ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމަށް ހުށަހަޅާފައިވާ މައްސަލަ ކުރިއަށް ގެންދިއުމަށް ޤާނޫނު އިސްލާހުކުރުމާއި ގުޅޭގޮތުން މަޖިލީހުގެ ވިސްނުމާއި އެ މައްސަލަ ހުށައެޅި މަޖިލީހުގެ މެޖޯރިޓީ ޕާޓީ އެމްޑީޕީން ޚިޔާލު ތަފާތުވެ ބަހުސްކޮށްފި އެވެ. 

ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމަށް ހުށަހަޅާފައިވާ މައްސަލަ ކުރިޔަށް ގެންދެވޭނެ ގޮތެއް ހޯދަން އެމް.ޑީ.ޕީއިން ސުޕްރީމް ކޯޓަށް ހުށަހަޅާފައިވާ ދުސްތޫރީ މައްސަލައިގެ މިއަދުގެ އަޑުއެހުމުގައި މަޖިލީހުގެ އަމީންއާންމު އާމިނަތު ނިއުޝާ ވަނީ ނަޝީދުގެ މައްސަލަ ޤާނޫނު އިސްލާހުކޮށްގެން ކުރިއަށް ގެންދެވޭނެ 4 ގޮތެއް ހުށައަޅާފަ އެވެ.

1. މަޖިލީހުގެ ގަވާއިދުގެ 108 ވަނަ މާއްދާގެ (ށ) ދަށުން މަޖިލީހުގެ އާންމު ކޮމިޓީގެ އަމިއްލަ އިސްނެންގެވުމުގެ މަތިން ގަވާއިދަށް ގެންނަ އިސްލާހެއް ނިންމައި މަޖިލީހުގެ ތަޅުމަށް ހުށަހެޅުން

2. މަޖިލީހުގެ ގަވާއިދުގެ 167 ވަނަ މާއްދާގެ ދަށުން މަޖިލީހުގެ ހިންގުމުގެ އުސޫލަށް ބަދަލު ގެނައުމަށް އާންމު މެމްބަރަކު ގަރާރެއް ހުށަހެޅުން

3. މަޖިލީހުގެ ގަވާއިދުގެ 249 މާއްދާގެ (ށ)ގެ ދަށުން ގަވާއިދަށް ގެންނަން ފެންނަ އިސްލާހު މައްސަލައެއްގެ ގޮތުގައި ހުށަހެޅުން؛ މިހާރު ވެސް އެފަދަ މައްސަލައެއް އޮތްކަމާއި އެ މައްސަލަ އެޖެންޑާކުރަން އަންގާފައިވާނެ ކަމަށް ވިދާޅުވި

4. ގަވާއިދުގެ 205 މާއްދާގައި މިހާލަތުގައި އަމަލުކުރާނެ ގޮތެއް ނެތަތީ، އެކަމާ މެދު އަމަލުކުރާނެ ގޮތަކާ މެދު ރައްޔިތުންގެ މަޖިލީހުން ގޮތެއް ނިންމުން

ރައްޔިތުންގެ މަޖިލީހުގެ އަމީންއާންމު ނިއުޝާ ވިދާޅުވީ ނަޝީދުގެ މައްސަލައެއް އޮތުމުން މަޖިލީހުގައި އިތުރުކަމެއް ނުކުރެވޭނެކަމަށް ބުނާ ބުނުމާއި އެއްބަސްވެނުލައްވާ ކަމަށެވެ. 

ޤަވައިދު ބުނާ ގޮތުން މައްސަލައެއް ހުށައެޅުންކަމަށް ވާނީ މަޖިލީހުގެ ގާނޫނީ ޖަލްސާއަކަށް މައްސަލަ ހުށައެޅުމުން ކަމަށާއި، ނަޝީދުގެ އިތުބާރުނެތްކަމުގެ މައްސަލައިގެ ގަރާރު އަދި އެފަދަ ޖަލްސާއަކަށް ހުށައަޅާފައި ނުވާތީ މަޖިލީހުގެ އާންމު ޖަލްސާތައް ބޭއްވުމާއި އެހެން މަސައްކަތްތައް ކުރުމަށް އެއްވެސް ހުރަހެއް ނެތްކަމަށް ނިއުޝާ ވިދާޅުވި އެވެ. 

