މި ސަރުކާރުގެ ބޯހިޔާވަހި ކަމުގެ މަޝްރޫއުކަމަށްވާ ގެދޮރުވެރިޔާ މަޝްރޫއުގެ ދަށުން ދޫކުރާ 4000 ފްލެޓް ލިބޭ މީހުންގެ ލިސްޓުގައި ޝަރުތު ހަމަނުވާ މީހުން އުސޫލުން ބޭރުން ހިމަނާފައިވާ ނަމަ، އެކަމުގައި ޝާމިލްވާ މީހުންގެ މައްސަލަތައް ބަލައި، ފިޔަވަޅު އަޅާނެކަން އިންތިހާބީ ރައީސްގެ އޮފީހުން ހާމަކޮށްފިއެވެ.
އިންތިޚާބީ ރާއީސް ގެ އޮފީހުގައި މިއަދު ބޭއްވި އިބްތިޤާލީ މަރުހާލާގެ ތަރުޖަމާނު މުހައްމަދު ފިރުޒުލް ވިދާޅުވީ، މިހާރު ދޫކުރަމުން ދާ ފްލެޓްތައް ނުޙައްޤުން، ނުޤަވާއިދުން އަދި އުސޫލުން ބޭރުން ދީފައިވާނަމަ، އެކަންކަން ބަލާނެ ކަމަށެވެ.
"(ގެދޮރުވެރިކަމުގެ) ލިސްޓުތަކަށް ޖުމްލަ ގޮތެއްގައި އޮނާ ކުރެވިގެން ދިޔަކަމުގައިވީ ނަމަވެސް މިހެން ނުގަވާއިދުން، އިންސާފުން ބޭރުން، އުސޫލުން ބޭރުން ކަންތައްތަކެއް ހިނގާފައިވާ ކަމަށް ވާނަމަ އެކަންކަމަށް ބަލައި، އެކަންކަމުގެ ތެރޭގައި ހަމަ ހަގީގަތުގަ ވެސް އުސޫލުން ބޭރުން ކަންތައްތަކެއް ހިނގާފައިވާ ކަމަށް ފާހަގަވާނަމަ އެފަރާތްތަކާމެދު ފިޔަވަޅު އެޅުމުގެ ފުރުސަތު އޮންނާނެ." ފިރުޒުލް ވިދާޅުވި އެވެ
ފިރްޒުލް
މީގެ އިތުރުން މިއަދުގެ ނޫސްވެރިންގެ ބައްދަލުވުމުގައި ފިރުޒުލް ވިދާޅުވީ ނާއިންސާފުގެ ކުރިމަތީގައި ނާއިންސާފުން ކަންކަން ކުރިއަށް ދާއިރު އެކަމުގައި އެއްވެސް ފިޔަވަޅެއް ނާޅާ ހުރުމަކީ އެންމެ އަދުލުވެރި ގޮތް ނޫން ކަމަށް އިންތިހާބީ ރައީސް ޑރ. މުޙައްމަދު މުޢިއްޒު ދެކެވަޑައިގަންނަވާ ކަމަށެވެ.
"އެހެންކަމުން އެ އުސޫލުން، ނާއިންސާފުން ކަންތައްތަކެއް ހާސިލްކޮށްފައިހުރިނަމަ ޝަރުތު ހަމަނުވާ ފަރާތްތަކަކަށް ދެވިފައިހުރި ކަމަށް ވާނަމަ ނުވަތަ އެނޫންވެސް އެފަދަ އެހެން ކަންތައްތަކެއް ހުރިނަމަ އެކަންކަމާ މެދު ފިޔަވަޅު އެޅުމުގެ ފުރުސަތު އޮންނާނެކަން ފާހަގަކޮށްލަން."
މުހައްމަދު ފިރުޒުލް
ގެދޮރުވެރިޔާ ސްކީމްގެ ދަށުން ފްލެޓަށް އެދި ހުށަހަޅާފައިވާ މީހުންގެ ޝަރުތު ހަމަވާ އެންމެންނަށް ފްލެޓް ދޭން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް ވަނީ ނިންމަވާފައެވެ.
ގެދޮރުވެރިޔާ ސްކީމްގެ ދަށުން ފްލެޓަށް އެދި 20،000ށްވުރެ ގިނަ މީހުން ފޯމު ހުށަހެޅިއިރު، އޭގެ ތެރެއިން 13،000ށްވުރެ ގިނަ މީހުންގެ ޝަރުތު ހަމަވެއެވެ.
އެގޮތުން ޝަރުތު ހަމަވާ މިހުންގެ ތެރެއިން ފުރަތަމަ 4000 ފްލެޓް ލިބޭ މީހުންގެ ލިސްޓު މިދިޔަ ހޮނިހިރު ދުވަހު އާންމުކުރުމާއެކު ލިސްޓަށް ޕޮއިންޓް ދީފައިވާ ގޮތާއި މެދު ނުރުހުންވުން ފާޅުކޮށް ގިނަ އަދަދެއްގެ އާންމުން ވަނީ ޕްލޭނިން މިނިސްޓްރީއަށް އެއްވެ އިހްތިޖާޖު ކޮށްފައެވެ.
ފްލެޓުގެ ދާއިމީ ލިސްޓު އިއުލާންކުރުމާ އެކު އެއީ އިންސާފުން ބޭރުން އެކުލަވާލައި އާއްމުކޮށްފައި އޮތް ލިސްޓެއް ކަމުގެ ޝަކުވާ ބޮޑުވެ އެ މައްސަލަ އޭސީސީއަށް ހުށަހެޅުމާއެކު އެ ސްކީމްގެ ދަށުން ދޫކުރާ ފްލެޓުތަކުގެ އެއްބަސްވުމުގައި ސޮއިކުރުމާއި އެ ފްލެޓުތައް ހަވާލުކުރުމާ ގުޅުންހުރި ހުރިހާ މަސައްކަތްތަކެއް، ޕޮއިންޓް ދީފައިވާ ގޮތާމެދު ޝަކުވާ ހުށަހަޅަން އެކަށީގެންވާ މުއްދަތެއް ދީ، އެ ޝަކުވާތަކަށް ބެލުމަށް ފަހު ނޫނީ ކުރިއަށް ނުގެންދިއުމަށް އެސީސީން ވަނީ އަންގައިފައެވެ.
އަދި ފްލެޓް ދިނުމުގެ އުސޫލުތަކާއި ގުޅުން ހުރި ކަންކަން ބެލުމަށްޓަކައި އިއްޔެގެ ވަގުތެއްގައި އޭސީސީގެ ކުއިކް ރެސްޕޮންސް ޓީމުން ވަނީ ޕްލޭނިންގް މިނިސްޓްރީއަށް ވަދެ ކަމާގުޅުންހުރި ލިޔުންތައް ބަލައި ފާސްކޮށްފައެވެ.
Advertisement
This content is created and paid for by advertisers and does not involve Voice Journalists
