ޚިދްމަތް ދެވޭނެ ގޮތް ނެތި ގޮތް ހުސްވެގެން ފަލަސްޠީނު ޣައްޒާގެ އެންމެ ބޮޑު ދެ ހޮސްޕިޓަލްގެ ޚިދްމަތް ހުއްޓައިލައިފިއެވެ.
ޣައްޒާގެ އެންމެ ބޮޑު ދެހޮސްޕިޓަލް ކަމަށްވާ އަލް ޝިފާ ހޮސްޕިޓަލާއި އަލް ޤުދުސް ހޮސްޕިޓަލް ޚިދްމަތް ދެވޭނެ ގޮތް ނެތި ހުއްޓިފައިވާ ކަމަށް އަލްޖަޒީރާގައި ބުނެފައިވެއެވެ.
އަލްޖަޒީރާގައި އިތުރަށް ބުނެފައިވަނީ ޝިފާ ހޮސްޕިޓަލްގެ ވަށައިގެން ކޮންމެ މީހެއްގެ ގަޔަށް އިޒްރާއިލްގެ ސްނައިޕަރުން ބަޑިޖަހަމުން ދާކަމަށެެވެ.
މީގެއިތުުރުން ފަލަސްޠީނުގެ ހެލްތް މިނިސްޓްރީ އާއި ހަވާލާދީ އަލްޖަޒީރާގައި ބުނެފައިވަނީ އަލް ޝިފާގެ މުވައްޒަފުން ދަނީ ޝަހީދުވެފައި ތިބި މީހުން ވަޅުލާނެ ގޮތެއް ނެތި އެކަމުގެ ތަކުލީފުތައް އުފުލަމުން ކަމަށެވެ. އަދި އެހޮސްޕިޓަލަށް ދިން ހަމަލާގައި ޝަހީދުވި 100 މީހުންގެ ހަށިގަނޑު އެހޮސްޕިޓަލް ތެރޭގައި ވަޅުނުލެވި ވާކަމަށެވެ.
ހަމަ މިއާއި އެކު ހޮސްޕިޓަލްގެ ޢިމާރާތުގެ ތެރެއިން މެޑިކަލް ވޭސްޓް ބޭރު ނުކުރެވި ފުނި ޖެހެމުންދާތީ ހޮސްޕިޓަލްގެ ސްޓާފުންނަށް އެތައް އުނދަގޫތަކެއް ކުރިމަތިވަމުންދާ ކަމަށްވެސް ބުނެފައިވެއެވެ.
މި ތަކްލީފުތަކާއި އެކު އެހޮސްޕިޓަލްގައި ތިބި މެޑިކަލް އޮފޮސަރުންނާއި ބަލި މީހުން މިވަގުތު ތިބީ އެ ހޮސްޕިޓަލްގައި ތާށިވެފައެވެ. އިޒްރާއިލްގެ ސިފައިން ވަނީ ހަތިޔާރާއި އެކު އަލް ޝިފާ ވަށައިލައިފައެވެ.
Advertisement
This content is created and paid for by advertisers and does not involve Voice Journalists
