ހައްދުފަހަނައަޅާފައިވާ އިޒްރާއިލްގެ ސިފައިން ފަލަސްތީނުގެ ހުޅަނގު އައްސޭރިން 50 މީހުން ހައްޔަރުކޮށްފިއެވެ.

އިޒްރާއިލުން ފަލަސްޠީނުގެ ޣައްޒާގައި ހިންގަމުން އަންނަ ޤަޠުލް ޢާންމު ތަކާއި އެކު ފަލަސްޠީނުގެ ހުޅަނގު އައްސޭރީގައިވެސް އަންނަނީ ބޮޑެތި ޖަރީމާތައް ހިންގަމުން ކަމަށް ބައިނަލް އަޤްވާމީ މީޑިއާ ތަކުން ދަނީ ރިޕޯޓް ކުރަމުންނެވެ. 

އެގޮތުން ހުޅަނގު އައްސޭރިން 50 މީހުން ހައްޔަރު ކޮށްފައިވާ އިރު، އޭގެ ތެރޭގައި ފަލަސްޠީނުގެ މިނިވަން ކަމަށް ގޮވައިލާ މަސައްކަތް ކުރާ އެކްޓިވިސްޓެއް ކަމަށްވާ އަހެދް ތަމީމީ ވަނީ ހައްޔަރުކޮށްފައެވެ. އަހެދް ހައްޔަރުކޮށްފައިވަނީ އަލް ނަބީލް ޞަލާހް އަވަށުންނެވެ.

Advertisement

އިޒްރާއިލުން އަހެދް ހައްޔަރު ކުރި ސަބަބެއް ކަމަށް ބުނެފައިވަނީ ނިރުބަވެރި ކަމަށް ހިތްވަރު ދިނުމެވެ. އަހެދް ތަމީމީ ދުނިޔެއަށް މަޝްހޫރު ވެފައިވަނީ 2012 ވަނަ އަހަރު އިޒްރާއިލް ސިފައިން އަހެދްގެ ބޭބެ ހައްޔަރު ކުރުމުން އޭނާ އިޒްރާއިލް ސިފައިންނާއި ކުރިމަތިލީ ވީޑިއޯ ތަކެއް ޢާންމު ވުމުންނެވެ.

އޭގެ ފަހުން 2017 ވަނަ އަހަރު އިޒްރާއިލް ސިފައިންގެ ދެމީހެއްގެ މޫނުގައި ޖަހާ މަންޒަރު ދައްކުވައިދޭ މަންޒަރު ފެންނަ ވީޑިއޯ އެއް އާންމު ވުމަށް ފަހު އަހެދް ތަމީމީ ވަނީ ހައްޔަރު ކޮށްފައެވެ.

މީގެ ހަފްތާއެއްހާ ދުވަސް ކުރިން އަހެދް ތަމީމީގެ ބައްޕަ ބައްސާމް ތަމީމީ ވެސް ވަނީ އިޒްރާއިލް ސިފައިން ހައްޔަރު ކޮށްފައިވެއެވެ.

މީގެ އިތުރުން އިޒްރާއިލް ސިފައިންވަނީ ހުޅަނގުއައްސޭރީގެ ތުއްބަސް އަވަށުން ސުމައްޔާ ޖަވާބިރާ ނަމަކަށް ކިޔާ ނޫސްވެރިޔަކު ވެސް ހައްޔަރު ކޮށްފައެވެ.

ނޫސްވެރިޔާ ސުމައްޔާ އަކީ ތިން ކުދިންގެ މަންމަ އެކެވެ. އަދި އޭނާ މިހާރު ހުރީ މާބަނޑު ހާލަތުގައެވެ. ޤުދްސް ނެޓްވޯކް ގައި ބުނެފައިވަނީ ސުމައްޔާގެ ބަނޑަށް މިހާރު 7 މަސް ކަމަށެވެ.