ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމަށް ހުށަހަޅާފައިވާ މައްސަލަ ކުރިޔަށް ގެންދެވޭނެ ގޮތެއް ހޯދަން އެމް.ޑީ.ޕީއިން ސުޕްރީމް ކޯޓަށް ހުށަހަޅާފައިވާ ދުސްތޫރީ މައްސަލައަކީ އެ ކޯޓަށް ބެލޭނެ މައްސަލައެއް ނޫންކަމަށް އެ މައްސަލައަށް ތަދައްޚުލްވެފައިވާ ދަ ޑިމޮކްރެޓްސްއިން ބުނެފި އެވެ. 

ނަޝީދުގެ މައްސަލައިގެ ފުރަތަމަ އަޑުއެހުން ހޯމަ ދުވަހު ބާއްވާފައިވާއިރު، ދަ ޑިމޮކްރެޓްސްގެ އެދުމަށް، އެ ޕާޓީއަށް ތައްޔާރުވުމަށް އިތުރު ވަގުތު ދިނުމުގެ ގޮތުން ސުޕްރިމް ކޯޓުން ވަނީ މިއަދަށް އަޑުއެހުމެއް ބާއްވާފައެވެ. 

މިއަދުގެ އަޑުއެހުމުގައި އެ މައްސަލައަށް ވަކާލާތު ކުރަމުން ދަ ޑިމޮކްރެޓްސްގެ ޤާނޫނީ ވަކީލު ވިދާޅުވީ ނަޝީދުގެ އިތުބާރުނެތްކަމަށް ހުށައަޅާފައިވާ މައްސަލައާއި ގުޅިގެން އެމްޑީޕީން ސުޕްރިމް ކޯޓަށް ދުސްތޫރީ މައްސަލައެއް ހުށައެޅީ ޤާނޫނު އަސާސީގެ 95 ވަނަ މާއްދާއާއި، އަދި އިޖުރާއަތްތަކާއި ވެސް ޚިލާފަށް ކަމަށެވެ.

އެގޮތުން ޤާނޫނު އަސާސީގެ 88 ވަނަ މާއްދާ އަދި 95 ވަނަ މާއްދައަށް ރިއާޔަތްކުރާއިރު ސުޕްރީމް ކޯޓަށް މައްސަލަ ބެލުމުގެ އަސްލީ އިހްތިސޯސް ލިބިގެން ނުވާކަމަށް ވަކީލު ވިދާޅުވި އެވެ. 

އެކަން އިތުރަށް ތަފްސީލުކޮށްދެމުން ދަ ޑިމޮކްރެޓްސްގެ ވަކީލު ވިދާޅުވީ ގާނޫނު އަސާސީގައި އެހެން ގޮތަކަށް ބަޔާން ކޮށްފައިނުވާހާ ހިނދަކު ރައްޔިތުންގެ މަޖިލިހުގައި ހިނގާކަމެއްގެ ސައްހަކަން ކަށަވަރުކުރުމަށްޓަކާ މައްސަލައެއް ކޯޓަށް ހުށަނޭޅޭނެކަން ގާނޫނު އަސާސީގެ 88 ވަނަ މާއްދާއިން އެގެން އޮތް ކަމަށެވެ.

އެހެންކަމަނުން އެމްޑީޕީން ކޯޓަށް ހުށައަޅާފައިވާ ނަޝީދުގެ މައްސަލައަކީ އެމައްސަލަ ބެލުމުގެ އިހުތިސާސް ސުޕްރިމް ކޯޓަށް ލިބިގެންވާ މައްސަލައެއް ނޫން ކަމަށެވެ.

ދަ ޑިމޮކްރެޓްސްގެ ފަރާތުން ވަނީ އެ މައްސަލައިގައި މަޖިލީހުން ހުށައަޅާފައިވާ ކަންކަމަށް ތާއީދުކޮށްފަ އެވެ. 

އެގޮތުން ނަޝީދުގެ އިތުބާރު ނެތްކަމުގެ މައްސަލަ އޮތުމަކީ މަޖިލީހުގެ މަސައްކަތްތައް ހުއްޓިގެންދާނެ ކަމެއް ނޫން ކަމަށާއި، މަޖިލީހުގައި ކުރަން ހުރި މުހިންމު މަސައްކަތްތައް ކުރިއަށް ގެންދެވޭނެކަމަށް އޭނާ ވިދާޅުވި އެވެ. 

ޑިމޮކްރެޓްސްގެ ފަރާތުން އިތުރަށް ބުނީ މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ހުށައަޅާ ޖަލްސާއެއްގެ ރިޔާސަތު ބަލަހައްޓަވަންވާނީ ނައިބު ރައީސްކަމަށް ކަނޑައަޅާފައިވަނީ ޚާއްސަ ހާލަތެއްވުމުންކަމަށެވެ. 

އެއާއެކު ސުޕްރިމް ކޯޓުގެ ފަނޑިޔާރު ހުސްނުއްސުއޫދު ވަނީ އެ ޚާއްސަ ހާލަތަކަށްވާ ގޮތަކީ ކޮބައިތޯ އައްސަވާ ސުވާލުކުރައްވާފަ އެވެ. 

އެ ސުވާލުގެ ޖަވާބުދެއްވަމުން ޑިމޮކްރެޓްސްއިންގެ އިންޓެރިމް ޗެއާޕާސަން އަދި ގާނޫނީ ވަކީލު ހަސަން ލަތީފު ވިދާޅުވީ މަޖިލީހުގެ ރައީސަށް ލިބިގެންވާ ހުރިހާ ބާރުތަކެއް ނައިބު ރައީސަށް ވެސް ލިބިގެންވާ ކަމަށެވެ. އަދި އެއީ މަޖިލީހުގެ ކޮންމެ ކޮންމެ މެމްބަރަކަށް ލިބިގެންވާ ބާރުތަކެއް ނޫން ކަމަށާއި، 205 ވަނަ މާއްދާގައި ބަޔާންކޮށްފައި އެ ވަނީ ހާއްސަ އިޖުރާއަތެއްކަން އެކަމުން ހާމަވެގެންދާކަމަށް ހަސަން ލަތީފު ވިދާޅުވި އެވެ. 

ސުޕްރިމް ކޯޓުން ވަނީ ނަޝީދުގެ އިތުބާރުނެތްކަމުގެ މައްސަލަ ކުރިއަށް ގެންދަންވީ ގޮތެއް ކަނޑައަޅާދިނުމަށް އެދި އެމްޑީޕީން ހުށައަޅާފައިވާ ދުސްތޫރީ މައްސަލައިގެ އަޑުއެހުންތައް މިއަދު ނިންމާލާފަ އެވެ. އަދި ކޯޓުން ވަނީ އެ މައްސަލަ ވީ އެންމެ އަވަހަކަށް ނިންމުމަށް މަސައްކަތް ކުރާނެކަމަށް ބުނެފައެވެ.