ޒަޔަނިސްޓު ޔަހޫދީން ފަލަސްތީނުގައި ހިންގަމުންދާ އުދުވާނު ތަކުގައި ހާލުގައި ޖެހިފައިވާ ފަލަސްޠީނުގެ ރައްޔިތުންނަށް އެހީވުމަށް އދ. ދަނގެތީގައި ކުރިއަށް ގެންދިޔަ ފަންޑް ރެއިޒިން ހަރަކާތްތަކަށް ދޮޅު ލައްކަ އަށްވުރެ ގިނަ ރުފިޔާ ލިބިއްޖެއެވެ. 

ފަލަސްތީނަށް އެހީވުމަށް ދަނގެތީގައި ކުރިއަށް ގެންދެވުނު ފަންޑް ރެއިޒިން ހަރަކާތްތައް ފެށިގެން ދިޔައީ ނިމިދިޔަ އޮކްޓޯބަރ މަހުގެ 13 ވަނަ ދުވަހުއެވެ.

އެގޮތުން އެންމެ ފުރަތަަމަ ބޭއްވިފައިވަނީ "ދަނގެތީ ރައްޔިތުން ފަލަސްތީނާއިއެކު" ހިނގާލުމެވެ. އެއަށްފަހު އެރޭގަައި ޖަމިއްޔަތުއްސަލަފާއި ގުޅިގެން، "ފަލަސްތީނާއިއެކު" ނަމުގައި ޚާއްސަ ފޯރަމެއްވެސް ވަނީ ކުރިއަށް ގެންގޮސްފަ އެވެ. މިދެ ހަރަކާތް ތެރެއިންވެސް ފަންޑު ފޮށި ބަހަށްޓައިގެން އެހީ ހޯދާފައި ވެއެވެ. 

އެއަށްފަހު، މަސްބަތާއި ބިރިޔާނީ ޕާރސަލް ވިއްކައިގެންވެސް ފައިސާ ހޯދާފައިވާއިރު، ފަތުރުވެރިންނާއި އާއްމުންނަށް ހުޅުވާލައިގެން ޑިނާ ނައިޓެއްވެސް ވަނީ ކުރިއަށް ގެންގޮސްފައެވެ. 

އަދި މީގެ އިތުރުން ދަނގެތީ ސުކޫލު ޕްރިފެކްޓް ބޯޑުގެ ފަރާތުންވެސް ވަނީ އެ ސުކޫލުގައި ފަންޑު ހޯދުމަށް ހަރަކާތެއް ހިންގާފައެވެ. 

ދަނގެތީ ފަންޑް ރެއިޒިން ހަރަކާތްތައް ނިންމާލާފައިވަނީ ނިމިދިޔަ ހޮނިހިރު ދުވަހު ބޭއްވުނު ޢާއިލީ ހަވީރެއްގެ ތެރެއިންނެވެ. އެ ހަވީރުގެ ތެރެއިން އެކި ކުޅިވަރުތަކާއި، އެކު ހެދިކާ ޕެކާއި، އެނޫންވެސް ތަފާތު ކެއުމާއި ބުއިން ވިއްކާފައިވާއިރު، ހުރިހާ ފަންޑު ރެއިޒިން އިވެންޓެއްގެ ތެރެއިން ވިއްކާފައިވާ ތަކެތީގެ ހުރިހާ ފައިސާއެއް ހަދިޔާ ކޮށްފައިވަނީ ފަލަސްތީނުގެ އަޚުންނާއި އުޚުތުންނަށް އެހީވުމަށް ހުޅުވާލި ފަންޑަށެވެ. 

ދަނގެތީގައި ހިންގުނު އެ ހުރިހާ ފަންޑު ރެއިޒިން ހަރަކާތަކާއި، އަދި ފަންޑު ފޮށި ބަހަށްޓައިގެން 150,095.45ރ ވަނީ ލިބިފައެވެ. އެހުރިހާ ފައިސާއެއް މިހާރު ވަނީ ފަލަސްތީނުގެ ރައްޔިތުންނަށް އެހީވުމަށް އިންޓަރނޭޝަލް އެއިޑް ކެންޕެއިން, އައިއޭސީން ހުޅުވާލާފައިވާ "ޣައްޒާ އެމެޖެންސީ ރިލީފް ފަންޑް" އަށް ހަދިޔާ ކޮށްފައެވެ. 

އިޒްރާއިލުން ހުއްޓުމެއް ނެތި ޣައްޒާއަށް ދެމުންދާ ހަމަލާތަކަށް މަސް ދުވަހަށްވުރެ ގިނަ ދުވަސް ވެފައިވާއިރު ހަމަލާތަކުގައި 10500 އަށް ވުރެ ގިނަ މީހުން މިހާރު ވަނީ ޝަހީދު ކޮށްލައިފައެވެ.