ފަލަސްޠީނުގެ ޣައްޒާގައި ހިންގަމުންދާ ޤަޠުލް ޢާންމު ތަކާއި އެކު ފަލަސްޠީނުގެ ހުޅަނގުއައްސޭރީގައިވެސް އިޒްރާއިލުން ހިންގަމުން އަންނަ ޖަރީމާތަކުގެ ގިނަ ބަޔަކު ޒަޚަމް ކޮށްލައިފި އެވެ. 

ބޭރުގެ މީޑިއާ ތަކުން ބުނެފައިވާ ގޮތުގައި ރޭ ވެސް އިޒްރާއިލްގެ ޔަހޫދިން ވަނީ ހުޅަނގުއައްސޭރީގެ ބައިތް ލަޙްމަށް ވަދެ އެތަނުގެ އާންމު ރައްޔިތެއްގެ ގަޔަށް ބަޑި ޖަހައި ޝަހީދު ކޮށްލައިފައެވެ.

މިއަދުވެސް ރާމައްﷲ ގެ އަމާރީ ކޭމްޕަށް އިޒްރާއިލް ސިފައިން ވަނީ މިލިޓަރީ ރެއިޑް ޖެއްސުމުގެ ނަމުގައި ވަދެގަނެފައެވެ. އަލްޖަޒީރަގައި ބުނެފައިވަނީ މި ރެއިޑްގައި އެތައް ބަޔަކު ޒަޚަމްވެ ގިނަ ބަޔަކު ހައްޔަރުކޮށްގެން ގެންގޮސްފައިވާ ކަމަށެވެ.

ޣައްޒާއަށް ވައިގެެން މަގުން ދެމުންދާ ގެއްލުން ދެނިވި ހަމަލާ ތަކާއި އެކު ހުޅަނގު އައްސޭރިއަށް ވަރުގަދަ ހަތިޔާރު ތަކާއި އެކު އަރައި ހުޅަނގު އައްސޭރިއަށް ވެސް ދަނީ ބޮޑެތި ގެއްލުން ތައް ދެމުންނެވެ.

މީގެ އިތުރުން ހުޅަނގު އައްސޭރިއަށް އަރައި އެތަނުން ފަލަސްޠީނުގެ ޢާންމު ރައްޔިތުން އިޒްރާއިލް ސިފައިންގެ ބެލުމުގެ ދަށަން ގެންގޮސް އެމީހުންނަށް ދަނީ އެތައް އަނިޔާތަކެއް ދެމުންނެވެ.

ދާދި ފަހުންވެސް ފަލަސްޠީނުގެ އަންހެން ނޫސްވެރިޔަކު ވަނީ ހައްޔަރު ކޮށްފައިވެއެވެ. އޭނާ އަކީ ތިން ކުދިންގެ މަންމައެއްގެ އިތުރުން މާބަނޑު ޙާލަތުގައި ހުރި މީހެކެވެ.

7 އޮކްޓޫބަރު ޣައްޒާގައި ފެށި ޤަތުލް ޢާންމު ތަކާއި އެކު ހުޅަނގު އައްސޭރީގައި ހިންގަމުންދާ ޖަރީމާތަކުގައި މިހާތަނަށް ހުޅަނގު އައްސޭރިން 165 މީހަކު ވަނީ ޝަހީދު ކޮށްލައިފައެވެ.