މިނިވަން އެކިއެކި މުއައްސަސާތަކަށް ކުރިމަތިވެފައިވާ އެންމެ ބޮޑު ގޮންޖެހުމަކީ ބަޖެޓުގެ ދަތިކަން ކަމަށް އިންތިހާބީ ރައީސްގެ ތަރުޖަމާނު މުހައްމަދު ފިރުޒުލް ވިދާޅުވެއްޖެއެވެ.

އިންތިޚާބީ ރައީސުލްޖުމްހޫރިއްޔާގެ އޮފީހުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްވަމުން ފިރުޒުލް ވަނީ، އިންތިގާލީ ކޮމިޓީތަކުން މިނިވަން އެކިއެކި މުވައްސަސާތަކަށް ކުރި ޒިޔާރަތް ތަކުން ލިބުނު މައުލޫމާތު ތަކުގެ މައްޗަށް އަލިއަޅުއްވާލައްވާފައެވެ.

އެގޮތުން، އެ ކޮމިޓީތަކަށް ލިބުނު މައުލޫމާތު ތަކުގެ އަލީގައި އެ މުވައްސަސާ ތަކަށް ކުރިމަތިވެފައިވާ އެންމެ ބޮޑު ގޮންޖެހުމެއްގެ ގޮތުގައި ފިރުޒުލް ފާހަގަކުރެއްވީ ބަޖެޓްގެ މައްސަލަ ކަމަށެވެ. އަދި އެ މުވައްސަސާ ތަކަށް ދިނުމަށް ސަރުކާރުގައި އެދޭ މިންވަރަށް މިހާތަނަށް އެއް ފަހަރުވެސް ބަޖެޓް ލިބިފައި ނުވާ ކަމަށް އެނގިފައިވާ ކަމަށް ފިރުޒުލް ވިދާޅުވި އެވެ. 

"މުއައްސަސާތަކުން އެދިފައިވާ ބަޖެޓު އެ މުއައްސަސާއަށް ދުވަހަކުވެސް ނުލިބޭކަން ފާހަގަކުރެވެނު،" ފިރުޒުލް ވިދާޅުވިއެވެ.

އެދެވޭ ބަޖެޓް ނުލިބުމުގެ ސަބަބުން، އެ މުވައްސަސާ ތަކުގެ މުވައްޒަފުންނަށް މުސާރަ ދިނުމަށްފަހު ދެން މާ ބޮޑު ކަމެއް ކުރުމަށް ފައިސާ ނުހުންނަ ކަމަށް ފިރުޒުލް ވިދާޅުވި އެވެ. އެގޮތުން، އެ މުވައްސަސާ ތަކުގެ މެންޑޭޓްގެ ތެރޭގައި ހިމެނޭ ހޭލުންތެރި ކުރުމުގެ ޕްރޮގްރާމް ތައް ބޭއްވުން ފަދަ ކަންކަމާއި، ޓްރެއިނިންގ ތައްވެސް ރަނގަޅަށް ކުރިއަށް ނުގެންދެވޭ ކަމަށް އޭނާ ވިދާޅުވި އެވެ. 

ފިރުޒުލް އިތުރަށް ވިދާޅުވީ، ބަޖެޓްގެ ތާށިކަމާއި ހުރެ، ފަންނީ މުވައްޒަފުން ގެ ދަތިކަންވެސް މިނިވަން މުވައްސަސާތަކަށް އޮތް ކަމަށެވެ. އެހެނީ ބަޖެޓުގެ ދަތިކަން އޮތުމުގެ ސަބަބުން މުވައްޒަފުންނަށް އެކަށީގެންވާ މުސާރަ ނުދެވުމުގެ ސަބަބުން މުވައްޒަފުން ހަރުނުލާ ކަމަށް އޭނާ ވިދާޅުވިއެވެ. 

އެހެންކަމުން މުއައްސަސާތަކުގެ މާލީ ތަނަވަސްކަން އިތުރުކޮށްދެއްވުމަކީ އިންތިހާބީ ރައީސުލްޖުމްހޫރިއްޔާ ޑރ. މުއިއްޒުގެ ވަރަށް ބޮޑު އަމާޒެއް ކަން ފިރުޒުލް ފާހަގަކުރެއްވިއެވެ.