ފަލަސްޠީނުގެ ޣައްޒާއަށް އެތެރެކުރި އެހީގެ ގާފިލާއަކަށް އިޒްރާއިލުން ހަމަލާދީފިއެެވެ.

އަލްޖަޒީރާގައި ފަލަސްޠީނުގެ ރެޑް ކްރޮސެންޓާއި ހަވާލާދީ ބުނެފައިވަނީ އިޒްރާއިލުން ޣައްޒާއަށް އެތެރެކުރި އެހީގެ ގާފިލާއަކަށް އަމާޒުކޮށް ހަމަލާދީފައިވާކަަށެވެ.

އިންޓަރނޭޝަނަލް ކޮމިޓީ އޮފް ރެޑްކްރޮސެންޓާއި ހަވާލާދީ އަލްޖަޒީރާގައި ބުނެފައިވަނީ އެހީގެ ތަކެތީގެ ގޮތުގައި ޣައްޒާއަށް ވެއްދި ބޭސްވެރިކަމާއި ގުޅޭ ތަކެތި މެޑިކަލް ފެސިލިޓީ ތަކަށް ފޯރު ކޮށްދިނުމުގެ މަގުމަތީގައި ވަނިކޮށް އެތަަކެތި އުފުލި 5 ޓްރަކްގެ ގާފިލާއަށް ހަމަލާދިނުމުން އެޖަމިއްޔާ ވަނީ ވަރަށް ބޮޑު އުނދަގުލެއް ތަހައްމަލް ކުރަން ޖެހިފައިކަމަށެވެ.

އޭގެ ތެރެއިްނ ދެ ޓްރަކެއް ހަލާކުވެފައިވާ ކަަމަށާއި އެއް ޑްރައިވަރަކަށް އަނިޔާވެފައިވާ ކަމަށެވެ.

“މިއީ އިންސާނީ އެހީ ފޯރުކޮށްދޭ މީހުންނަށް އެހީ ފޯރުކޮށްދިނުމަށް މަސައްކަތް ކުރެވޭނެ ފަދަ ހާލަތެއް ނޫން، އަހަރެމެން މިތަނަށް އައީ ޢާންމު ރައްޔިތުނަށް ބޭނުންވާ އެހީ ފޯރުކޮށްދޭން، މި މެޑިކަލް ސާމާނު މެޑިކަލް ފެސިލިޓީތަކަށް ފޯރުކޮށްދެވުނު ކަމުގެ ޔަޤީން ކަން ހޯދަން” އިންޓަރނޭޝަނަލް ރެޑް ކްރޮސެންޓްގެ ފަލަސްޠީނަށް ކަނޑައަޅާއިފައިވާ ހެޑް ވިލިއަމް ޝޮމްބެގް ބުނެފައިވެއެވެ.

އޮކްޓޫބަރު މަހުގެ 21 ވަނަ ދުވަހުން ފެށިގެން ޣައްޒާގެ ދެކުނުގައި ހުންނަ ރަފަޙް ބޯޑަރު ހުރަސްކޮށް ވައްދައިފައިވަނީ 569 އެހީގެ ޓްރަކެވެ. ނަމަވެސް އެ އެހީގެ ތަކެތީގެ އެއްވެސް މިންވަރެއް ޣައްޒާގެ އުތުރަށް ލިބިފައެއް ނުވެއެވެ.

އޮކްޓޫބަރު 7 ގައި ފެށުނު ހަނގުރާމައިގެ ކުރިން ދުވާލެއްގެ މައްޗަށް 750 އާއި 850 ދެމެދުގެ ޢަދަދަކަށް އެހީގެ ޓްރަކް ޣައްޒާއަށް ވައްދާ ކަަމަށް އަލްޖަޒީރާގައި ބުނެފައިވެއެވެ.

އިއްޔެ ޣައްޒާ އަށް ރަފަޙް ބޯޑަރުން ވަނީ އެހީގެ ތަކެތީގެ 93 ޓްރަކެއް ވަނީ ވައްދައިފައިވެއެވެ. އެ ޓްރަކް ތަކުގައި ވައްދައިފައިވަނީ ކާނާ އާއި ފެން، އަންނައުނާއި ރަޖާ، ބޭސް އަދި މެޑިކަލް ސާމާނު ކަމަށް އަލްޖަޒީރާގައި ބުނެފައިވެއެވެ.

އަދިވެސް ރަފަޙް ހުރަސްކޮށް ތެޔޮ ވެއްދުން ވަނީ މަނާކޮށްފައެވެ.