މިއަދަކީ ރައްޔިތުންގެ މަޖިލީހުގެ ޑިމޮކްރެޓިކް ހަޔާތުގައި ކުރިމަތިލި ލަދުވެތި ދުވަހެއްކަމަށް އިކޮނޮމިކް މިނިސްޓަރު އަދި މަޖިލީހުގެ މެޖޯރިޓީ ޕާޓީ އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެ އެވެ. 

ފައްޔާޒު މިފަދައިން ވިދާޅުވެފައި ވަނީ މަޖިލީހުގެ 49 މެމްބަރުންގެ ސޮޔާއެކު ހުށައަޅާފައިވާ ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލައިގެ ގަރާރު ރިޔާސަތުން ބޭރުކޮށްލުމާއި ގުޅިގެން އެކްސްގައި ކުރެއްވި ޕޯސްޓެއްގަ އެވެ. 

ރިޔާސަތުން އެ ގަރާރު ބޭރުކޮށްލާފައި ވަނީ އެއީ މަޖިލީހުގެ ގަވައިދުގައި ބަޔާންކުރާ ގަރާރެއްގެ ސިފަތައް ފުރިހަމަ ނުވާ ގަރާރެއްކަމަށް ބަޔާންކޮށް މެދު ހެންވޭރު ދާއިރާގެ މެމްބަރު އަލީ އާޒިމް ހުށައެޅުއްވި ނިޒާމީ ނުކުތާއެއް ބަލައިގަނެގެންނެވެ. އަދި މިއަދު ހެނދުނު ކުރިއަށް ދިޔަ ދަންފަޅީގައި ރިޔާސަތު ބަލަހައްޓަވަން އިންނެވި ހަސަން އަފީފު ވަނީ ގަރާރު ބޭރުކޮށް މަޖިލީހުގެ ޖަލްސާ ވެސް ނިންމާލާފަ އެވެ. 

Advertisement

އެކަމަށް އަލިއަޅުވާލައްވާ ފައްޔާޒު ކުރެއްވި އެ ޕޯސްޓުގައި ވިދާޅުވީ އަފީފްގެ އެ އަމަލާއެކު މަޖިލީހުގެ ކުރީގެ ރައީސް މަސީހުގެ ޙުދުމުހުތާރުކަން ފަނޑުވެއްޖެ ކަމަށެވެ. އަދި މިއަދު އަފީފް އަމަލުކުރެއްވި ގޮތަކީ ވަރަށް ލަދުވެތި އަދި ފިނޑި ގޮތެއް ކަަމަށް ފައްޔާޒް ވިދާޅުވިއެވެ.

ފައްޔާޒް ވަނީ އިތުބާރު ނެތްކަމުގެ ވޯޓު ކުރިއަށް ނުގެންދެވޭނެ ގޮތް ހެދުމަށް އަފީފް މިއަދު އަމަލުކުރެއްވި ގޮތުގެ ސަބަބުން މި ދުވަހަކީ ރާއްޖޭގެ ޕާލިމަންޓްރީ ޑިމޮކްރަސީގައި ކަޅު ދުވަހެއްގެ ގޮތުގައި ފާހަގަވެގެންދާނެ ކަމަށް ވިދާޅުވެފަ އެވެ. އަދި އަފީފުގެ އަމަލުކުރެއްވި ގޮތުން މީ މަޖިލީހުގެ ހަޔާތުގައި އައި ލަދުވެތި ދުވަހެއްކަމަށް ފައްޔާޒު ސިފަކުރެއްވި އެވެ. 

އެއާއެކު އޭނާ ވަނީ އިތުބާރު ނެތްކަމުގެ މައްސަލައާއި ކުރިމަތިލައްވާ، ވޯޓާއި ކުރިމަތިލެއްވުމަށް ގޮވާލައްވާފަ އެވެ.