޓް ސްޓޭޓްމަންޓް” އެއްގައި ގޮވައިލައިފައިވަނީ ވަގުތުން ވަގުތައް ހަމަލާތައް ހުއްޓައިލުމަށެވެ. އަދި މިހާރުން މިހާރަށް ހަމަލާތައް ހުއްޓައިލުމަށާއި ހަނގުރާމައިގެެ އަނިޔާވެރިކަން ފުދިއްޖެ ކަމަށެވެ.

އިންސާނީ ހައްޤުތަކަށް މަސައްކަތް ކުރާ ފަރާތްތަކުން މިފަދައިން ގޮވާލި ކަމުގައި ވިޔަސް އިޒްރާއިލުން އެފަދަ ޖަމިއްޔާތަކުގެ ގޮވާލުން ތަކަށް ދެމުން ގެންދަނީ ބީރު ކަންފަތެކެވެ. އިޒްރާއިލްގެ އެއް ވާގިވެރިޔާ ކަމަށްވާ އިނގިރޭސި ވިލާތުގެ ސަރިުކާރުގެ ފަރަރުން އިއްޔެ ވަނީ ފަލަސްޠީނުގެ ރައީސް މަހްމޫދް އައްބާސް އާއި ބައްދަލު ކޮށްފައެވެ. މިބައްދަލު ވުމުގައިވެސް އިނގިރޭސި ވިލާތުން ހަމަލާތައް ހުއްޓާލުމަށް ގޮވާލާ ކަމުގެ އިޝާރާތެއްވެސް ކޮށްފައި ނުވެއެވެ.