ދިވެހިރާއްޖޭގެ ބަންޑާރަ ނާއިބު، އިބްރާހީމް ރިފްޢަތު، ރައްޔިތުންގެ މަޖިލީހުގެ ރައީސް، މުހައްމަދު ނަޝީދުގެ އިތުބާރު ނެތް މައްސަލާގައި ޑިމޮކްރެޓްސް ގެ މެންބަރަކު ރިޔާސަތުގައި އިންނެވުމުން 'މަސްލަހަތު ފުށުއަރާ' ކަމަށް ވިދާޅުވެ ދެއްކެވި ވާހަކަތަކަށް ކުރީގެ ރައީސް ޔާމީން އަބްދުލްގައްޔޫމް ގެ ވަކީލުންގެ ޓީމުގައި ހިމެނިވަޑައިގަންނަވާ އަބްދުالله ސިޔާޒު ރައްދުދެއްވައިފިއެވެ. 

އެމްޑީޕީގެ ފަރާތުން ރައްޔިތުންގެ މަޖިލީހަށް ހުށަހަޅައިފައިވާ، ރައީސް ނަޝީދުގެ އިތުބާރު ނެތް މައްސަލަ ކުރިއަށް ނުގެންދެވޭތީ، އެ މައްސަލާގައި ބަންޑާރަ ނާއިބުގެ ލަފާ ހޯދުމަށް މަޖިލީހުގެ އާއްމު ކޮމިޓީން އިއްޔެ ވަނީ ނިންމާފައެވެ. 

އެ މައްސަލާގައި ބަންޑާރަ ނާއިބު، ރިފްޢަތު ކުރެއްްވި ޓުވީޓެއްގައި ވަނީ ރައްޔިތުންގެ މަޖިލީހުގެ ރައީސް ވަކިކުރުމުގެ ޤަރާރު ހުށަހެޅުމަށް އެޖެންޑާ ކުރެވޭ ޖަލްސާއެއްގެ ރިޔާސަތު މަޖިލީހުގެ ރައީސްގެ ނުފޫޒު އޮތް މެންބަރަކު ބެލެހެއްޓުމަކީ މަޖިލީހުގެ ގަވާއިދުގެ 205 ވަނަ މާއްދާގެ (ބ) ގައި ބުނާ މަސްލަޙަތު ފުށުއެރުމުގެ އުޞޫލާ ދިމާ އިދިކޮޅު މާނަކުރުމެއް ކަމަށް ވިދާޅުވެފައެވެ.

"ރައްޔިތުންގެ މަޖިލީހުގެ ރައީސް މަޤާމުން ވަކިކުރުމުގެ މައްސަލައެއް ބެލުމުގައި، ރިޔާސަތު ބެލެއްޓުމަށް ދެކޮޅު ހަދައި ނުވަތަ އުޒުރުވެރިވާ މެންބަރުންނާއި އަދި މަސްލަޙަތު ފުށުއަރާ އެއްވެސް ފަރާތެއް ރިޔާސަތުގައި ނުބޭންދުމުގެ މުޙިއްމުކަމަށް އިސްކަންދޭންޖެހޭ." ރިފްޢަތު ވިދާޅުވި އެވެ. 

ރިފްޢަތުގެ ވާހަކަ ތަކަށް ރައްދު ދެއްވައި، ސިޔާޒް ކުރެއްވި ޓްވީޓެއްގައި ވިދާޅުވީ، މަސްލަޙަތު ފުށުއެރުމުގެ ބަހުސަކީ ވަރަށް ފުޅާ ބަހުސެއް ކަމަށެވެ. 

އަދި ރައްޔިތުންގެ މަޖިލީހުގެ ރައީސް ވަކިކުރުމުގެ މައްސަލާގައި ރައްޔިތުންގެ މަޖިލީހުގެ ރައީސް ހިމެނިވަޑައިގަންނަވާ ޕާޓީގެ މެމްބަރަކު ރިޔާސަތު ބެލެހެއްޓުން އެއީ މަސްލަޙަތު ފުށުއަރާ ކަމަކަށް ވާނަމަ، ޤަރާރުގައި ސޮއިކުރި މެމްބަރުންހިމެނޭ ޕާޓީއެއްގެ މެމްބަރަކު ރިޔާސަތު ބެހެލެއްޓުންވެސް ވާނީ މަސްލަޙަތު ފުށުއެރުން ކަމަށް ސިޔާޒް ވިދާޅުވި އެވެ.

"މަޞްލަޙަތު ފުށުއެރުން މާނަ ފުޅާކުރެވިދާނެ ޤަރާރުގައި ސޮއިކޮށްފައިވާ މެމްބަރަކު ހިމެނޭ ޕާޓީއެއްގެ މެމްބަރަކު ގަރާރަށް ވޯޓު ލުމަކީވެސް މަސްލަޙަތު ފުށުއެރުން ކަމަށް ވާނެ ކަމަށް.  އެމިންވަރަށް މަސްލަޙަތު ފުށުއެރުން މާނަ ފުޅާކޮށްފިނަމަ ޖަލްސާގައި ބައިވެރިވެ، ރިޔާސަތު ބަލަހައްޓާ، ޤަރާރަށް ބަހުސްކޮށް ވޯޓު ލެވޭނެ ބަޔަކު ތިބޭނެތަ؟" ސިޔާޒު ވިދާޅުވި އެވެ. 

ނަޝީދުގެ މައްޗަށް އިތުބާރު ނެތް ކަމަށް ނިންމައި އެމްޑީޕީން އިއްޔެ މަޖިލިހަށް ހުށަހެޅި ގަރާރު ބޭރުކުރުމަށް ރިޔާސަތުން ނިންމާފައިވާއިރު، އެކަމުގައި ބަންޑާރަ ނައިބުގެ ލަފާ ހޯދުމަށް އާއްމު ކޮމިޓީން ނިންމުމާއި ގުޅިގެން ބަންޑާރަ ނާއިބު ވަނީ އެކަން މަޖިލީހުގެ ގަވާއިދާ ހިލާފަށް ކަމަށް ވިދާޅުވެފައެވެ.

އެގޮތުން ބަންޑާރަ ނައިބް އިބްރާހީމް ރިފްއަތު ކުރެއްވި ޓުވީޓެއްގައި ވިދާޅުވީ، މަޖިލިހުގެ ގަވާއިދުގެ 205 ވަނަ މާއްދާގައިވާ ގޮތުގެ މަތިން މަޖިލިހުގެ ރައީސް މަގާމުން ވަކި ކުރުމުގެ ގަރާރަކީ މަޖިލިހުގެ ގަވައިދުގެ 167، 168، 169 ވަނަ މާއްދާގައި ބަޔާން ކުރާ މެމްބަރުން ހުށަހަޅާ "އާންމު" ގަރާރުތަކާ ގުޅިގެން ފުރިހަމަ ކުރަން ޖެހޭ އިޖުރާއަތުތައް ހިނގާ ގަރާރެއް ނޫން ކަމަށެވެ.