މަސްވެރިކަމަށް ނުކުމެ އުޅުނު ގއ. ގެމަނަފުށްޓަށް ނިސްބަތްވާ ދޯންޏެއް ބިންދައިގެން ގޮއްސިއެވެ.

މި ހާދިސާގައި ބިންދައިގެން ގޮސްފައި ވަނީ ގއ. ގެމަނަފުށީ އޯކިޑު 707 ނަމަކަށް ކިޔާ ދޯންޏެެކެވެ. މި ހާދިސާ ހިނގި އިރު އެ ދޯނި އޮތީ އައްޑޫ ސިޓީއާ ދިމާލުން 25 މޭލު ބޭރުގައި ކަމަށް އެމްއެންޑީއެފް އިން ބުނެއެވެ. 

‏މި ހާދިސާގައި ދޯނީގެ ކުރީކޮޅާއި ފަހަތުކޮޅު އެއްކޮށް ވަކިވެފައިވާކަމަށާއި ނަމަވެސް ދޯނީގައި ތިބި 10 ދިވެހިންނާއި 13 ބިދޭސީންގެ ހާލު ރަނގަޅުކަމަށް ވަނީ މަޢުލޫމާތު ލިބިފައިވާކަމުގައި އެމްއެންޑީއެފް އިން ބުނެއެވެ. އެ ސަރަހައްދުގައި ކޯސްޓްގާޑުގެ ފާސްޓް އިންޓަރސެޕްޓަރ ކްރާފްޓް "ދޮށިމޭނާ" މިހާރު ހަރަކާތްތެރިވަމުން އަންނަ ކަމުގައިވެސް އެ ފަރާތުން ބުނެއެވެ. 

އޯކިޑު 707 އަކީ 111 ފޫޓުގެ ދޯންޏެކެވެ. ބިންދައިގެން ދިޔައިރު އޭގައި ތިބީ 23 ފަޅުވެރިންނެވެ. މިހާދިސާގައި ދޯނީގެ އެއްވެސް ފަޅުވެރިއަކަށް އަނިޔާއެއް ލިބިފައިވާ ކަމުގެ މައުލޫމާތެއް އަދި ލިބިފައެއް ނުވެއެވެ.