ޖަމިއްޔަތު ސަލަފްގެ ޓީވީ ޗެނަލް ކަމުގައިވާ "ދާރިސް ޓީވީ" މީޑިއާނެޓް މެދުވެރިކޮށް މުޅި ރާއްޖެއަށް ލިބޭ ގޮތް ހަދައިފިއެވެ.
މިކަން އިއުލާންކޮށް ދާރިސް ޓީވީން އެކްސް ގައި ކޮށްފައިވާ ޕޯސްޓެއްގައި ބުނީ މާލޭގެ އިތުރުން ރާއްޖޭގެ ހުރިހާ ރަށަކަށްވެސް މީޑިއާނެޓްގެ 131 ވަނަ ޗެނަލްއިން ދާރިސް ޓީވީ ބަލާލެވޭނެ ކަމަށެވެ.
މީޑިއާނެޓް މެދުވެރިކޮށް ދާރިސް ޓީވީގެ މުޅި ރާއްޖެއަށް ދައްކަން ފެށުމާއި ގުޅިގެން އެ ޓީވީގެ ސްޓޭޝަން މެނޭޖަރު ޢަލީ ރަމީޒު ވިދާޅުވީ، މީޑިއާނެޓް މެދުވެރިކޮށް ދާރިސް ޓީވީ ލިބިގެން ދިޔުމަކީ ގިނަ ބައެއްގެ ވަރަށް ބޮޑު އެދުމެއް ކަމަށާ، އެ އެދުން ފުރިހަމަވެގެން ދިޔުމަކީ ލިބޭ ވަރަށް ބޮޑު އުފަލެއް ކަމަށެވެ.
"ދާރިސް ޓީވީ އަކީ އަދި ވަރަށް ޅަ ޓީވީއެއް. އެހެންނަމަވެސް މާތް الله ގެ ރަހުމަތުން، ވަރަށް ގިނަ ކަންކަން ހާސިލްވެފައި މިވަނީ. ވަރަށް ގިނަ ގޭގޭގައި 24 ގަޑިއިރު އަޅުވާފައި އިންނަ ޓީވީ އަކަށް ދާރިސް ޓީވީ ވެއްޖެ." އަލީ ރަމީޒު ވިދާޅުވި އެވެ.
ދާރިސް ޓީވީން އަންނަނީ ދީނީ އެކިއެކި މައުލޫމާތު ހިމެނޭ ޕްރޮގްރާމް ތަކުގެ އިތުރުން، އިޖްތިމާޢީ އަދި އެހެނިހެން ދާއިރާ ތަކާއި ގުޅޭ ޕްރޮގްރާމް ތަކާއި ކުޑަކުދިންނާއި ގުޅޭ ޕްރޮގްރާމްތައްވެސް ގެނެސްދެމުންނެވެ.
Advertisement
This content is created and paid for by advertisers and does not involve Voice Journalists
