ދިވެހި ރާއްޖޭގެ ވެރިކަން ކުރާ މައި ޕާޓީ، އެމްޑީޕީގެ ލީޑަރުންނަށް ބޭރު ގައުމުތަކަށް ނޭރޭވަރު ކުރާނެ ކަމަށް އެ ޕާޓީ އުފެއްދެއްވުމުގައި ގިނަ މަސައްކަތްތައް ކުރައްވައި ޕާޓީގެ ރައީސްކަން ކުރެއްވި  ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.

ނަޝީދު މިފަދައިން އިންޒާރު ދެއްވީ މަޖިލިސް މެމްބަރުން ތިއްބަވާ ވަޓްސްއެޕް ގްރޫޕަށް ފޮނުއްވި މެސެޖެއްގައެވެ.

އެގޮތުން އެމްޑީޕީގެ ހިންނަވަރު ދާއިރާގެ މެންބަރު ޖީހާން މަހުމޫދަށް އިންޓަ ޕާލިމެންޓްރީ ޔޫނިއަންގެ ކޮމިޓީ އޮން ޑިމޮކްރަސީ އެންޑް ހިއުމަން ރައިޓްސްގެ ރައީސްގެ މަގާމު ލިބިވަޑައިގަތުމާ ގުޅިގެން، އެޕާޓީގެ ޕީޖީ ލީޑަރު މުހައްމަދު އަސްލަމް އޭނާއަށް މަރުހަބާ ވިދާޅުވުމާއި ގުޅިގެން އެއަށް ރައްދު ދެއްވައި ނަޝީދު ފޮނުއްވި މެސެޖުގައި އެމަނިކުފާނު ވަނީ އެމަގާމުން ޖީހާން ވަކިކުރައްވާނެ ކަމަށް ވިދާޅުވެފައެވެ. 

Advertisement

"އަސްލަމް ތިޔަ ހުރިހާ ތަނަކުން އެމްޑީޕީ މީހުން ވަކިކުރާނަން. އަދި ބޭރު ގައުމުތަކަށް ނޭރޭ ވަރު ކުރާނަން،" ނަޝީދު ވިދާޅުވިއެވެ.

އެގްރޫޕަށް އެ މަނިކުފާނު ފޮނުއްވި މެސެޖުގައި އިތުރަށް ވިދާޅުވެފައި ވަނީ އެމްޑީޕީ ރިޔާސީ އިންތިޚާބުން ބަލިވުމަކީ އެ ޕާޓީން މުސްތަގުބަލުގައި ކުރިމަތިލާން ޖެހޭނެ ކަންތައްތަކުގެ ކުޑަ މިންވަރެއް ކަމަށެވެ.

އެމްޑީޕީގެ މީދޫ ދާއިރާގެ މެންބަރު ރޮޒެއިނާ އާދަމް ޖީހާންއަށް މަރުހަބާ ވިދާޅުވަމުން ކުރެއްވި ޓްވީޓެއްގައި ނަޝީދުގެ މެސެޖުތަކުގެ ސްކްރީންޝޮޓެއް އެކްސްގައި ހިއްސާކުރެއްވިއެވެ.

މަޖިލީހުގެ އެންމެ ހަތަރު އަންހެން މެންބަރު ތިއްބެވިއިރު މިއީ އެ މެންބަަރުންނަށް ލިބުނު ޝަރަފެއް ކަމަށާއި ނަމަވެސް މި މުނާސަބަތުގައި ވެސް، މަޖިލީހުގެ އިތުބާރު ގެއްލިފައިވާ ރައީސް ނަޝީދު ނިންމެވީ ޖީހާނަށް އިންޒާރު ދިނުމަށް ކަމަށް ރޮޒެއިނާ ވިދާޅުވި އެވެ.