ފަލަސްޠީނުގެ ޣައްޒާގެ މެދު ތެރޭގައި އޮންނަ ދެއިރް އަލް ބަލަހް އަދި އަލް ޒަވައިދާ އަށް ދިން ހަމަލާތަކެއްގައި 45 މީހަކު ޝަހީދު ކޮށްލައިފިއެވެ.

އަލް ޖަޒީރާގައި ބުނެފައިވަނީ އެ ދެސަރަހައްދަށް ދިން ހަމަލާ ތަކުގައި 45 މީހަކު ޝަހީދު ވެފައިވާއިރު ގިނަ ޢަދެދެއްގެ ބަޔަކު ވަނީ ވެއްޓިފައިވާ އިމާރާތް ތަކުގެ ދަށުގައި ތާށިވެފައި ކަމަށެވެ.

ރޭވެސް އިޒްރާއިލުން ވަނީ ހުއްޓުމެއް ނެތި ޣައްޒާގެ އެކި ސަރަހައްދުތަކަށް ބޮން އަޅައިފައެވެ. ރޭ އިޒްރާއިލުން ދިން ވަރުގަދަ ހަމަލާތަކާއި އެކު ޣައްޒާގެ މުވާސަލާތީ ވަސީލަތް ތަކުގެ ޚިދްމަތް އެކުއެކީ ކެނޑިގެން ދިޔައެވެ. ނަމަވެސް މިހާރު އެ ޚިދްމަތުގެ ކަންކަން މިހާރު އަންނަނީ މަޑުމަޑުން ރަނގަޅު ކުރެވެމުން ކަމަށް އަލްޖަޒީރާގައި ވަނީ ބުނެފައެވެ.

Advertisement

އދ ގެ ކުދަކުދިންގެ ހައްޤުތަކާއި ބެހޭ އެޖެންސީ އާއި ހަވާލާދީ އަލްޖަޒީރާގައި ބުނެފައިވަނީ ޣައްޒާގައި ތިބި ކުޑަކުދިން ތިބީ ޣައްޒާގައި މިހާރު ހިނގަމުންދާ ގެއްލުންދެނިވި ހަމަލާތަކުގެ ސަބަބުން ވަރަށް ނަފްސާނީ ގޮތުން އަސަރު ކޮށްފައި ކަމަށެވެ.

އަލްޖަޒީރާއަށް މައުލޫމާތު ދިން ޔުނިސެފްގެ ތަރުޖަމާނު ޓޮބީ ފްރިކަރ ބުނެފައިވަނީ ޣައްޒާގައި މަސައްކަތް ކުރާ ޔުނިސެފްގެ ސްޓާފެއްގެ ދަރިއެއްގެ ނަފްސާނީ ހާލަތު ދަށްވެ އަމިއްލަ ހަށިގަނޑަށް ގެއްލުންދޭން ފަށައިފައިވާ ކަމަށެވެ.

އޮކްޓޫބަރު 7 ވަނަ ދުވަހު އިޒްރާއިލުން ދޭން ފެށި ހަމަލާތަކުގެ ސަބަބުން މިހާތަނަށް 4000 އަށްވުރެ ގިނަ ކުދިން ވަނީ ޝަހީދު ވެފައެވެ. އަދި 1270 ކުދިން ވެއްޓިފައިވާ ޢިމާރާތް ތަކުގެ ދަށުގައި ތާށިވެ ނުނެގިފައިވާ ކަމަށެވެ.