ގަރާރު ބޭރުކުރުން ގަބޫލުނުކުރާތީ، ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެ މަގާމުން ވަކިކުރަން ހުށަހަޅާފައިވާ އިތުބާރުނެތް ކަމުގެ ގަރާރު ގޯސްކަމަށް ނިންމައި ރިޔާސަތުން އެ ގަރާރު ބޭރުކޮށްފައިވަނިކޮށް، އެ ގަރާރު މާދަމާގެ ޖަލްސާއަށް ވެސް އެޖެންޑާކޮށްފި އެވެ.

ނަޝީދު މަގާމުން ވަކި ކުރަން އެމްޑީޕީގެ 49 މެމްބަރުންގެ ސޮއި އާ އެކު ހުށަހަޅާފައިވާ ގަރާރު ފަސް ފަހަރެއްގެ މަތިން އެޖެންޑާކޮށްގެން ވެސް ކުރިއަށް ނުގެންދެވުނީ އީވާ އާލާސްކަންފުޅާ އުޅުއްވާ ކަމަށް ވިދާޅުވެ އެ ޖަލްސާތަކަށް ސަލާން ފޮނުއްވުމުންނެވެ. އޭރު މަޖިލީހުގެ އިދާރާއިން ނިންމާފައި އޮތީ، މަޖިލީހުގެ ގަވާއިދުގައި ބުނެފައިވާ ގޮތަށް، މަޖިލީހުގެ ރައީސްގެ މަގާމުން ވަކި ކުރުމުގެ ގަރާރެއް ކުރިއަށްދާ ޖަލްސާގެ ރިޔާސަތު އިންނަވާނީ މަޖިލީހުގެ ނައިބު ރައީސް ކަމަށެވެ.

މިކަމާއި ބެހޭގޮތުން އެމްޑީޕީން ސުޕްރީމް ކޯޓަށް ހުށަހެޅި ދުސްތޫރީ މައްސަލާގައި މިދިޔަ ބުރާސްފަތި ދުވަހު ކުރި ހުކުމްގައި ވަނީ އީވާ ނެތަސް ރިޔާސަތު ބެލެހެއްޓޭނެ ކަމަށް ގަވާއިދުގެ ދަށުން ކަނޑައަޅާފައިވާ މެމްބަރުންނަށް އެފަދަ ޖަލްސާއެއްގެ ރިޔާސަތު ވެސް ބެލެހެއްޓޭނެ ކަމަށެވެ.

Advertisement

އެއާ އެކު، ނަޝީދުގެ ގަރާރު މިއަދުގެ ޖަލްސާއަށް އެޖެންޑާކުރުމުން، ޑިމޮކްރެޓްސް މެމްބަރުން ވަނީ އެ ގަރާރު ހުށަހަޅާފައިވަނީ ގަވާއިދާ ހިލާފަށް ކަމަށް ބުނެ ޖަލްސާ ކުރިއަށް ގެންދަން ހުރަސްއަޅުއްވައިފަ އެވެ. އެ ޖަލްސާއަށް އީވާ އަނެއްކާ ވެސް ސަލާން ވިދާޅުވެފައިވާތީ، ރިޔާސަތުގައި އިންނެވި ވިލުފުށި ދާއިރާގެ ޑިމޮކްރެޓްސް މެމްބަރު ހަސަން އަފީފް ވަނީ އެކަން ބަލައިގަންނަވައި، ގަވާއިދާ ހިލާފު ގަރާރެއް ކަމަށް ކަނޑައަޅުއްވައި، އެ ގަރާރު އަލުން ހުށަހަޅަން އަންގަވައިފަ އެވެ.

އަފީފް ޖަލްސާ ނިންމައިލައްވަން އުޅުއްވުމުން، މަޖިލީހުގެ އަމީންއާންމު ވަނީ އެ ކަން އެގޮތަށް ނުކުރެވޭނެ ކަމަށް ލަފާ ދެއްވާފައިއެވެ. އަދި އެ ނިންމުން ގޯސްކަމަށް ގަބޫލުކުރެވޭތީ، މަޖިލީހުގެ އިދާރާއިން ވަނީ އިތުރު ޖަލްސާއެއް މިއަދު ހެނދުނު ތާވަލުކޮށް، ނަޝީދުގެ ގަރާރު އަލުން އެޖެންޑާކޮށްފަ އެވެ.

ނަމަވެސް، 11 ޖެހިއިރު ބޭއްވި އެ ޖަލްސާގެ ރިޔާސަތާ އީވާ ހަވާލުވެވަޑައިގެން ވަނީ، ނަޝީދު ވަކިކުރުމުގެ ގަރާރު ބޭރުކޮށްފައިވާ ކަމަށް ކަނޑައަޅުއްވައި، ޖަލްސާ ނިންމަވާލައްވައިފަ އެވެ.

އަފީފާއި އީވާ ވެސް ގަރާރު ބޭރުކޮށްފައިވަނީ ގޯސްކޮށް ކަމަށް މަޖިލީހުގެ އިދާރާ އިން ގަބޫލުކުރާ ކަން އެނގިފައިވާ އިރު، މާދަމާގެ ހެނދުނު 11:00 އަށް ޖަލްސާއެއް ތާވަލުކޮށް، އެޖެންޑާކޮށްފައިވަނީ ނަޝީދު އިތުބާރު ނެތް ކަމުގެ މައްސަލައިގައި ވަކިކުރުމުގެ ގަރާރު އެކަންޏެވެ.

މިއަދު ބޭއްވި ދެ ޖަލްސާގައި އަފީފާއި އީވާ އަމަލުކުރެއްވި ގޮތުން، އެ ދެ މެމްބަރުން މުޅި މަޖިލީހުގެ އިމްތިޔާޒަށް އަރައިގަތް ކަމަށް އިމްތިޔާޒާއި ސުލޫކު ކޮމިޓީން ވަނީ ފާސްކޮށްފަ އެވެ.

އަދި ކޮމިޓީގެ މިއަދުގެ ޖަލްސާގައި ވަނީ ނަޝީދުގެ އިތުބާރުނެތް ކަމުގައި މައްސަލައިގެ ރިޔާސަތުގައި ޑިމޮކްރެޓްސްގެ އެއްވެސް މެންބަރަކު ނުތިބެވޭނެ ގޮތަށް އެދުމަށް ވެސް ނިންމައިފަ އެވެ. އެގޮތަށް އެދުމުން ނަޝީދުގެ އިތުބާރު ނެތް ކަމުގެ މައްސަލަ ކުރިއަށް ގެންދާނެ ގޮތެއް ހޯދުމަށް ބަންޑާރަ ނައިބުގެ ލަފައެއް ހޯދުމަށް އާންމު ކޮމިޓީން ވަނީ ފާސްކޮށްފަ އެވެ.

ނަޝީދުގެ އިތުރުން، މަޖިލީހުގެ ނައިބު ރައީސްގެ މަގާމުން އީވާ ވަކިކުރަން ސޮއި ހަމަކޮށް، ގަރާރެއް ހުށަހެޅުމަށް އެމްޑީޕީން ދަނީ ތައްޔާރުވަމުންނެވެ.