މިދިޔަ ސެޕްޓެމްބަރު މަހު މަސް ކިލޯއެއްގެ އަގު 25ރ. އަށް ބޮޑުކުރުމަށް ނިންމައި ގެނެވުނު ބަދަލު ދެކޮޅު ނުޖެހޭ ކަމަށްބުނެ އެ އަގުތައް ރިވިއު ކުރުމަށް ފިނޭންސް މިނސިްޓްރީއާއި ސަރުކާރުގެ އިދާރާތަކާއެކު މަޝްވަރާ ކުރެވެމުން އަންނަކަން މިފްކޯއިން ހަމަކޮށްފިއެވެ. 

މިފްކޯގެ މެނޭޖިން ޑިރެކްޓަރު އިސްމާއިލް ފައުޒީ އާއި ހަވާލާދީ އޮންލައިން ނޫސް 'މިހާރު' ގައި ބުނެފައިވާ ގޮތުން، މަސް ކިލޯއެއް ގަންނަ އަގު 25 ރުފިޔާއަށް ބޮޑުކުރި ނަމަވެސް މާކެޓުގެ އަގު ހުރި ގޮތުން މި ވަގުތު އަގު ހުންނަން ޖެހޭނީ 20 ރުފިޔައަށް ވުރެ ވެސް ދަށް އަގެއްގައެވެ. އެހެން ނޫން ނަމަ އެކުންފުނީގެ ހަރަދުތައް ހަމަޖައްސަން ވަރަށް ބޮޑަށް ދަތިވާނެ ކަމަށާއި މިހާރުވެސް އެ ކުންފުނީގެ އޮޕްރޭޝަން ދަނީ ވަރަށް ދަށްކޮށް ކަމުގައި ފައުޒީ ވިދާޅުވި ކަމަށް އެ ނޫހުގައި ވެއެވެ. 

ވުމާއެކު މިހާރު އެ އަގު ރިވިއު ކުރުމަށްޓަކައި ފިނޭންސް މިނސިްޓްރީއާއި ސަރުކާރުގެ އިދާރާތަކާއެކު މަޝްވަރާ ކުރެވެމުން އަންނަކަމުގައި ފައުޒީ ވަނީ ވިދާޅުވެފައެވެ. 

މީގެ އިތުރުން، ސަރުކާރުގެ އެހީތެރިކަމާ އެކު ނޫން ގޮތަކަށް ކުންފުނި މިވަގުތު ކުރިއަށް ނުގެންދެވޭނެ ކަމަށާއި މަސްވެރިންގެ ބިލްތަކަށް ފައިސާ ދިނުން ލަސްވަނީ ވެސް، އަގު އެހާ ބޮޑު ކުރުމުން ކުރިމަތިވި ތާށިކަމާ ހެދި ކަމަށްވެސް ފައުޒީ ވިދާޅުވި ކަމަށް އެ ނޫހުގައި ވެއެވެ.

މިއަހަރަށް ދައުލަތުގެ ބަޖެޓުން ވަނީ 250 މިލިއަން ރުފިޔާ މިފްކޯއަށް ދޭން ކަނޑައަޅައިފައެވެ. އެކަމަކު މަސް ކިލޯއެއް 25ރ. އަށް ބޮޑު ކުރުމުން ހަރަދު ދެގުނައަސް ބޮޑުވާނެ ކަމަށް އަންދާޒާ ކުރެވެއެވެ. 

މަސްވެރިން މަސް ގަންނަ އަގު 17ރ. އިން 25ރ. އަށް ބޮޑުކުރީ، އިންތިހާބަށް ކުޑަ ދުވަސްކޮޅަކަށް ވެފައި އޮއްވައެވެ. ސަރުކާރުން އޭރު ބުނީ، އެގޮތަށް ނިންމީ، ޔޫރަޕްގެ މާކެޓަށް ވިއްކާ މަހުން ނަގާ 22 ޕަސެންޓް ކަނޑާލަން ކުރާ މަޝްވަރާތައް ވަރަށް ޕޮޒިޓިވްކޮށް ކުރިއަށްދާތީ ކަމަށާއި އެކަން އެގޮތަށް ވަރަށް އަވަހަށް ހަމަޖެހޭނެ ކަމަށެވެ.