ދައުލަތުން ކުރިއަށް ގެންދާ ޕީ.އެސް.އައި.ޕީ މަޝްރޫޢު ތަކުގެ މުއްދަތު އިތުރު ކުރުމަކީ އިކޮނަމިކް ކައުންސިލުގެ މެންޑޭޓްގައި ހިމެނޭ ކަމެއް ނޫން ކަމަށާ، އެ ކައުންސިލަށް އެ ބާރު ލިބިފައި ނުވާ ކަމަށް އިންތިޚާބީ ރައީސުލްޖުމްހޫރިއްޔާ ގެ އޮފީހުން ބުނެފިއެވެ. 

ދައުލަތުން ކުރިއަށް ގެންދާ ޕީ.އެސް.އައި.ޕީ މަޝްރޫއުތަކުގެ ކޮންޓްރެކްޓަރުންނަށް ކޮވިޑް 19ގެ ޙާލަތާއި ގުޅިގެންދިމާވި އެކިއެކި ދަތިތަކަށް ހައްލެއް ހޯދައިދިނުމުގެ ގޮތުން 2020 ވަނަ އަހަރު ކޮވިޑްގެ ޙާލަތު އިޢުލާނުކުރެވުނު ފަހުން، އަދި 30 މޭ 2023ގެ ކުރިން ސޮއިކޮށްފައިވާ މަސްރޫޢުތަކުގެ ތެރެއިން މިހާރުވެސް ކުރިއަށްދާ މަސްރޫއުތަކުގެ މުއްދަތު 6 މަސްދުވަހާއި ހަމައަށް މުއްދަތު އިތުރުކުރުމަށް އިކޮނޮމިކް ކައުންސިލުން ނިންމާފައިވާ ކަމަށް އިއްޔެ ފިނޭންސް މިނިސްޓްރީން އިއްޔެ ނެރުނު ސާކިޔުލާއެއްގައި ވަނީ ބުނެފައެވެ.

އަދި މުއްދަތު އިތުރުކުރުމަށް ނިންމާފައިވާނީ އެކަމަށް އެދި ހުށަހަޅާ ފަރާތްތަކަށް ކަމަށްވެސް އެ ސާކިޔުލާގައި ބުނެފައިވެއެވެ.

މިކަމާއި ގުޅިގެން މިއަދު އިންޚާބީ އޮފީސްގެ ފަރާތުން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ފިރުޒުލް ވިދާޅުވީ، ޕީއެސްއައިޕީ މަޝްރޫޢުތަކުގެ މުއްދަތު އިތުރު ކުރަން އިކޮނަމިކް ކައުންސިލުން ނިންމި ކަމަށް ފިނޭން މިނިސްޓްރީން ބުނެފައިވާއިރު، އެ ނިންމުން ނިންމުމުގެ ބާރު އެކަައުންސިލަށް ލިބިގެންވާ ނުވާ ކަމަށެވެ.

"25 އޭޕްރީލް 2019 ގައި އާންމުކޮށްފައިވާ ރައީސުލްޖުމްހޫރިއްޔާގެ އޮފީހުން އާންމުކޮށްފައިވާ އިކޮނޮމިކް ކައުންސިލްގެ މެންޑޭޓް ވާއިރު މި ދެންނެވި ބާރަކީ އެ ކައުންސިލްގެ މެންޑޭޓްގެ ތެރެއިން ހިމެނޭ ކަމެއް ނޫން." ފިރުޒުލް ވިދާޅުވިއެވެ.

އަދި މީގެ އިތުރުން ފިރުޒުލް ވިދާޅުވީ، މާލިއްޔަތު ގާނޫނާއި ގަވާއިދުތައް ހުރި ގޮތުން އެފަދަ ނިންމުމެއް ނިންމުމުގެ ބާރަކީ ފިނޭންސް މިނިސްޓްރީއަށް ވެސް ލިބިގެންވާ ބާރެއް ނޫން ކަމަށެވެ.