އިންޓަނޭޝަނަލް އެއިޑް ކެމްޕެއިން (އައިއޭސީ) އިން ޣައްޒާގެ 500 އާއިލާ އަކަށް ހޮޓް މީލް ޕެކް ބަހައިފިއެވެ.
އައޭސީން ބުނެފައިވާ ގޮތުގައި މި މީލް ޕެކް ބަހާފައި ވަނީ ހަނގުރާމަ އެންމެ ބޮޑު އެއް ހިސާބު ކަމުގައިވާ ނޯތް ޣައްޒާގެ ޖަބަލިއްޔާ ސަރަހައްދުގައި ކަމަށެވެ. މިއީ ނިރުބަވެރި ޔަހޫދީން ދާދި ފަހުން ފުލުފުލުން ހަމާދޭން ފެށި ޖަބަލިއްޔާ ކޭމްޕްވެސް ހުރި ހިސާބެވެ.
ހުއްޓުމެއްނެތި ޔަހޫދީންގެ ހަމަލާތައް ނޯތް ޣައްޒާއަށް ދެމުންދާއިރު، ހަނގުރާމައިގެ ތެރޭގައި މިފަދަ އެހީ ދިނުމަކީ އުނދަގޫ ކަމެއް ކަން އައިއޭސީން ފާހަގަކުރެއެވެ.
އޮކްޓޯބަރ 7 ވަނަ ދުވަހުން ފެށިގެން ޔަހޫދީންގެ ހަމާލާތައް ޣައްޒާ ދޭން ފެށުމާއިއެކު އައިއޭސީން ވަނީ ދިވެހީންގެ އެހީ ޣައްޒާއަށް ފޯރުކޮށްދިނުމުގެ މަސައްކަތް ފަށާފަ އެވެ.
އެގޮތުން ޣައްޒާގެ އެތެރެއިން ތެޔޮ ހޯދައިގެން ހޮސްޕިޓާތަކަށް ތެޔޮ ފޯރުކޮށްދިނުމާއި، އަސާސީ ގޮތުން ކޮންމެހެން ބޭނުންވާ ތަކެތި ދިނުމާއި، މީލް ޕެކް ބެހުމުގެ އިތުރުން ނަގުދު ފައިސާވެސް އާއިލާ ތަކަށް ވަނީ ބަހާފައެވެ.
މީގެ އިތުރުން، ދިވެހިންގެ އެހީގެ ބޮޑު ގާފިލާއެއް ރަފާހު ބޯޑަރ މެދުވެރިކޮށް ޣައްޒާއަށް ވެއްދުމަށް އެ ޖަމިއްޔާ އިން އަންނަނީ މަސައްކަތް ކުރަމުންނެވެ.
ޣައްޒާއަށް އިޒްރާއިލުން ދެމުންދާ ހަމަލާތަކުގައި 11،078 މީހަކު ޝަހީދު ވެފައިވާއިރު ޝަހީދުންގެ ތެރޭގައި 4506 ކުޑަކުދިން ހިމެނެއެވެ. އަދި ހަމަލާތަކުގައި މިހާތަނަށް 27،490 މީހަކު ޒަޚަމްވެފައި ވާއިރު، އޭގެ ތެރޭގައި 8،633 ކުޑަކުދިން ހިމެނެއެވެ.
Advertisement
This content is created and paid for by advertisers and does not involve Voice Journalists