އެހެންކަމުން ޤާނޫނު އިސްލާހުކޮށްގެން މަޖިލީހުގެ ތެރެއިން އެ މައްސަލަ ޙައްލުކުރެވޭނެކަމަށް އަމީންއާންމު ނިއުޝާ ވިދާޅުވި އެވެ. 

ނިއުޝާ މިފަދައިން ވިދާޅުވި ނަމަވެސް ނަޝީދުގެ އިތުބާރު ނެތްކަމުގެ މައްސަލަ ހުށައެޅި އެމްޑީޕީން ބުނެފައިވަނީ މިހާރު މަޖިލީހުގެ ހާލަލު އޮތް ގޮތުން ގަވައިދު އިސްލާހުކޮށްގެން އެ މަސައްކަތް ކުރުމަކީ ކުރެވޭނެކަމެއް ނޫން ކަމަށެވެ. 

އެ މައްސަލައިގައި ސުޕްރިމް ކޯޓުގައި ވާހަކަދައްކަވަމުން އެމްޑީޕީގެ ވަކީލު ވިދާޅުވީ މީގެ ކުރިންވެސް ދެ ގަރާރެއްގެ މައްސަލަ ކުރިއަށް ނުގެންދެވި މަޖިލީހުގެ ގަވާއިދު ވެސް އިސްލާހު ކުރުމުގެ މަސައްކަތް ކުރިއަށް ނުގެންދެވުނީ ނަޝީދުގެ އިތުބާރު ނެތްކަމުގެ މައްސަލައިގައި މަސްލަހަތު އޮންނަ ފަރާތެއްގެ ނުފޫޒު އިންތިހާއަށް ފޯރުވަމުންދާތީކަމަށް އެމްޑީޕީގެ ޕާލަމެންޓްރީ ގުރޫޕުން މައުލޫމާތުދޭ ކަމަށެވެ. 

މަޖިލީހުގެ ހާލަތު މިހާރު އޮތް ގޮތުން ގަވައިދު އިސްލާހުކުރުމަކީ ވާނެކަމެއްކަމަށް ފެނިވަޑައިނުގަންނަވާ ކަމަށާއި، އަދި މިފަދަ މައްސަލަތަކަކީ ދޫކޮށްލައިގެން ތިބެވޭވަރަށްވުރެ މާ ހައްސާސް މައްސަލަތަކެއް ކަމުން، ކޯޓުން މިކަމުގައި ކުރިއަށް ގެންދާނެ ގޮތެއް ކަނޑައަޅައިދިނުން މުހިންމު ކަމަށް ވެސް އެމްޑީޕީގެ ވަކީލު ވިދާޅުވި އެވެ. 

ނަޝީދު ވަކިކުރުމާއި ގުޅޭގޮތުން ސުޕްރިމް ކޯޓަށް ހުށައަޅާފައި ދުސްތޫރީ މައްސަލައަށް ޕީޕީއެމާއި ދަ ޑިމޮކްރެޓސްއިން ވެސް ތަދައްޚުލްވެފައިވާއިރު ދަ ޑިމޮކްރެޓްސްއިން ބުނެފައިވަނީ ސުޕްރިމް ކޯޓަށް އެ މައްސަލަ ހުށައެޅުމުގެ ބަދަލުގައި އެއީ މަޖިލީސް ތެރެއިން ޙައްލުކުރެވޭނެ ކަމެއް ކަމަށެވެ. 

އެހެން ނަމަވެސް އެމްޑީޕީ އާއި މަޖިލިސް ތަމްސީލުކުރައްވާ ބަންޑާރަ ނައިބުގެ އޮފީހުން އަދި މި މައްސަލައަށް ތަދައްހުލްވެފައިވާ ޕީޕީއެމް-ޕީއެންސީން ވެސް އެދުނީ ސުޕްރިމް ކޯޓުން އެ މައްސަލައަށް ޙައްލު ހޯއްދަވާދެއްވުމަށެވެ.