އިސްރާއީލުން ޣައްޒާގެ އަލް ބުރާޤު މަދުރަސާއަށާއި ޞަލާޙުއްދީން މަގަށް ބޮންއަޅައިފިއެވެ.

އިސްރާއީލުން މި ހިންގި ޤަތުލުޢާންމުގައި 50 މީހުން ވަނީ ޝަހީދުވެފައެވެ. 

މި ސްކޫލަކީ ޣައްޒާގައި ގެދޮރު ގެއްލިފައިވާ ފަރާތްތައް ވަގުތީ ގޮތުން ދިރިއުޅުމަށް ބޭނުން ކުރަމުން އަންނަ ސްކޫލެކެވެ.

Advertisement

"މިއީ ބައިނަލްއަޤްވާމީ މޫނުމަތީގައްޔާއި އިންސާނިއްޔަތުގެ މޫނުމަތީގައި އިސްރާއީލުން ޖެހި ލައްގަނޑެކެވެ. އިސްރާއީލުގެ މުޖްރިމު ފެޝިސްޓު މި ޢަމަލުގެ ސަބަބުން އަހުރެމެންގެ ހިތްވަރު ބައްޔެއް ނުވާނެއެވެ."  މި ހަމަލާ ކުށްވެރިކޮށް ހަމާސް ގެ ފަރާތުން ބުނެފައިވެއެވެ.

އިސްރާއީލުން ވަނީ މިދިޔަ ހަފްތާ ތެރޭގައި ފަލަސްތީން ގެ އަލް ފަޚްރާ ސްކޫލަށް ވެސް ބޮން އަޅާފައެވެ. މިއީ ރެފިއުޖީންނަށް ހާއްސަކޮށް އދ އިން ހިންގާ ސްކޫލެކެވެ. އިސްރާއީލުން ވަނީ ފަލަސްތީނަށް ހަމަލާ ދޭ މިންވަރު އިތުރު ކޮށް ގިން އަދަދެއްގެ ސްކޫލް ތަކަށާއި ހޮސްޕިޓަލް ތަކަށް ބިން އަޅާ އެތައްހާސް ބަޔަކު ޝަހީދު ކޮށްލާފައެވެ.

ހުކުރުދުވަހު އިސްރާއީލުން ވަނީ އުތުރު ޣައްޒާއިން ދެކުނު ޣައްޒާއަށް ފައިބަމުންދިޔަ މީހުން ޞަލާޙުއްދީން މަގުގައި ހަދައިދީފައިވާ "އަމާން ދުވާރު" މަތީގައި ތިއްބާ ބޮންއަޅައި އެތައް ބަޔަކު ޝަހީދުކޮށް އެތައް ބަޔަކު ޒަޚަމުކޮށްލައިފައެވެ.

ޣައްޒާއަށް އިސްރާއީލުން ދެމުންދާ  ލާއިންސާނީ ހަމަލާތަކަށް މަހަކަށް ވުރެ ގިން ދުވަސް ވެފައި ވާއިރު މި ހަމަލާތަކުގެ ސަބަބުން  4506 ކުޑަކުދިންނާއި 3,026 އަންހެނުންނާއި 668 މުސްކުޅިން ހިމެނޭ ފަދައިން 11،078 މީހުން ވަނީ  މިހާތަނަށް ޝަހީދުވެފައެވެ.