ޣައްޒާގައި ހުންނަ ކުޑަކުދިންގެ ހޮސްޕިޓަލެއް ކަމަށްވާ ރަންތީސީ ޗިލްޑްރެންސް ހޮސްޕިޓަލް ހުސްކުރުމަށް އިޒްރާއިލްގެ ޔަހޫދީން އަންގައިފިއެވެ.
ރަންތީސީ ހޮސްޕިޓަލަށް ބޮން އަޅާނެ ކަމަށް ބުނެ އިޒްރާއިލް ސިފައިން ވަނީ އެހޮސްޕިޓަލް ހުސްކުރުމަށް އަންގައިފައެވެ.
އެހޮސްޕިޓަލްގައި މިވަގުތު 70 ކުއްޖަކު ފަރުވާ ހޯދަމުން ދާ ކަމަށާއި، ގިނަ ކުދިން ތިބީ އެހެން ހޮސްޕިޓަލަކަށް ބަދަލު ކުރެވޭނެ ފަދަ ޙާލަތެއް ގައި ނޫން ކަމަށް ވެސް އަލްޖަޒީރާގައި ބުނެފައިވެއެވެ.
ބަލި ޙާލަތުގައި ތިބި ކުދިންގެ އިތުރުން ރަންތީސީ ހޮސްޕިޓަލްގައި ހާހަކަށް މީހުން ދަނީ ވަގުތީ ބޯހިޔާވަހިކަން ހޯދަމުންނެވެ.
ރަންތީސީ ހޮސްޕިޓަލަކީ އިނގިރޭސި ވިލާތުން ފަންޑު ކޮށްގެން ހިންގާ ހޮސްޕިޓަލެކެވެ.
ރޭ އިޒްރާއިލުން ވަނީ ރަންތީސީ ހޮސްޕިޓަލް ހުންނަ ނައްސިރް މެޑިކަލް ކޮމްޕްލެކްސް އަށް އަމާޒުކޮށް ވަނީ ހަމަލާތަކެއް ދީފައެވެ. އިޒްރާއިލުން ހަމަލާދިން ނައްސިރް މެޑިކަލް ކޮމްޕްލެކްސް ގައި އަލް ނައްސިރް ކުޑަކުދިންގެ ހޮސްޕިޓަލާއި، ރަންތިސީ ސްޕެޝަލައިޒްޑް ހޮސްޕިޓަލާއި، އައި ހޮސްޕިޓަލް އަދި ސައިކިއާޓްރިކްޓް ހޮސްޕިޓަލެވެ.
ރަންތީސީ ހޮސްޕިޓަލްގެ ޑޮކްޓަރަކު އަލްޖަޒީރާގައި ވިދާޅުވެފައިވަނީ އިޒްރާއިލުގެ މިލިޓަރީ އިން އެހޮސްޕިޓަލްގެ ބައެއް ޑޮކްޓަރުންނަށް ގުޅައި ހޮސްޕިޓަލްގައި އަލިފާން ރޯކޮށްލާނެ ކަމުގެ އިންޒާރު ދިން ކަމަށެވެ.
ރޭ ނައްސިރް މެޑިކަލް ކޮމްޕްލެކްސްއަށް ތިން ފަހަރެއްގެ މަތިން އިޒްރާއިލުން ހަމަލާދީފައިވެއެވެ.
Advertisement
This content is created and paid for by advertisers and does not involve Voice Journalists
