ޣައްޒާގައި ގެދޮރު ގެއްލި ޙާލުގައި ޖެހިފައިވާ ކުޑަކުދިން “ޑީހައިޑްރޭޓް”ވެ އަނަރޫފަ ވަމުންދާ ކަމަށް ޣައްޒާގެ މައިން ބުނެފިއެވެ.
ހޮސްޕިޓަލް ތަކާއި އދ ގެ ސްކޫލްތަކުގައި ވަގުތީ ހިޔާވަހިކަން ހޯދަމުންދާ ޣައްޒާގެ މައިން އަލްޖަޒީރާ އަށް ބުނެފައިވަނީ އެމީހުންގެ ދަރިން “ޑީހައިޑްރޭޓް” ވެ އެކުދިންގެ ބަރުދަން ބޮޑު ތަނުން ލުއި ވަމުންދާ ކަމަށެވެ.
އދ ގެ ސްކޫލެއްގައި ވަގުތީ ހިޔާވަހިކަން ހޯދަމުންދާ ދޮޅު އަހަރުގެ ކުއްޖެއްގެ މަންމަ ބުނެފައިވަނީ އޭނާގެ އާއިލާ އދ ގެ އެސްކޫލްގައި ވަގުތީ ހިޔާ ހޯދަން އައީ ޝުޖައިއްޔާ ނެއިބަރހުޑްގައި ހުންނަ އެމީހުންގެ ގެ އިޒްރާއިލްގެ ހަމަލާއެއްގައި ހަލާކުވުމުން ކަމަށެވެ.
އަދި ވަގުތީ ހިޔާ އަށް ބަދަލުވެ އުޅެން ފެށިފަހުން އޭނާގެ ދޮޅުއަހަރުގެ ދަރިފުޅު “ޑީހައިޑްރޭޓް” ވެ ބޭރަށްހިންގުން ޖެހިފައިވާ ކަމަށެވެ.
އެހެން އަންހެނަކު ބުނެފައިވަނީ އޭނާގެ ދަރިފުޅު ފަނިވެ، އެކުއްޖާގެ ބަރުދަން ވަރަށް ބޮޑުތަނުން ލުއި ވެފައިވާ ކަމަށެވެ.
އަލްޖަޒީރާގައި ބުނެފައިވަނީ ގިނަ ޢަދަދެއްގެ ބެލެނިވެރިން ބަލިވެފައިތިބި ކުޑަކުދިން ގޮވައިގެން ހޮސްޕިޓަލްތަކަށް ޖަމަާވަމުން ދާ ކަމަށެވެ.
ޑަބްލިޔުއެޗްއޯ އިން ބުނެފައިވަނީ އޮކްޓޯބަރު މެދުތެރޭން ފެށިގެން ޣައްޒާގައި 33،551 އަށް ވުރެ ގިނަ ޑައިރިއާ ކޭސް ރިކޯޑްކުރެވިފައި ވާކަމަށެވެ. އޭގެ ތެރޭގައި ގިނައިން ހިމެނެނީ ފަސް އަހަރުން ދަށުގެ ކުޑަކުދިން ކަމަށް އަލްޖަޒީރާގައި ބުނެފައިވެއެވެ.
ޣައްޒާ އަށް ދޫކުރާ ފެނާއި ކަރަންޓު އަދި ތެޔޮ ދޫކުރުން އިޒްރާއިލުން ހުއްޓާލުމާއި ގުޅިގެން ޣައްޒާގެ ތެރޭގައި ސާފު ބޯފެން ނުލިބުމާއި ނަރުދަމާގެ މަސައްކަތް ކުރާ މެޝިނުތައް މަސައްކަތް ނުކުރުމުގެ ސަބަބުން ޣައްޒާގެ ތެރޭގައި ބަލިމަޑުކަން ދަނީ ފެތުރެމުންނެވެ.
މީގެ އިިތުރުން އެތައް ބަޔަކު ތޮއްޖެހިގެން އެއްތަނެއްގައި އުޅެން ޖެހިފައިވުމުން ބަލިމަޑުކަން ހަލުވި މިނެއްގައި ފެތުރުމުގެ ބިރުވެރިކަން ވަނީ ފެތުިރިފައެވެ.
Advertisement
This content is created and paid for by advertisers and does not involve Voice Journalists
