ގެދޮރުވެރިޔާ ސްކީމުން ފުރަތަމަ 4،000 ފްލެޓަށް ޕޮއިންޓް ދިން ގޮތާއި މެދު ހުރި ޝަކުވާ ހުށަހެޅުމަށް އެންމެ ދުވަހަކަށް ވެފައިވަނިކޮށް ގެދުރޮވެރިޔާ ޕޯޓަލް ޑައުން ވެއްޖެއެވެ. 

ނޭޝަނަލް ޕްލޭނިން ހައުސިން އެންޑް އިންފްރާސްޓްރަކްޗާ މިނިސްޓްރީ އިން ނެރުނު ފްލެޓް ލިބޭ މީހުންގެ ދާއިމީ ލިސްޓުގައި މައްސަލަ ބޮޑުވެ އެ ލިސްޓަށް ވެސް ޝަކުވާ އަށް ހުޅުވާލި އިރު އެއްވެސް މީހަކަށް ޕޮއިންޓް ދިން ގޮތުގެ ތަފްސީލެއް އެ މިނިސްޓްރީ އިން ހާމަކޮށްފައެވެ. 

އެހެންކަމުން ފްލެޓް ލިބޭ މީހުންނަށް ޕޮއިންޓް ލިބުނު ގޮތުގެ ލިސްޓް އާންމުކުރުމަށްފަހު، ފްލެޓް ލިބޭ މީހުންގެ ދާއިމީ ލިސްޓަށް ޝަކުވާ ހުށަހަޅަން އެކަށީގެންވާ މުއްދަތެއް ނުދީ ފްލެޓު އެގްރިމެންޓުގައި ސޮއި ނުކުރަން އެންޓި ކޮރަޕްޝަން ކޮމިޝަން (އޭސީސީ) އިން ވެސް ވަނީ ޕްލޭނިންގް މިނިސްޓްރީއަށް އަންގައިފައެވެ. 

Advertisement

އެއާއެކު މިއަދު ޕޮއިންޓް ދީފައި ހުރި ގޮތުގެ މައުލޫމާތު އާންމު ކުރުމާއެކު ގިނަ ބަޔަކު ޕޯޓަލް އަށް ވަނުމުން ގެދޮރުވެރިޔާ ޕޯޓަލް މިހާރު ވަނީ ޑައުންވެފައެވެ. އަދި ބައެއް ފަހަރު ވެބްސައިޓަށް ވަދެވުން ނަމަވެސް އޭގެ އިރުކޮޅެއް ފަހުން އަނެއްކާވެސް ޑައުންވެއެވެ. ޕޯޓަލް އަށް ވަދެވޭ ބައެއް ފަރާތްތަކަށް ޕޮއިންޓު ލިބުނު ގޮތުގެ ތަފްސީލް ހިމަނާފައިވާ ޕޭޖެއް ނުފެނެއެވެ.

ފްލެޓަށް ޕޮއިންޓް ލިބުނުގޮތުގެ ލިސްޓަށް ޝަކުވާ ހުށަހެޅުމުގެ ފުރުސަތު މާދަމާއަށް ހަމަވާއިރު، ޢާންމުކުރި ލިސްޓް 20،000 އަށް ވުރެ ގިނަ މީހުން އެބަތިއްބެވެ. އެ މީހުންނަށް ވެސް ޕޮއިންޓް ލިބުނު ގޮތުގެ ތަފްސީލްތައް އަޅާފައި ވަނީ ޕޯޓަލް އަށެވެ.