ފަލަސްޠީނުގެ ޣައްޒާގެ ކުޑަކުދިން ނޫސްވެރިންގެ ބައްދަލުވުމެއް ބާއްވައި، ދުނިޔެއަށް އެކުދިންގެ ޙާލަތު ކިޔައިދީފިއެވެ.

ޣައްޒާގެ ކުޑަކުދިންގެ ތެރެއިން މިވަގުތު އަލް ޝިފާ ހޮސްޕިޓަލުގައި ބޯހިޔާވަހިކަން ހޯދަމުން އަންނަ ކުދިންތަކެއް ބޭއްވި މި ނޫސްވެރިންގެ ބައްދަލުވުން ބާއްވައިފައިވަނީ އެ ހޮސްޕިޓަލުގެ ގޯތިތެރޭގައެވެ.

އަލް ޝިފާ ހޮސްޕިޓަލަކީ ޣައްޒާގެ އެންމެ ބޮޑު ހޮޮސްޕިޓަލެވެ. ގިނަ ޢަދަދެއްގެ ބަޔަކު އަންނަނީ އެތަނުގައި ބޯހިޔާވަހިކަން ހޯދަމުންނެވެ.

Advertisement

ޣައްޒާގެ ކުޑަކުދިންގެ މި ނޫސްވެރިންގެ ބައްދަލުވުން ބާއްވައިފައިވަނީ ބައިނަލް އަޤްވާމީ ދުނިޔެއަށް އެކުދިން މިވަގުތު ތަހައްމަލް ކުރަމުން އަންނަ ކަންކަން ހާމަކޮށްދިނުމަށެވެ.

މި ބައްދަލުވުމުގައި ވާހަކަ ދެއްކި ކުއްޖާ ބުނެފައިވަނީ 7 އޮކްޓޫބަރުން ފެށިގެން އިޒްރާއިލުން ދަނީ އެކުދިންގެ ބޮލަށް ދުނިޔޭގެ ލޯތަކުގެ ކުރިމަތީގައި ބޮން އަޅަމުން ކަމަށެވެ. އިޒްރޭލުން ބޮން އަޅަމުން ދަނީ ހަނގުރާމަވެރިންނަށް ކަމަށްބުނެ އެމީހުން ވަނީ ދުނިޔެއަށް ދޮގު ހަދައިފައި ކަމަށްވެސް އެ ކުއްޖާ ބުނެފައިިވެއެވެ. އަދި އެހެން ބުނި ނަމަވެސް އިޒްރާއިލުން ޝަހީދުކުރަމުންދަނީ ޣައްޒާގެ ކުށެއް ނެތް ކުޑަކުދިންނާއި އެކުދިން ކުރިމަގަށް ދެކެމުން ދިޔަ މައުސޫމް ހުވަފެންތައް ކަމަށް އެކުއްޖާ ބުނެފައިވެއެެވެ.

“އަހަރެމެން އަތުގައި ކާނެ އެއްޗެއް ބޯނެ ފެނެއް ނެތް، އަހަރެމެން އަތުގައި ކާނެ ރޮށްޓެއް ނެތް، އަހަރެމެން ބޯން ބޭނުން ކުރަމުން މިދަނީ ނުސާފު ފެން” އެކުއްޖާ ބުނެފައިވެއެވެ.

އެ ކުއްޖާ އިތުރަށް ބުނެފައިވަނީ އެމީހުން ގެ ދޫކޮށް އަލް ޝިފާއަށް ދިޔައީ ބޮން އަޅާތީ ރައްކާތެރިކަން ހޯދުމަށް ކަމަށެވެ. ނަމަވެސް މިހާރު އެތަނަށް ބޮން އަޅައި އެތަނުންވެސް އެތައް ބަޔަކު ޝަހީދު ކޮށްލައިފިކަމަށެވެ.

ހަމަލާއެއްގައި އަނިޔާވި ތުއްތު ދެކުއްޖަކަށް ޑޮކްޓަރުން ފަރުވާ ދެނީ. ފޮޓޯ: ޤުދްސް ނެޓްވޯކް

އޮކްޓޫބަރު 7 ވަނަ ދުވަހު އިޒްރާއިލްގެ ޔަހޫދީން ފެށި ޤަތުލު ޢާންމު ތަކުގައި މިހާތަނަށް ޣައްޒާގެ 4100 އަށް ވުރެ ގިނަ ކުދިން ވަނީ ޝަހީދުކޮށްލައިފައެވެ. އަދި 1500 އާއި ގާތް ކުރާ ޢަދަދަކަށް ކުޑަކުދިން ވެއްޓިފައިވާ ޢިމާރާތް ތަކުގެ ދަށުގައި ތާށިވެފައިވެއެވެ.