ގެދޮރުވެރިޔާ އަދި ބިންވެރިޔާ ސްކީމުގެ ދަށުން ފުލެޓާއި ގޯތި ދޫކުރުމުގައި، ކަންކަން ކޮށްފައިވާނީ އަންނަން އޮތް ސަރުކާރުވެސް ވަރަށް ހިތްހަމަޖެހޭނެ ގޮތަށް ކަމަށް ހައުސިންގް މިނިސްޓްރީން ބުނެފިއެވެ. 

އިންތިހާބީ ރައީސްގެ އޮފީހުން މިއަދު ބޭއްވި ނޫސްވެރިންގެ ބައްދަލުވުމުގައި އިންތިގާލީ ތަރުޖަމާނު މުހައްމަދު ފިރުޒުލް ވަނީ، މި ސަރުކާރުގެ ގެދޮރުވެރިޔާ ސްކީމްގެ ދަށުން، ނާއިންސާފުން ފްލެޓު ހޯދާފައިވާނަމަ އާ ސަރުކާރުގައި ފިޔަވަޅު އަޅާނެ ކަމަށް ވިދާޅުވެފައެވެ.

"އެ [ގެދޮވެރިކަމުގެ] ލިސްޓުތަކަށް ޖުމްލަ ގޮތެއްގައި އޮނާ ކުރެވިގެން ދިޔަކަމުގައިވީ ނަމަވެސް މިހެން ނުގަވާއިދުން، އިންސާފުން ބޭރުން، އުސޫލުން ބޭރުން ކަންތައްތަކެއް ހިނގާފައިވާ ކަމަށް ވާނަމަ އެކަންކަމަށް ބަލައި، އެކަންކަމުގެ ތެރޭގައި ހަމަ ހަގީގަތުގަ ވެސް އުސޫލުން ބޭރުން ކަންތައްތަކެއް ހިނގާފައިވާ ކަމަށް ފާހަގަވާނަމަ އެފަރާތްތަކާމެދު ފިޔަވަޅު އެޅުމުގެ ފުރުސަތު އޮންނާނެ." ފިރުޒުލް ވިދާޅުވި އެވެ.

ފިރުޒުލް މިހެން ވިދާޅުވުމާއި ގުޅިގެން، މިއަދު ޕްލޭނިންގ މިނިސްޓްރީން ބޭއްވު ނޫސްވެރިންގެ ބައްދަލުވުމުގައި ނޫސްވެރިއަކު ވަނީ އެކަމާއި ގުޅޭ ސުވާލެއް ކޮށްފައެވެ. 

އެ ސުވާލަށް ޖަވާބު ދެއްވަމުން ޕްލޭނިން މިނިސްޓްރީގެ ސީނިއާ އެގްޒެކެޓިވް ޑިރެކްޓަރު މުހައްމަދު އާރިފް ވިދާޅުވީ، ފުލެޓް އަދި ގޯތި ބެހުމުގެ ކަންކަން ކުރިއަށް ގެންގޮސްފައިވާ ގޮތުގެ މައުލޫމާތު ޓްރާންސިޝަން ކޮމިޓީގެ މެންބަރުންނަށް ދައްކާފައިވާ ކަމަށެވެ. އަދި އެކަންކަމުގެ އިދާރީ ކަންކަން ބަލަހައްޓަމުންދަނީ ސިޔާސީ ބޭފުޅުން ނޫން ކަމަށާށ އެއީ ސިވިލް ސާވިސްގެ މުވައްޒަފުން ކުރާ މަސައްކަތް ކަމަށް އޭނާ ވިދާޅުވި އެވެ. 

"އެހެންވީމާ އެއްވެސް ޖެހިލުމެއް އަޅުގަނޑުމެންގެ ނެތް. އަޅުގަނޑުމެން އުއްމީދު ކުރަނީ މިކަން ކޮށްފައި އޮތްލެއް ފުރިހަމަކަން އެ ބޭފުޅުން އަދި ކޮންމެވެސް ދުވަހަކު ބުނާނެ ކަމަށް." ފުލެޓް ދީފައިވާ ގޮތާއިމެދު ފިޔަވަޅު އަޅާނެ ކަމެއް ނޯންނާނެކަން ހާމަކުރައްވައި އާރިފް ވިދާޅުވި އެވެ.