ރައްޔިތުންގެ މަޖިލީހުގެ 2024 ވަނައަހަރުގެ އިންތިޚާބީ ދާއިރާތަކަށް އާބާދީ ކަނޑައަޅާފައިވާގޮތުގެ ވަގުތީ ރިޕޯޓަށް ބައެއް ބަދަލު ގެނައުމަށް އިލެކްޝަންސް ކޮމިޝަން އިން ނިންމާފައިވާކަމަށް އެ ކޮމިޝަން ގެ ވައިސް ޗެއާމަން އިސްމާއިލް ހަބީބް ވިދާޅުވެއްޖެއެވެ.

އިސްމާއީލް ހަބީބް މިއަދު ކުރެއްވި ޓްވީޓެއްގައި ވިދާޅުވީ ރައްޔިތުންގެ މަޖިލީހުގެ 2024 ވަނައަހަރުގެ އިންތިޚާބީ ދާއިރާތަކަށް އާބާދީ ކަނޑައަޅާފައިވާގޮތުގެ ވަގުތީ ރިޕޯޓަށް ލިބިފައިވާ ޝަކުވާ އާއި ޚިޔާލުތައް އިލެކްޝަންސް ކޮމިޝަނުން ދިރާސާކުރުމަށް ފަހު، ވަގުތީ ރިޕޯޓަށް ބައެއް ބަދަލު ގެނައުމަށް ކޮމިޝަނުން ނިންމަވާފައިވާކަމަށެވެ.

ގެނައުމަށް ނިންމާފައިވާ ބަދަލު ތަކުގެ ތެރޭގައި، މާލޭ މުނިސިޕަލްޓީގެ ދަފްތަރުގައި ހިމެނިވަޑައިގަންނަވާ ބޭފުޅުންގެ ތެރެއިން، ވިލިމާލެ ދާއިރާގައި ރަޖިސްޓަރީ ވެފައިވާ ބޭފުޅުން ފިޔަވައި، އެހެން ހުރިހާ ބޭފުޅުން، ހުޅުމާލެ މެދު ދާއިރާ އާއި، ހުޅުމާލެ އުތުރު ދާއިރާ އަށް ބަދަލުކޮށް، ދަފްތަރު ބޭފުޅުން ހިމެނިވަޑައިގެންނެވި މާލޭ ދާއިރާ ތައް ( މާފަންނު، މައްޗަންގޮޅި) ގެ އާބާދީ ހަމަހަމަކުރުމަށް ޗާޓަށް ބަދަލުގެނައުމާއި ، ހައްދުންމަތީ ގަމު ދާއިރާއިން މުންޑޫ ވަކިކޮށް އިސްދޫ ދާއިރާއަށް ބަދަލުކުރުން ހިމެނެއެވެ.

ހަމަ އެހެންމެ، ހުވަދުއަތޮޅު އުތުރުބުރީގެ 3 ދާއިރާ އަކަށް އާބާދީ ހަމަހަމަކުރުމަށް ބަދަލުގެނައުމަށް އިލެކްޝަން ކޮމިޝަން އިން ވަނީ ނިންމާފައެވެ.  ހުވަދުއަތޮޅުގެ ދާއިރާ ތަކަށް ބަދަލު ގެންނަނީ އެ އަތޮޅުގެ ދާއިރާ ތަކުގެ އާބާދީ ހަމަ ހަމަ ކުރުމަށް ކަމަށް އިލެކްޝަން ކޮމިޝަން އިން ބުންޏެވެ.

މި ގޮތަށް ބަދަލު ގެނައުމުން ހުވަދުއަތޮޅުގެ ދާއިރާ ތައް ހަމަޖެހިގެންދާނީ، ވިލިނގިލި ދާއިރާގައި ވިލިނގިލި، ދާންދޫ ދާއިރާގައި ނިލަންދޫ، ދާންދޫ، ކޮނޑޭ، ގެމަނަފުށި ދާއިރާ ގައި ގެމަނަފުށި، ކަނޑުހުޅުދޫ، ދެއްވަދޫ، އަދި ކޮލަމާފުށި ދާއިރާގައި ކޮލަމާފުށި، މާމެންދޫ މިގޮތަށެވެ.

އިންތިޚާބީ ދާއިރާތަކަށް އާބާދީ ކަނޑައަޅާފައިވާގޮތުގެ ފައިނަލް ރިޕޯޓު ތައްޔާރުކުރުމުގެ މަސައްކަތް މިހާރުދަނީ ކުރެވެމުން ކަމަށް އިސްމާއީލް ހަބީބު ވިދާޅުވިއެވެ.