ދައުލަތުން ކުރިއަށް ގެންދާ ޕީ.އެސް.އައި.ޕީ މަޝްރޫ ތައް ހިންގުމުގައި ކޮންޓްރެކްޓަރުންނަށް ދިމާވެފައިވާ އެކިއެކި ދަތިތަކަށް ލުޔެއް ހޯދައިދިނުމުގެ ގޮތުން މަޝްރޫޢުތަކުގެ މުއްދަތު 6 މަސްދުވަހާއި ހަމައަށް އިތުރުކުރުމަށް ސަރުކާރުން ނިންމައިފިއެވެ.

މިކަމާއި ގުޅިގެން ފިނޭންސް މިނިސްޓްރީން އާއްމު ކުރި ސާކިޔުލާއެއްގައި ބުނީ، ދައުލަތުން ކުރިއަށް ގެންދާ ޕީ.އެސް.އައި.ޕީ މަޝްރޫއުތަކުގެ ކޮންޓްރެކްޓަރުންނަށް ކޮވިޑް 19ގެ ޙާލަތާއި ގުޅިގެންދިމާވި އެކިއެކި ދަތިތަކަށް ހައްލެއް ހޯދައިދިނުމުގެ ގޮތުން 2020 ވަނަ އަހަރު ކޮވިޑްގެ ޙާލަތު އިޢުލާނުކުރެވުނު ފަހުން، އަދި 30 މޭ 2023ގެ ކުރިން ސޮއިކޮށްފައިވާ މަސްރޫޢުތަކުގެ ތެރެއިން މިހާރުވެސް ކުރިއަށްދާ މަސްރޫއުތަކުގެ މުއްދަތު 6 މަސްދުވަހާއި ހަމައަށް މުއްދަތު އިތުރުކުރުމަށް އިކޮނޮމިކް ކައުންސިލުން ނިންމާފައިވާ ކަމަށެވެ.

އަދި މުއްދަތު އިތުރުކުރުމަށް ނިންމާފައިވާނީ އެކަމަށް އެދި ހުށަހަޅާ ފަރާތްތަކަށް ކަމަށްވެސް އެ ސާކިޔުލާގައި ބުނެފައިވެއެވެ.

Advertisement

އެހެންކަމުން އެ މުއްދަތުގެ ތެރޭގައި ދައުލަތުން ކުރިއަށް ގެންދާ ޕީ.އެސް.އައި.ޕީ މަޝްރޫއު އެއްގައި  ބައިވެރިވެފައިވާ ކޮންޓްރެކްޓަރުން، އެފަރާތުގެ ކޮންޓްރެކްޓުގެ މުއްދަތު އިތުރުކުރުމަށް ބޭނުންވާ މުއްދަތު، 6 (ހައެއް) މަސް ދުވަހަށްވުރެ އިތުރުނުވާ ގޮތަށް 16 ނޮވެންބަރު 2023 ގެ ނިޔަލަށް އެ ކޮންޓްރެކްޓެއް ހިންގާ އޮފީހަށް އެދުމަށް ފިނޭންސް މިނިސްޓްރީން ވަނީ އެދިފައެވެ.

އަދި އެފަދަ އެދިލެއްވުންތަކަށް ދައުލަތުގެ މާލިއްޔަތުގެ ގަވާއިދާއި އެއްގޮތަށް ހުއްދަދީ ކޮންޓްރެކްޓުގެ މުއްދަތު އިތުރުކޮށް އެއްބަސްވުންތައް އަދާހަމަކުރުމަށް އެ މިނިސްޓްރީން ވަނީ ދައުލަތުގެ އޮފީސް ތަކަށް އަންގާފައެވެ.