ޣައްޒާގެ ނައްސިރް މެޑިކަލް ކޮމްޕްލެކްސް އަށް އަމާޒުކޮށް ދިން ހަމަލާއެއްގައި 8 މީހަކު ޝަހީދު ކޮށްލައިފިއެވެ.

އަލްޖަޒީރާގައި ބުނެފައިވަނީ އާދީއްތަ ދުވަހު ދިން ވަރުގަދަ ހަމަލާއާއި އެކު ކަރަންޓާއި، މުވާސަލާތީ ގުޅުންތައް ކެނޑުނު ހަމަލާއަށް ފަހު، ހަތަރު ހޮސްޕިޓަލެއް ހުންނަ ނައްސިރް މެޑިކަލް ކޮމްޕްލެކްސްއަށް ހަމަލާދީފައިވާ ކަމަށެވެ.

ފަލަސްޠީނުގެ ހެލްތް މިނިސްޓްރީއާއި ހަވަލާދީ އަލްޖަޒީރާގައި ބުނެފައިވަނީ ނައްސިރް އަށް ދިން ހަމަލާގައި 8 މީހަކު ޝަހީދުވެ ގިނަ ޢަދަދެއްެގެ ބަޔަކު ވަނީ ޒަޚަމްވެފައި ކަމަށެވެ.

އިޒްރާއިލުން ހަމަލާދިން ނައްސިރް މެޑިކަލް ކޮމްޕްލެކްސް ގައި އަލް ނައްސިރް ކުޑަކުދިންގެ ހޮސްޕިޓަލާއި، ރަންތިސީ ސްޕެޝަލައިޒްޑް ހޮސްޕިޓަލާއި، އައި ހޮސްޕިޓަލް އަދި ސައިކިއާޓްރިކްޓް ހޮސްޕިޓަލެވެ.

ރަންތީސީ ހޮސްޕިޓަލްގެ ޑޮކްޓަރަކު އަލްޖަޒީރާގައި ވިދާޅުވެފައިވަނީ އިޒްރާއިލުގެ މިލިޓަރީ އިން އެހޮސްޕިޓަލްގެ ބައެއް ޑޮކްޓަރުންނަށް ގުޅައި ހޮސްޕިޓަލްގައި އަލިފާން ރޯކޮށްލާނެ ކަމުގެ އިންޒާރު ދިން ކަމަށެވެ.

ފަލަސްޠީނުގެ ގަޑިން 6:30 ގައި ރަންތީސީ ހޮސްޕިޓަލާއި ސައިކިއާޓްރިކްޓް ހޮސްޕިޓަލާއި ދެމެދުގައި ވާ ސަރަހައްދަށް ހަމަލާއެއް ދިން ކަމަށާއި، އެހަމަލާގައި 35 މީހަކު ވަނީ ޒަޚަމްވެފައި ކަމަށެވެ. އަދި އޭގެ ތެރޭގައި ބައެއް މެޑިކަލް ސްޓާފުންވެސް ހިމެނެއެވެ.

އޭގެ ދެގަޑިއިރު ފަހުން ރަންތީސީ ހޮސްޕިޓަލްގެ އުތުރާއި ދެކުނުންވެސް ހަމަލާދީފައިވާ ކަމަށް އަލްޖަޒީރާގައި ބުނެފައިވެއެވެ.

އަލްޖަޒީރާގަައި ރަންތީސީ ހޮސްޕިޓަލްގެ ޑޮކްޓަރަކާއި ހަވާލާދީ ބުނެފައިވަނީ އިރު އުތުރު ފަރާތުގައި ކުޑަކުދިންގެ ކެންސަރ ވާޑް ހުންނަ ކަމަށާއި ހަމަލާދިން ވަގުތު 30 ކުއްޖެއްގެ ކީމޯތެރަޕީ ސެޝަންތައް ކުރިއަށް ދިޔަކަމަށެވެ.

ނައްސިރަށް ދިން ތިންވަނަ ހަމަލާ އަމާޒުކޮށްފައިވަނީ އެހޮސްޕިޓަލްގެ އެމްބުޔުލާންސް ތަކާއި އެހެނިހެން ވެހިކަލް ތައް ހުރި ގްރައުންޑް ފްލޯ އަށް ކަމަށާއި އަދި އެތަނަކީ ގެދޮރު ގެއްލިފައި ތިބި އެތައް ބަޔަކު ބޯހިޔާވަހިކަން ހޯދަމުން ދިޔަ ތަނެއް ކަމަށްވެސް އަލް ޖަޒީރާގައި ބުނެފައިވެއެވެ.

ރަންތީސީ ހޮސްޕިޓަލްގެ ގްރައުންޑް ފްލޯގައި ހާލުގައި ޖެހިފައިތިބި ޣައްޒާގެ ރައްޔިތުން. ފޮޓޯ:އަލްޖަޒީރާ

“އަހަރެމެންގެ މިހޮސްޕިޓަލުގައި 80 އާއި 100 އާއި ދެމެދުގެ ޢަދަދަކަށް ބަލިމީހުން އެބަތިބި، 700 އެއްހާ ޢާއިލާ ވަގުތީ ހިޔާ ހޯދަމުން އެބަދޭ، އެއީ ގާތް ގަނޑަކަށް 5000 އެއްހާ މީހުން، މީގެ އިތިުރުން ހޮސްޕިޓަލުގެ ފެން ރައްކާކުރާ ޓޭންކަށާއި ސޯލަރ ޕެނަލް ތަކަށްވެސް ވަނީ ހަމަލާދީފަ، އޭގެ މާނައަކީ މިހާރު ހޮސްޕިޓަލުގެ ފެނުގެ ނިޒާމް ވަނީ ހުއްޓިފައޭ” ރަންތީސީ ހޮސްޕިޓަލުގެ ޑޮކްޓަރަކު އަލްޖަޒީރާއަށް ކިޔައިދީފައިވެއެވެ.