މިސަރުކާރުގެ ބޯހިޔާވަހިކަމުގެ މަޝްރޫޢުގެ ދަށުން ކުރިއަށް ގެންދާ ގެދޮރުވެރިޔާ ސްކީމްގެ ދަށުން ދޫކުރާ 4000 ފުލެޓް ލިބޭ މީހުން ހޮވުމުގައި ޕޮއިންޓް ދީފައިވާ ގޮތާއިމެދު ނުރުހުން ފާޅުކޮށް އަޑުގަދަ ކޮށްފައިވަނީ 'ވަކި ބަޔަކު' ކަމަށް ހައުސިންގް މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވެއްޖެއެވެ. 

ބޯހިޔާވަހިކަމުގެ ސިޔާސަތުގެ ދަށުން މާލެ ސަރަޙައްދުން ފުލެޓް ދޫކުރުމަށްޓަކައި ހިންގާ ގެދޮރުވެރިޔާ ސްކީމުގެ ދަށުން މާލެ ސަރަޙައްދުން ފުލެޓަށް އެދި ހުށަހަޅާފައިވާ ފަރާތްތަކުގެ ދާއިމީ ލިސްޓު މިދިޔަ ހޮނިހިރު ދުވަހު އާއްމު ކޮށްފައިވާއިރު، އެ ލިސްޓާއިމެދު ގިނަ ބައެއްގެ ނުރުހުން ވަނީ އަމާޒުވެފައެވެ. 

އެގޮތުން، މި އާދިއްތަ ދުވަހުގެ ވަގުތެއްގައި ގިނަ އަދަދެއްގެ އާއްމުން ވަނީ ހައުސިންގް މިނިސްޓްރީއަށް ވަދެ، ނުރުހުން ފާޅުކޮށް އަޑުގަދަ ކޮށްފައެވެ. 

ފުލެޓް ދިން ގޮތާއި މެދު ނުރުހުން ފާޅުކޮށް ހައުސިންގް މިނިސްޓްރީގައި އާއްމުން އަޑުގަދަ ކުރަނީ-- ފޮޓޯ/ވޮއިސް

އެކަމާއި ގުޅިގެން، އިންތިޚާބީ ރައީސްގެ އޮފީހުން މިއަދު ބޭއްވި ނޫސްވެރިންގެ ބައްދަލުވުމުގައި އިންތިގާލީ ތަރުޖަމާނު ވަނީ،  އުސޫލުން، ނާއިންސާފުން، ޝަރުތު ހަމަނުވާ ފަރާތްތަކަކަށްއެ ފުލެޓް ދެވިފައިހުރި ކަމަށް ވާނަމަ އެކަމާމެދު ފިޔަވަޅު އެޅުމުގެ ފުރުސަތު އޮތް ކަމަށް ވިދާޅުވެފައެވެ. 

އިންތިގާލީ ތަރުޖަމާނުގެ އެވާހަކައަށް އިޝާރާތް ކޮށް، މިއަދު ޕްލޭނިންގ މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަށް ޖަވާބު ދެއްވަމުން ޕްލޭނިން މިނިސްޓްރީގެ ސީނިއާ އެގްޒެކެޓިވް ޑިރެކްޓަރު މުހައްމަދު އާރިފް ވަނީ އައު ސަރުކާރުން ފިޔަވަޅު އަޅަންޖެހޭ ފަދަ އެއްވެސް ކަމެއް ފުލެޓް ދިނުމުގައި ހިނގާފައި ނުވާނެ ކަމަށް ވިދާޅުވެފައެވެ.

އާރިފް ގެ ވާހަކަތަކަށް ބާރުދެއްވަމުން އަކްރަމް ވިދާޅުވީ، ފުލެޓް ދިނުމުގައި އެއްވެސް އިހުމާލެއް ވެފައި ނޯންނާނެ ކަމަށާ، ފުލެޓް މައްސަލާގައި ހައުސިންގް މިނިސްޓަރީއަށް ވަދެ އަޑު ގަދަ ކުރީވެސް ވަކި ބަޔަކު ކަމަށެވެ. 

އަކްރަމް ވިދާޅުވީ އެ މައްސަލާގައި ކަންކަން ހިނގާފައިވަނީ ރަނގަޅަށް ކަން އޭސީސީއަށްވެސް އެނގޭނެ ކަމަށެވެ. އަދި ފުލެޓް ދިނުމުގައި ގޯހެއް ހިނގާފައި ނުވާނެ ކަން އޭނާ ވަނީ ތަކުރާރުކޮށް ވިދާޅުވެފަ އެވެ.