އިޒްރާއިލް ސިފައިން ޣައްޒާއަށް ދެމުންދާ ހަމަލާތަކުގެ ސަބަބުން 193 ސިއްޚީ މަސައްކަތް ތެރިއަކު ޝަހީދުވެއްޖެއެވެ.
އަލްޖަޒީރާގައި ފަލަސްޠީނުގެ ހެލްތް މިނިސްޓްރީގެ ތަރުޖަމާނު ޑރ އަޝްރަފް އަލް ޤުދްރާ އަށް ހަވާލާދީ ބުނެފައިވަނީ އިޒްރާއިލްގެ ހަމަލާތަކުގައި 193 ސިއްޚީ މަސައްކަތް ތެރިއަކު ޝަހީދުވެފައިވާ ކަމަށާއި، 45 އެމްބިޔުލާންސްއެއް ޚިދްމަތް ނުދެވޭވަރަށް ހަލާކުވެފައިވާ ކަމަށެވެ.
ޑރ އަޝްރަފް ވިދާޅުވެފައިވަނީ މިހާތަނަށް 10،569 މީހަކު ޝަހީދުވެފައިވާ ކަމަށެވެ. އަދި ޝަހީދުންގެ ތެރެއިން 4324 ޝަހީދުންނަކީ ކުޑަކުދިން ކަމަށާއި، 2823 ޝަހީދުންނަކީ އަންހެނުން ކަމަށެވެ. އަދި ޝަހީދުންގެ ތެރެއިން 649 މީހުންނަކީ ދޮށީ ޢުމުރުގެ މީހުން ކަމަށެވެ.
ޑރ އަޝްރަފާއި ހަވާލާދީ އަލްޖަޒީރާގައި ބުނެފައިވަނީ 26،475 މީހަކަށް ވަނީ އެކި ވަރުގެ އަނިޔާ ލިބިފައިވާކަމަށެވެ. މީގެއިތުރުން ފާއިތުވި 24 ގަޑިއިރުތެރޭގައި 214 މީހަކު ވަނީ ޝަހީދުވެފައި ކަމަށް އަލްޖަޒީރާގައި ބުނެފައިވެއެވެ.
ޑރ އަޝްރަފްވަނީ ސިއްޚީ ޚިދްމަތަށް ބޭނުންވާ ސާމާނާއި، ސިއްޚީ އެހީތެރިންނާއި ތެޔޮ ޣައްޒާއަށް ވެއްދުމަށާއި، ޒަޚަމްވެފައިވާ މީހުން އިތުރު ފަރުވާ އަށް ޣައްޒާއިން ބޭރަށް ގެންދެވޭނެ ރައްކާތެރި ދޮރެއް ހުޅުވައިދިނުމަށް ދުނިޔެއަށް ގޮވައިލައްވައިފައެވެ.
އަދި އިޒްރާއިލްގެ ހަމަލާތަކާއި ހަމަލާދޭނެ ކަމުގެ އިންޒާރުތައް ހުއްޓުވުމަށް ރެޑް ކްރޮސެންޓުގެ މީހުންނާއި އދ ގެ މީހުން ހޮސްޕިޓަލް ތަކުގައި ތިބުމަށް ވަނީ ގޮވައިލައިފައެވެ.
Advertisement
This content is created and paid for by advertisers and does not involve Voice Journalists
